ކޮންމެ މާ ބަގީޗާއެއްގައިވެސް ތަފާތު މާތައް ވާނެއެވެ. އެއިން ކޮންމެ މަލެއްގައި ތަފާތު ކުލަޔަކާއި ތަފާތު ވަހެއް އެކުލެވިގެން ވާނެއެވެ. އަދި ކޮންމެ މަލެއް ވަކި ހާއްސަ ގަހެއްގައި އިންނައިރު ކޮންމެ މަލެެއްގެ ސިފަޔާއި ބައްޓަންވެސް ތަފާތުވާނެއެވެ. މިއީ އިންސާނުން އާބާދުވެފައިވާ މުޖުތަމައެއްގެވެސް މިސާލެވެ.

މާ ބަގީޗާއެއްގައި ފަރިވެ ފޮޅިފައިވާ ކޮންމެ މަލަކީ އެ ބަގީޗާއަށް ފުރިހަމަކަމާއި ތާޒާކަން ގެނުވާނޭ މަލެކެވެ. ނަމަވެސް މި އަމިއްލަ އެދުން ބޮޑު އިންސާނާއަށް އެ މާ ބަގީޗާއިން ކަމުދާނީ ނުވަތަ ޝައުގުވެރިވާނީ އެ މާ ބަގީޗާގައި އިންނަ އެންމެ ރީތި މަލަށެވެ. އެންމެ ކުލަ ގަދަ، އޭގެ ފިޔަތައް ރީތި މަލެކެވެ. އެއީ އިންސާނީ ޠަބީއަތެވެ. ނަމަވެސް ވިސްނައިފި ކޮންމެ މީހަކަށްވެސް އެނގޭނޭ ހަގީގަތަކީ، އެ މާ ބަގީޗާގައި އިން އެންމެ މޮޅު އަދި އެންމެ ކަމުދާ މަލަކަށް ވާނީ އެމަލެއްގައި އެންމެ ވަސްގަދަ މަލެވެ.

އާދޭހެވެ! އެހެނީ އެ މަލުގެ ވަހުން، މުޅި މާ ބަގީޗާ އެއްވަސް ކުރުވާނެތީއެވެ. އެފަދަ އެންމެ މަލެއް، ބޮޑު ބަގީޗާއެއްގައި އިން ނަމަވެސް މީރުވަސް މުޅި ބަގީޗާގައި ދުވާނެއެވެ. ނަމަވެސް ކުލަގަދަ، ފިޔަ ރީތި އެންމެ މަލެއް އިންނަ ނަމަ މާ ބަގީޗާގައި އެބުނާ ރީތިކަމެއް ނުހުންނާނެއެވެ. އެވާނީ އައިބު ކަމަކަށެވެ.

މަލެއްގައި ހުންނަ ރީތި ކުލަ އާއި ފިޔަތަކުގައިވާ ރީތި ބައްޓަމަކީ އިންސާނާ ލޯ މަރާލުމުން ގެއްލިދާ އެއްޗެކެވެ. އިންސާނާ އެމަލަކަށް ފުރަގަސްދީ އެނބުރިލާ ކޮންމެ ފަހަރަކު ގެއްލޭނޭ އެއްޗެކެވެ. އަދި ކިއެއްތަ ގިނަ ދުވަސްވުމުން އޭގެ ކުލަ މިލާ، ފިޔަތައް މޯޅިވެދާ ހުއްޓެވެ. އެދުވަހުން އެމަލުގެ ރީތިކަން މުޅިން ގެއްލި ދެއެވެ. އެދުވަހުން އެމަލަށް ޝައުގުވެރިވާ އަދި ގަޔާވާ މީހަކު ނުހުންނާނެއެވެ. އެ މާ ދެކެ ފޫހިން އެމާ އެއްލައިލާނެއެވެ. މިއީ ދުނިޔޭގައި ތަމްސީލުވަމުންދާ ހަގީގަތްތަކެވެ.

މަލެއްގައި މީރު ވަހެއް ދުވާނަމަ އެއީ އެމަލަކަށް ލިބިފައިވާ ވަރަށްވެސް ބޮޑު ކާމިޔާބީއެކެވެ. އެ މަލަކީ މާ ކުލަ ގަދަ ފިޔަތަކެއް ލިބިފައިނުވާ ކުލަ ފަނޑު މަލަކަށް ވިޔަސް މެއެވެ. އަދި އެމަލަކީ މާ ބައްޓަން ރީތި ފިޔަތަކެއް ލިބިފައިނުވާ މަލަކަށް ވިޔަސް މެއެވެ. އެ މަލުގައި ދުވާ ވަހަކީ ފަސޭހައިން ފިލާ ދަނިވި އެއްޗެއް ނޫނެވެ. އިންސާނާ ލޯ މަރާލި ކަމުގައި ވީނަމަވެސް، ނުވަތަ އެ މަލަށް ފުރަގަސްދީ އެނބުރިލަން ޖެހުނު ނަމަވެސް އެ މަލުގެ ވަސް އެއިންސާނާގެ ނޭފަތުގައި ހުންނާނެއެވެ. އަދި ކިއެއްދަ ގިނަ ދުވަސްވެ، މާ ވަޅޯވެ ހިކެމުން ދިޔަނަމަވެސް އެ މަލުގެ ވަސް ހުންނާނެއެވެ. އަދި އެމާ އެއްކޮަށް ހިކި، އެމާ ނެތި ދިޔަސް، އެ މާ ގެންގުޅުނު ސަރައްދުގައި އެވަސް ހަރުލާ ހުރެއެވެ. މިއީ އިންސާނާގެ ބުއްދިއަށް ގަބޫލު ކުރެވޭ ސައްހަ އަގީދާއެކެވެ. ނަމަވެސް އިންސާނާގެ ހިތައް ކުޅަދާނައީ ބޭރުފުށުގެ ރީތިކަން ހޯދައިގަންނާށެވެ. އެތެރޭގެ ރީތިކަން ހޯދުމުގައި މި ހުޝިޔާރު އިންސާނާ ގިނަފަހަރަށް ނުކުޅެދެއެވެ.

އިންސާނުން އޭނާގެ ހަޔާތުގެ ބައިވެރިއާ އަކަށް އިހްތިޔާރު ކުރަނީ ރީތި ބައިވެރިއެކެވެ. އެ ބައިވެރިޔާގެ އަހުލާގަށް، އުޅުމަށް މިޒާޖަށް ބަލައިލަނީ މަދު މީހެކެވެ. އާދޭހެވެ! ބޭރުފުށުގެ ތީރި ކަމަށްވުރެ އިންސާނާގެ އެތެރޭގެ ރީތިކަން (އަހުލާގު)، އިންސާނާގެ ސިފަކިޔުމުގައި އިސްކުރަން ޖެހޭނެއެވެ. ބާއްޖަވެރި ހަޔާތެއް ހޭދަކުރެވޭނީ "ވަސްމީރު" މަލެއް އިހްތިޔާރުކޮށްގެންނެވެ. "ކުލަ ގަދަ، ބައްޓަން ރީތި" މަލަކުން ލިބޭނީ ވަގުތީ ހިތްހަމަ ޖެހުމެކެވެ.