ގުޅިގެން ކަމަށް ދެކިގެން އެތާ، ތިއްބަސް ތިބީ ބައިބައި ވެފާ

ފުޅި ބައްތިއެއް ނިވުނަސް އެތާ، އެވެރިން ތިބީ ރުޅިގަދަ ވެފާ

 

ކުޅިފަސް ލިބުން އަމުދުން ނުވާ، ތީ ފާޅުގައި ނަފްރަތު ވެފާ

ކުޅި ރަހަ ނުލާތީ ބޯކިބާ، އެއްލައިލިއޭ ކަންބޮޑު ވެފާ

 

ގުޅިގެން އުޅޭނީ ކިހިނަކުން، ލޯބީގަ ފެށި ސަފުހާ އަކަސް

މުޅި އުމުރުގާ ޖެހުމުން އުޅެން، އަމުދުން ތިބީ ފޫއްސެއް ވެފާ

 

ހުޅިއެއް ފަދައިން ފަން ބަނދެވިފާ، ލޯބީގެ ހުޅި އޮތަކަސް އެތާ

ހުޅި ލައިފިއޭ ބޮއްސުން އެކީ، ލޯބީގެ ފަންތައް ރޫޅިފާ

 

ކުޅިބައިގެ ފުއްތައް ހަމަވިޔަސް، ކުރިއަށް ކުޅެން ހަމަ ނޭނގުމުން

މުޅިގަނޑު އެކީ ނިންމަންޖެހޭ، ސައިވެން އެތާ ގޮތްހުސް ވެފާ

 

ގުޅިއެއް ފުރާ ފައިސާ އޮތަސް، މުޅި ދުނިޔެވެސް ހިތަކަށް އޮތަސް

ގުޅިގެން އުޅެން ނޭނގެންޏަކާ، އެވެރިން ވަނީ ހަމަ ވަރި ވެފާ