ނިންޖަކީ ކޮންމެ އިންސާނެއްގެވެސް ހަޔާތުގައި ވަރަށް މުހިންމު އަސާސީ ކަމެއް. އެގޮތުން އިންސާނުން އާންމުގޮތެއްގައި ނިދާ އުޅެނީ ރޭގަނޑު. މިގޮތަށް އިންސާނާ ނިދާފައި އޮންނަ ވަގުތު ހުވަފެނޭ ކިޔާ ހިޔާލުތަކެއް އިންސާނާގެ ސިކުނޑީގައި ތަމްސީލުވޭ. މިހެން ފެންނަ ހުވަފެންތަކަކީ އޭގަައި ގަބޫލުކުރަން އުނދަގޫ އެތައްކަމެއްވެސް ހިނގާފާނޭ ކަމެއް. އަނެއްބައި ފަހަރަށް ހަގީގަތާއި ދާދި އެއްގޮތް ނުވަތަ ހަގީގީ ކަންކަން ވެސް ދިމާވޭ. އަދި ހުވަފެނުގައި ފެންނަ ކަންކަން ބައެއްމީހުނަށް ދިމާވެފައިވެސް ހުރޭ.

ކޮންމެއަކަށް ހުވަފެނަކީ ބިލާހެކޭ ބުނާތީ އަޑުއިވޭ. މިއީ އަހަރެމެން ގަބޫލުކޮށް ތަބާވާން ކޮންމެހެން ޖެހޭ އެއްޗެއް ނޫން. އިންސާނާއަށް ފެންނަ ހުވަފެނަކީ އެ އިންސާނަކު ހޭލުމުންވެސް ހަނދާން ހުންނަ އެއްޗެއް. އެގޮތުން އާންމުކޮށް މިހެން ފެންނަ ހުވަފެނެއް، ހަނދާން ހުންނަނީ އެ ހުވަފެނެއްގެ ކިތައް އިންސައްތަކަން ދެނަހުރީމުތަ؟

ދިރާސާވެރިން ދެކިލައްވާގޮތުގައި އިންސާނަކަށް ނިދީގައި ފެންނަ ހުވަފެނެއް، އޭނާ ހޭލެވުމަށްފަހު ހަނދާން ހުންނާނީ އެ ހުވަފެނެއްގެ 50 އިންސައްތަ. އަނެއް 50 އިންސައްތަ އިންސާނާގެ ހަނދާނަކު ނުހުންނާނެ. އަދި ކިތަންމެ ވަރަކަށް ވިސްނިޔަސް އެއީ ހަނދާންވާނޭ ކަމެއް ނޫން.

ބައެއްފަހަރަށް އިންސާނާއަށް ދިމާވާ ކަމަކުން، އެއީ މީގެ ކުރިންވެސް ތިމާއަށް ދިމާވެފައިވާ ކަމެކޭ ހީވާ ހާލަތްތަކެއް ދިރިއުޅުމުގައި އަތުވެދާނެ. ބައެއްފަހަރަށް ދުނިޔެމަތީގައި ދިމާވާކަމެއް، އެއީ އޭގެ ކުރިން ނުވަތަ މާކުރިން ފެނިފައިވާ ހުވަފެނަކާއި އެއްގޮތް ނުވަތަ އެއްކަލަ ކަމެއްނަމަ އިސްވެ ދެންނެވުނު އިހުސާސް ކުރެވިދާނެ. ނަމަވެސް އެއީ ކޮން ކަމެއްކަން ހަނދާން ނުވެދާނެ. އެއީ ހުވަފެނުގެ 50 އިންސައްތަ ހަނދާން ހުންނާތީ އެކަން ދެނެގަންނަން އުނދަގޫވަނީ. ބައެއް މީހުން ހުވަފެން ކިޔައިދޭ ގޮތުން ވަރަށް ސާފުކޮށް އޭނާ އެ ހުވަފެން ހަނދާން ހުއްޓޭ ހީވާ ފަހަރުވެސް އާދޭ. އެހެނަސް ގިނަ ފަހަރަށް، އާންމުކޮށް ހަނދާނުގައި ހުންނާނީ އޭގެ 50 އިންސައްތަ.