ކިޔަވާ ކޮންމެ މީހަކީވެސް ވަކި ހާއްސަ އުންމީދެއް އޮވެގެން ކިޔަވާ މީހެކެވެ. މިފަދައިން ކިޔަވާ ކޮންމެ މީހެއްގެ އުންމީދު ތަފާތުވެދާނެއެވެ. މާ މައްޗަށްކިޔެވުމަކީ އެ ކިޔަވާ އެންމެންގެ އުންމީދުތައް އެއް ހަމައެއްގައި ހުންނަން ޖެހޭނޭ ކަމެއް ނޫނެވެ. ބައެއް ފަހަރަށް ބައެއް މީހުންނަށް ހީވަނީ، ކިޔަވައިގެން މޮޅުފާސްތައް ހޯދާ މީހާއަކީ އަބަދުވެސް ކަންކަމުގައި އެންމެ މޮޅުގޮތާއި އެންމެ މޮޅު ޝަރަފު ބޭނުންވާ މީހާއެވެ. ނަމަވެސް މިއީ ކުށްހީއެކެވެ.

ބައެއްމީހުންނަކީ އެމީހުންގެ ޠަބީއަތާއި މިޒާޖުގެގޮތުން ވަރަށް "ހިތްމޮޅު" ބައެކެވެ. ހަރުދަނާ ޝަރަފުވެރި ވަޒީފާއެއް އަދާކުރުމަކީ މީހާގެ މޮޅުކަން އިތުރުވާނޭ ކަމެކެވެ. އަދި ބައެއް މޮޅު އޮފީސްތަކާއި އަގުބޮޑު ހިދުމަތްދޭ ތަންތަނުގައި ވަޒީފާއަދާ ކުރުމަކީ އެމީހެއްގެ އަބުރާއި އިއްޒަތާއި ގަދަރު މަތިވެރިވާނޭ ކަމެކެވެ. ގިނަ ތަޖުރިބާ ލިބުމާއި ބޮޑު މުސާރަ ލިބުމަކީ ދުނިޔޭގައި ހުރިހާ އުފަލެއް ހާސިލުވުން ކަމުގައި އެމީހުން ދެކެއެވެ. ގިނަފަހަރަށް މިހެން ދެކެވެނީ ހަގީގީ އުފާވެރިކަން ތަޖުރިބާ ނުކުރެވޭ މީހުންނެވެ.

ކިޔަވައިގެން މަތީ ފާސްތައް ހޯދާފައިތިބޭ ބައެއްމީހުންނަކީ އެމީހުންގެ ދިރިއުޅުމުގައި ވަރަށްވެސް ހިތްތިރި ބައެކެވެ. އެއީ ބޮޑާކަމެއް، ކިބުރުވެރިކަމެއް ހިތުގައި ނުލާ ބައެކެވެ. އެފަދަ މީހުން ކިޔަވަނީ ކޮންމެހެން މަތީ މަގާމުތަކުގެ ދަހިވެތި ކަމުގައެއް ނޫނެވެ. އެމީހުން ކިޔަވަނީ ކޮންމެހެން މޮޅު ތަންތަނުގައްޔާއި އަގުބޮޑު ހިދުމަތްދޭ ތަންތަނުގައި ވަޒީފާއަދާކުރާކަށް ނޫނެވެ. އަދި ކިއެއްތަ އެމީހުން ކިޔަވަނީކީ ކޮންމެހެން މާ ބޮޑު މުސާރައެއްގެ ދަހިވެތިކަމުގައެއްވެސް ނޫނެވެ. ނަމަވެސް އެމީހުންގެ ހުރިހާވެސް އުންމީދެއް ގުޅިފައިވަނީ ހިތްހަމަޖެހުމާއި އުފާވެރިކަމާއެވެ. އެމީހުން ކިޔަވަނީ އުފާވެރި ހިތްހަމަޖެހޭ އަބުރުވެރި ދިރިއުޅުމެއް ހޯދުމަށެވެ.

މަތީ ފާސްތަކުން ފާސްވެ މޮޅު ހުނަރުތަކުގެ ހުއްދަ ފާސް އޮންނަ ކޮންމެ މީހެއް، މޮޅު ތަނެއްގައި ވަޒީފާ އަދާ ކުރާކަށް ނުޖެހޭނެއެވެ. ކަން އޮތީ އެހެން ކަމަށް ވާނަމަ، އެ ތަބާ ވެވެވީ "ދެރަ މީހާ ދެރަވާނޭ" ބުނާ އުސޫލަށެވެ. މިފަދަ މީހަކު ދެރަ ތަނެއްގައި ނުވަތަ މާ ބޮޑު ހިދުމަތެއް ނުދާ ތަނެއްގައި މަސައްކަތް ކުރުމުގައި އެއްވެސް ގޯހެއް ނެތެވެ. އެކަމުގައި އޭނާ ހިތްހަމަ ޖެހޭނަމަ އަމުދުން އެގޮތް އޭނާއަށް މާ ރަނގަޅެވެ.

އިސްވެ ދެންނެވުނުހެން މަތީފާސްތައް ހޯދަން މީހުން ކިޔަވަނީ ހިތްހަމަޖެހޭ ދިރިއުޅުމެއް ހޯދުމަށެވެ. ބައެއް މީހުން ގިނަ ފައިސާއާއި މާލީ މުއްސަނދިކަމާއި މަޝްހޫރުކަމުން ހިތްހަމަ ޖެހޭއިރު، އަނެއްބަޔަކު ހިތްހަމަ ޖެހެނީ ގުދުރަތީ މުއްސަނދި ކަމާއި އާއިލީ ތަނަވަސް ލޯބިންނެވެ. ކޮންމެ މީހަކުވެސް އެމީހެއްގެ ނަޒަރުން އެމީހެއްގެ އުފާވެރިކަން ހޯދާނެއެވެ. އެކަމުގައި އެހެންމީހުން އޭނާއަށް ގޮތްކިޔާ ބުނެދޭކަށް ނޭނގޭނެއެވެ. އާދޭހެވެ! ކޮންމެ މީހަކުވެސް ކިޔަވާ މޮޅުވެ، މަތީ ފާސްތަކާއި ހުނަރުތަކުގެ ހުއްދަ ފާސްތައް ހޯދަނީ އުފާވެރި ދިރިއުޅުމެއް އަދައިގެންނެވެ. އޭނާގެ ދިރިއުޅުން އޭނާ ބައްޓަން ކުރާނެއެވެ. ކިޔަވާ މޮޅު މީހަކަށް ވުމީ ކޮންމެހެން "މޮޅު" މަގާމެއްގައި މީހާ ހުންނަށް ޖެހޭނޭ ސަބަބެއް ނޫނެވެ. އެހެންކަމުން މިކަމުގައި ދެންތިބި މީހުން ބަހާއި ގޮތް ނުކިޔާ އެމީހެއްގެ އުފާވެރި ހަޔާތް އެމީހަކު ބޭނުން ގޮތަކަށް ތަރުތީބު ކުރާށެވެ.