އިންސާނާގެ ހަށިގަނޑުގެ ކޮންމެ ގުނަވަނަކީވެސް އޭގައި ވޭން އަޅާފާނޭ ގުނަވަނެކެވެ. އެގޮތުން ބައެއް މީހުންނަކީ އެމީހުންގެ އަތުގެ ކުޑަހުޅުގައި ރިހޭތީ އެކަަމާއި ޝަކުވާކުރާ މީހުންނެވެ. އިންސާނާގެ އަތަކީ އެންމެ ގިނައިން ބުރަ އަދި ބަރު މަސައްކަތްކުރާ އެއް ގުނަން ކަމުގައި ވެދާނެއެވެ. އެހެންކަމުން އަތުގެ ކުޑަހުޅުގައި ރިހޭނަމަ އެއީ އާންމު ދިރިއުޅުމުގައި ކުރާ އެތައް ކަމަކަށް އޭގެސަބަބުން އުނދަގޫ ކުރުވާނޭ ކަމެކެވެ. އެހެންކަމުން މި ލިޔުމުގައި މި ބަލައިލަނީ އަތުގެ ކުޑަހުޅަށް ތަދުވެ ނުވަތަ ރިހިދާނޭ ސަބަބުތަކަށެވެ.
އަތުގެ ކުޑަހުޅުގައި ރިހިދާނޭ ބައިވަރު ސަބަބުތައް ހުރެއެވެ. އޭގެތެރެއިން އެންމެ އާންމު ސަބަބުތައް ކަމުގައި ވާނީ ކުޑަހުޅަށް ލިބޭ އަނިޔާއެވެ. އެއީ ކުޑަހުޅުގެ ކަށިގަނޑަށް ނުވަތަ މަޑުކަށިގަނޑަށް ނުވަތަ ކުޑަހުޅާއި އަތުގެ މަސްތައް ގުޅުވައިދޭ ޓެންޑަންޓަށް ލިބޭއަނިޔާއެވެ. ކަށިގަނޑުގައި ރެނދުލުމާއި ޓެންޑަންޓަށް ވާން ވުންހިމެނެއެވެ. އާންމުގޮތެއްގައި މިހެން ދިމާވާނީ ލިބޭ ކޮންމެވެސް އަނިޔާއެއްގެ ސަބަބުންނެވެ.
އަތުގެ ކުޑަހުޅަށް ލިބޭ މިފަދަ އަނިޔާތަށް މެދުވެރިވާ އެއް ސަބަބަކީ ކުއްލި ގޮތަކަށް ހުޅަށް އަންނަ ބާރު ގުޑުމެކެވެ. މިފަދަ ގުޑުމެއްގެ ސަބަބުން ކަށިގަނޑުގައި ރެނދުލާ ބިނދި ނުވަތަ ހުޅުން ނެއްޓޭގޮތް ވެދާނެއެވެ. ދެވަނަ ސަބަބަކީ އަތުގެ ކުޑަހުޅު ކޮންމެވެސް އެއްކޮޅަކަށް މާ ބޮޑަށް ލެނބުން ނުވަތަ އެނބުރުމުގެ ސަބަބުން އިސްވެ ދެންނެވުނު ޓެންޑަންޓުތަކަށް މާ ބޮޑަށް ވާން ވުމުގެ ސަބަބުން އެ ޓެންޑަންޓުތަކަށް ލިބޭ އަނިޔާއެވެ. ސިއްހީ މާހިރުން ފާހަގަ ކުރައްވާ ގޮތުގައި ތަކުރާރުކޮށް ގިނަ ވަގުތުތަކެއް ވަންދެއް ހުއްޓުމެއްނެތި އެއް ހަރަކާތެއް، އަތުގެ ކުޑަހުޅުން ކުރެވޭނަމަ އެއީވެސް މިދެންނެވި ޓެންޑަންޓްތަކަށް އަނިޔާ ވެދާނޭ ސަބަބެކެވެ. ކައްޓަށް ލިބޭ އަނިޔާ އެކްސްރޭ ނެގުމުން ފެނުނު ނަވެސް ޓެންޑަންޓަށް ލިބޭ އަނިޔާ އެފަދައަކުން ނުފެންނާނެއެވެ. އަދި މަޑުކަށި ނުވަތަ ލިގަމެންޓަށް ލިބިފައި ހުންނަ އަނިޔާވެސް އެކްސްރޭއަކުން ނުފެންނާނެއެވެ.
