ހަޔާތުގެ ބައިވެރިޔާއަކީ ތިމާ އާއިއެކު، ތިމާގެ ހަޔާތުގެ ބާކީ ދުވަސްތައް ހޭދަކުރާނޭ ބައިވެރިޔާއެވެ. ކޮންމެ އިންސާނެއްވެސް ކައިވެންޏެއް ނުކޮށް ހުންނަ ދުވަސްވަރު އެއީ ޒާތެއްގެ މިނިވަނެކެވެ. ނަމަވެސް މީހަކާއި އިނދެ ޒަވާޖީ ހަޔާތެއް ފެށޭ ހިސާބުން ކޮންމެ އިންސާނަކީވެސް ކޮންމެވެސް ވަރެއްގެ ހިފެހެއްޓުމެއްގައި ގައިދުވާނޭ މީހެކެވެ. އެހެނީ އޭނާގެ ބޮލުގައި އެޅޭ ޒިންމާތަކެއްގެ ސަބަބުންނެވެ.

ކައިވެންޏަކީ އަންހެނަކާއި ފިރިހެނަކާއި ދެމެދުގައި ވެވޭ ވަރަށް މަތިވެރި، ގަދަރުވެރި އެއްބަސްވުމެކެވެ. ގުޅޭ ވަރަށް ވަރުގަދަ ގުޅުމެކެވެ. މިއީ ކުޅިވަރަކަށް ސަކަރާތަކަށް ކުރެވޭވަރަށްވުރެ ބޮޑު، "މުގައްދަސް" ކަމެކެވެ. އެ ސަބަބަށްޓަކައި ކައިވެރި ރޫޅި ދިއުމަކީ މާތް ﷲ ރުހިވޮޑިގެންވާ ކަމެއް ނޫނެވެ. އިސްލާމްދީނުގެ ބޮޑެތި އިލްމުވެރިން ވިދާޅުވާގޮތުގައި މާތް ﷲ ހުއްދަކުރައްވާފައިވާ ކަންތައްތަކުގެ ތެރެއިން އެކަލާންގެ އެންމެ ގަބޫލުވެވޮޑިގެން ނުވާ ކަމަކީ ވަރިއެވެ. އެހެންކަމުން ކައިވެނި ވެވޭ އަންހެނާއާއި ފިރިހެނާ، އެ ކައިވެނި ދެމެހެއްޓުމަށްޓަކައި ވަރަށްވެސް ބުރަކޮށް މަސައްކަތް ކުރަންވާނެއެވެ. ކެތްތެރިކަމާއި ހިތްވަރުގެ މަތީގައި ސާބިތުވާން ވާނެއެވެ.

ގިނަފަހަރަށް ކައިވެނިތައް ރޫޅިފައި ހުންނަނީ ފިރިހެންމީހާގެ ސަބަބުންނެވެ. ނަމަވެސް މިޒަމާނުގައި އަންހެނުންގެ ސަބަބުންވެސް ކައިވެނިތައް ރޫޅޭލެއް މަދެއް ނޫނެވެ. ކޮންމެމީހެއްގެ ފަރާތުން ސަބަބު އުފަންވި ނަމަވެސް ވަރިނުކޮށްވޭތޯބެލުން ވަރަަށްވެސް މުހިންމެވެ. އިންސާނާ ހައްދަވާ އިންސާނާގެ ހަށިގަނޑުގައި އިހުސާސްތަކާއި ޝުއޫރުތައް ލެއްވެވީ މާތް ﷲ އެވެ. އެއާއި އެކު އެކަލާންގެ ފުރިހަމަކުރެއްވި އިސްލާމް ދީނުގައި ކައިވެނި ކުރުމުގައި އަންހެނުންނާއި ފިރިހެނުން ބަލަންވީ ސިފަތަކެއް ވަނީ ބަޔާންކުރައްވާފައެވެ. އެގޮތުން ކައިވެނީގެ ބައިވެރިޔަކު އިހްތިޔާރު ކުރުމުގައި ބަލަންވީ ކަންތައްތައް ބަޔާން ކުރައްވާ، އަނބިންނަށް އެންމެ އޯގާތެރި ފިރިމީހާ، ރަސޫލާ މުޙައްމަދު ﷺ ހަދީޘް ކުރެއްވި ބަސްފުޅުގައި ހަތަރު ކަމެއް ވަނީ ބަޔާންކޮށްދެއްވާފައެވެ.

