ދިވެހި ރާއްޖެއަކީ އާބާދީ ގޮތުން މީސްކޮޅު މަދު ގައުމެއް ނަމަވެސް މި ކުޑަ ކުޑަ އާބާދީގައިވެސް އަޖައިބު ކުރަނިވި އެތައް ކަމެއް ހިނގައެވެ. އެގޮތުން މިއީ ރާއްޖެތޭ ރަށެއްގައި ހިނގައި ދިޔަ އެފަދަ ހާދިސާއެކެވެ. މި ވާހަކަ މި ހިއްސާކޮށްލެވެނީ އެ ވާހަކަ ހިއްސާކުރެއްވި ފަރާތުގެ އިޒުނައާއި އެކުގައެވެ.

ރަށެއްގައި އުޅުނު، އުމުރުން ގާތްގަނޑަކަށް 10 އަހަރުގެ ފިރިހެން ކުއްޖެކެވެ. އެ ކުއްޖާ އާއި އެއްބަނޑުއެއްބަފާ 4 ކުދިން އުޅެއެވެ. އޭގެތެރެއިން އެއީ އެންމެ ދޮށްޓަށް ހުރި ކުއްޖާއެވެ. އެކުއްޖާގެ މަންމަ އާއި ބައްޕަވެސް ދުނިޔޭގައި އެބަތިއްބެވެ.

އެއްދުވަހެއްގެ އަސުރު ނަމާދަށްފަހު މެދު އުމުރުގެ ފިރިހެނަކު މިސްކުތުން ނުކުމެ މިސްކިތާއި މާ ދުރުނޫން ހިސާބެއްގައި ހުރި ޖޯލިފައްޗަކާއި ދިމާލަަށް ދިޔައެވެ. އެ ޖޯލިފަތި ހުރީ ހިރުނދުގަހެއްގެ ހިޔަލުގައެވެ. ޒާރަތަކަށް ހެދިފައި ހުރި އެ ހިރުނދުގަހުގެ އަފިގަނޑެއްގައި އެއްކަލަ ކުޑަކުއްޖާ އެބައިނެވެ.

އޭނާ އެކުއްޖާކުރެން ކަލޯ މިގަހަށް އަރާ ކީއްކުރަނީތޯ ސުވާލު ކުރިއެވެ. އެއާއި އެކު އެކުއްޖާ ދިނީ އެކުއްޖާގެ ފެންވަރުން ވަރަށްވެސް ތަފްސީލީ ޖަވާބެކެވެ. އެ ޖަވާބާއި އެކު މި މެދު އުމުރުގެ މީހާ މުޅިން ހައިރާން ކޮށްލައިފިއެވެ. 

އެ ކުއްޖާ އޭނާ އަަށް ދިން ޖަވާބުގައި ބުނަނީ އެ ކުއްޖާ ގަހަށް އަރާ އިނީ މާމަ ނަމާދަަށް ފޮނުވީމާ ކަމަށެވެ. އެ ކުއްޖާއަކީ ނަމާދު ކުރަން ދަންނަ ކުއްޖެއް ނޫން ކަމަށާއި އެހެންވެގެން މިސްކިތަަށް ނޭރީ ކަމަަށެވެ. އެ ކުއްޖާގެ މަންމައެއް އަދި ބައްޕައެއްވެސް ނަމާދު ކުރާތީ ނުދެކޭ ކަމަށާއި ނަމާދުކުރަން ނުބުނާ ކަމަށެވެ. އެހެން ބައެއް ފަހަރަށް އެ ކުއްޖާގެ މާމަ އެކުއްޖާ ކައިރި ނަމާދަށް ދާށޭ ބުނުމުން މިސްކިތް ދޮށަށް އައިސް ކޮންމެ ދުވަހަކުވެސް މި ގަހަށް އަރާ ވާހަކަ ބުންޏެވެ. އަދި ނަމާދު ކުރާ ހިތްނުވާ ކަމަށާއި އެއީ ވަރަށް ފޫހިވާ ކަމެއް ކަމަށް ބުންޏެވެ. ތިމަންނާ ބޮޑުވެގެން ވާން ބޭނުންވަނީ "ޕާޓޭ" އަކަށް ކަމަށާއި "ޕާޓޭ" އިންނަކީ ނަމާދު ކުރާ ބައެއް ނޫން ކަމަށްވެސް އެ ކުއްޖާ ބުންޏެވެ.

މި އީ އުމުރުން ގާތްގަނޑަކަށް 10 ވަރަކަށް އަހަރުވެ ފިރިހެން ކުއްޖެއްގެ ފަރާތުން އިވުނު އަޑުތަކެކެވެ. އެ ކުއްޖާގެ ފަރާތުން މި ބަސްތައް ބޭރުވާންވީ ކޮންމެވެސް ސަބަބެއް ވާނޭކަން ޔަގީނެވެ. އެ ކުއްޖާގެ ވިސްނުމުގައި މިކަންކަން ހަރުލުމުގައި އެކުއްޖާ އުޅެ ބޮޑުވި މާހައުލު ވަރަށްވެސް ބޮޑު ދައުރެއް އަދާކުރާނެއެވެ. އެކުއްޖާއަށް ގޮތް ބުނެދީ ކިޔައިދޭން ތިބޭ މީހުންގެ ދައުރުވެސް މިކަމުގައި ވާނެއެވެ. މިއީ މިހާލުގައި ހުރި އެންމެ ކުއްޖެކެވެ. މިފަދަ ކިތައްކުދިން މި މުޖުތަމައުގައި ތިބެދާނެ ހެއްޔެވެ؟ މިއީ ވިސްނަންޖެހޭ ވަރަށް ސީރިއަސް ކަމެކެވެ.