ރާއްޖެބައްޔަކީވެސް މިފަދައިން އަތުގެ ކުޑަހުޅަށް ވޭން އިހުސާސްކުރުވާނޭ ކަމެކެވެ. އެހެނީ ރާއްޖެބަލީގައި ކަށި ބަލިވުމާއި ކަށި ފީވުމުގެ ސަބަބުން މަޑުކަށިތައް ގޭނި ހަލާކުވާގޮތް ދިމާވެއެވެ. އެއާއި އެކު ދެ ކަށިގަނޑު ގޭނި ހުޅުތެރޭގައި ތަދު އުފެދޭނެއެވެ. މީގެ އިތުރުން ހުޅުގައި ހުންނަ ލޮނދި ހިކޭގޮތްވެ ހުޅުގެ މަސައްކަތުގައި ކަށިގަނޑަށް އަނިޔާވެ ތަދު އިހުސާސް ކުރެވޭނެއެވެ.
އަތުގެ ކުޑަހުޅަށް ޖެހޭ ކަރޕަލް ޓަނަލް ސިންޑްރޮމް ނަމަކަށް ކިޔާ ބައްޔެއްގެ ސަބަބުންވެސް ހުޅުތެރޭގައި ރިހުން ހުރެދާނެއެވެ. މިބައްޔަކީ އަަތް ތިލައަށް ގޮސްފައި އިންނަ ހިއްސުދެނެގަންނަ ނާރު (މީޑިއަން ނާވް) ގެ ޕުރެސަރު މަތިވުމާއި އެކު، ހުޅުގެ ހަރަކާތްތަކާއި އެކު ހުޅާއި ދިމާލުން އުފެދޭ ތަދެކެވެ. މިއީ އެއްވެސް ހާލެއްގައި ހުޅަށް ލިބޭ ނުވަތަ ލިބުނު އަނިޔާއަކާއި ގުޅުވައިގެން އުފެދޭ ތަދެއް ނޫނެވެ. ހަމަ އެފަދައިން ގެންގްލިއަން ސިސްޓް ނަަމަކަށް ކިޔާ ބައްޔަކީވެސް މިފަދަ ބައްޔެކެވެ. މިބަލީގައި އަތުގެ ކުޑަހުޅުގެ މަތީގައި ކުޑަ ސިސްޓެއް އުފެދެއެވެ. މި ސިސްޓުގެ މޫތަށް ނުވަތަ ނާރުތައް ހުޅުގެ ތެރެއަށް ފޯރަން ފެށުމުން ހުޅުގައި ރިހޭގޮތް ވާނެއެވެ.
ކިއެންބޮކްސް ޑިޒީސް ނަމަކަށް ކިޔާ ބައްޔަކީ އަތްތިލައިގައި ހުންނަ ކުދި ކުދި ކަށިކޮޅުތަކުން ކަށިކޮޅަކަށް ލެޔާއި އެހެނިހެން މާއްދާތަށް ނުލިބުމުގެ ސަބަބުން އެ ކަށިކޮޅު "މަރުވުމުން" ދިމާވާ ކަމެކެވެ. މި ބަލީގައި ވެސް އަތުގެ ކުޑަހުޅުގައި ރިހޭނެއެވެ.
މި ބަލާލެވުނީ އަތުގެ ކުޑަހުޅުގައި ރިހިދާނޭ ސަބަބުތަކަށެވެ. މީގެ އިތުރަށްވެސް އަދިވެސް އެހެން ސަބަބުތައް ވާނެއެވެ. ނަމަވެސް މިއީ އާންމު ސަބަބުތަކެވެ. އެކި ކަންކަމަށް އެކި ފަރުވާ ހުންނަ އިރު އެންމެ މޮޅު ގޮތަކީ ޑަކްޓަރެއްގެ އެހީތެރިކަން ހޯދުމެވެ. ގޭގައި ނަމަ އައިސް ބޭނުން ކުރުމުން ކޮންމެވެސް ވަރެއްގެ ލުޔެއް ލިބޭނެއެވެ.