އެ ހަތަރުކަންތަކުގެ ތެރޭގައި ހިމެނެނީ އޭނާގެ ދީންވެރިކަމާއި، ރީތިކަމާއި، މާލީ ތަނަވަސްކަމާއި އަދި ހަސަބެވެ. ބާއްޖަވެރިކަން އޮތީ ދީންވެރިކަމަށް އިސްކަން ދީފި މީހަކަށްކަންވެސް އެ ހަދީޘްފުޅުން އެނގެން އޮވެއެވެ. މިއިން ކޮންމެ ކަމެއްގައިވެސް ފޮރުވިފައިވާ އެތައް ހިކުމަތްތަކެއް ވާނެއެވެ. މާލީ ތަނަވަސްކަމަށް ބެލުމަކީ ހަމައެކަނި މުދާވެރި ބައިވެރިއަކު އިހްތިޔާރު ކުރުމެއް ނޫނެވެ. ކޮންމެ ފެންވަރެއްގެ މީހަކުނަމަވެސް އެއީ އޭނާގެ ހާޖަތްތައް އެނގި ދަސްވުމަށް އޮތް ވަރަށް ތަނަވަސް މަގެކެވެ. ހަސަބަކީ އޭނާ ނިސްބަތްވާ އާއިލާއެވެ. އާއިލީގޮތުން ގާތް މީހުންނާއި ކައިވެނި ކުރުމުން، އެމީހުންނަށް ލިބޭ ދަރިންނަށް އެންމެ ފުރިހަމަ ސިއްހަތެއް ލިބުމަށް ދަތިވާކަމަށް އަދުގެ ސައިންޓިސްޓުން ބުނެއެވެ. އެހެނީ އާއިލީ ޖެނެޓިކްސް އެއްގޮތްވާލެއް ބޮޑުކަމުންނެވެ. 

އާދޭހެވެ! ރީތި ކަމަކީވެސް ދޫކޮށްލެވެން އޮތް ޝަރުތެއް ނޫނެވެ. ރީތިކަމުގެ މާނައިގައި އިލްމުވެރިން މީހާގެ ހަށިގަނޑުގެ ރީތިކަމާއި އަހުލާގުގެ ރީތިކަން ފާހަގަ ކުރައްވައެވެ. އެހެންކަމުން މިއީ ކޮންމެ މީހަކުވެސް ސަމާލުކަން ދޭންވާނޭ ވަރަށް މުހިންމު ދެ ކަމެވެ. ދީނީގޮތުން ހޭލުންތެރި، ދީންވެރި ބައިވެރިއަކު އިހްތިޔާރުކޮށްފިނަމަ ކަންބޮޑުވާންވީ އެއްވެސް ކަމެއް ނޯންނާނެއެވެ. ނަމަވެސް ހަނދާނުގައި ބަހައްޓަންވީ މުހިންމު އެއް ކަމަކީ ދީންވެރި ބައިވެރިއަކު ތިމާއަށް ލިބޭނީ ތިމާވެސް ދީންވެރި ވެގެންނެވެ. އެހެނީ އަނެކާއީ ދީންވެރި މީހެއް ނަމަ، އޭނާވެސް އިހްތިޔާރު ކުރާނީ ދީންވެރި މީހެއްކަމެވެ. ދީންވެރި މީހަކަށް ވުމަކީ ދީނީ އިލްމުވެރިއަކަށް ވުމެއް ނޫނެވެ. ދީންވެރި ވުމަކީ ދީނުގެ ވާޖިބުތަކަށް ފަރުވާތެރިވެ ދީނީ ކަންކަމަށް ޝައުގުވެރިވުމެވެ.

ކަން މިހެން ހުރުމާއި އެކު މި ސަބަބުތަކަށް ވިސްނައިފިނަމަ، ނުވަތަ ވިސްނައިގެން ބައިވެރިއަކު އިހްތިޔާރު ކުރާނަމަ، ވަރީގެ ނިސްބަތް ހަމަ ގައިމުވެސް މަދުވާނެއެވެ. އިސްލާމްދީނުގެ އެވެނި މިވެނި ކަމެއް، އެވެނި މިވެނި އުސޫލަކުން ކުރަނަ އަންގަވާފައިވާނީ ހަމަ ގައިމުވެސް އެކަންކަމުގައި އެތައް ހިކުމަތްތަކެއް ވާތީއެވެ.