ސެރެބްރަލް ޕަލްސީ އަކީ ސިކުނޑީގައި ހުންނަ އުނިކަމެއްގެ ސަބަބުން ކުރިމަތިވާ ޖިސްމާނީ ނުކުޅެދުންތެރިކަމެކެވެ. މި ނުކުޅެދުންތެރިކަމުގެ ސަބަބުން ހަށިގަނޑުގެ މަސްތައް ހަރުވެ، ހެލިފެލިވެ އުޅުމަށާއި، ހަށިގަނޑު ބެލެންސްކުރުމަށާއި، ހަށިގަނޑު ސީދަލަށް ބެހެއްޓުމަށް ދަތިވެއެވެ.

ސެރެބްރަލް ޕަލްސީ އަކީ ނިއުރޯ ޑިވެލޮޕްމަންޓް ޑިސްއޯޑަރއެކެވެ. ނިއުރޯ ޑިވެލޮޕްމަންޓް ޑިސްއޯޑަރއެކޭ ބުނެވޭ ބަހުގެ މާނަ އަކީ ތުއްތުކުދިންގެ އުމުރާ ގުޅިގެން، އެކުދިންގެ ހެލިފެލިވުމާއި، ހަރަކާތްތަކަށް އަންނަން ޖެހޭ ކުރިއެރުން ނައިސް މާ ބޮޑަށް ލަސްވެގެން ދިޔުމެވެ. އެގޮތުން މި ބަލި ހުންނަ ކުދިންގެ އާންމު ހަރަކާތްތައް (އިށީނުން، ފިރުކުން، ހަފައިގެން ކެއުން، ވާހަކަދެއްކުން) މި އުމުރުގެ އެހެން ކުދިންނާ އަޅާ ބަލާއިރު ވަރަށް ބޮޑަށް ލަސްވެގެން ދެއެވެ.

ސެރެބްރަލް ޕަލްސީގެ ވައްތަރުތައް.

ސެރެބްރަލް ޕަލްސީގެ މައިގަނޑު 4 ވައްތަރެއް ހިމެނެއެވެ. އެއީ ސްޕާސްޓިކް ސެރެބްރަލް ޕަލްސީ، ޑިސްކިނެޓިކް ސެރެބްރަލް ޕަލްސީ، އޭޓެކްސިކް ސެރެބްރަލް ޕަލްސީ އަދި މިކްސްޑް ސެރެބްރަލް ޕަލްސީ އެވެ.

ސްޕާސްޓިކް ސެރެބްރަލް ޕަލްސީ އަކީ ހަށިގަނޑުގެ މަސްތައް ހަރުވެފައި ހުރުމެވެ. މިއީ މި ބަލީގެ އެންމެ އާންމު ވައްތަރެވެ. މި ބަލި ތަހައްމުލުކުރާ މީހުންގެ 80 އިންސައްތައަކީ ސްޕާސްޓިކް ސެރެބްރަލް ޕަލްސީ ހުންނަ މީހުންނެވެ. މީގެ ތެރެއިން ބައެއް މީހުންނަކީ ގައިގެ ހުރިހާ މަސްތަކެއް ހަރުވެ، އެއްވެސް ވަރަކަށް ހަރަކާތް ނުކުރެވޭ މީހުންނެވެ. އަނެއްބައި މީހުންނަކީ ހަށިގަނޑުގެ ވަކި ގުނަވަންތަކެއްގެ މަސްތައް ހަރުވެ، އެ ގުނަވަނަކުން ކުރާ ހަރަކާތްތައް ނުކުރެވޭ މީހުންނެވެ. އެގޮތުން ބައެއް މީހުންގެ ދެ ފައި ނުވަތަ ދެ އަތް ނުވަތަ ހަތަރެސްފައިގެ މަސްތައް ހަރުވެފައި ހުރެއެވެ.

ޑިސްކިނެޓިކް ސެރެބްރަލް ޕަލްސީ އަކީ ހަށިގަނޑުގެ ހަރަކާތްތައް ކޮންޓްރޯލް ކުރަން އުނދަގޫވުމެވެ. މިފަދަ މީހުންނަށް ކޮންމެ ދުވަހެއްގެ ދިރިއުޅުމުގައި އާންމުކޮށް ކުރާ ކަންކަން ކުރުމަށް ވެސް އުނދަގޫވެއެވެ. އެގޮތުން ހަށިގަނޑު ބެލެންސް ނުކުރެވިގެން ކޮޅަށް ހުރުމަށް ދަތިވެއެވެ. މުޅި ހަށިގަނޑު ނުވަތަ ހަށިގަނޑުގެ ބައެއް ގުނަވަންތައް ތުރުތުރުއަޅައި، އެ ގުނަވަނަކުން ކުރާ ހަރަކާތްތަކަށް ހުރަސްއެޅެއެވެ. ދެއަތުގެ ހަރަކާތްތައް ކޮންޓްރޯލް ނުކުރެވި ތުރުތުރުއަޅާ އިރު ފެން ތަށްޓެއްގައި ހިފާނެހާ ވަރު ވެސް އަތަކު ނުހުރެއެވެ.

އޭޓެކްސިކް ސެރެބްރަލް ޕަލްސީ އަކީ ހަށިގަނޑު ބެލެންސްކުރުމަށް އުނދަގޫވުމެވެ. އަމިއްލަ ހަށިގަނޑުގެ ބެލެންސް އަމިއްލައަށް ނުހިފެހެއްޓުމެވެ. މި ޙާލަތު ކުރިމަތިވުމުން ވެސް ކޮޅަށް ތެދުވެ ހުރުމާއި، ހިނގާބިނގާވެ އުޅުމަށް އުނދަގޫވެއެވެ.

މިކްސްޑް ސެރެބްރަލް ޕަލްސީ އަކީ ސްޕާސްޓިކް ސެރެބްރަލް ޕަލްސީ އާއި ޑިސްކިނެޓިކް ސެރެބްރަލް ޕަލްސީ އެއްވެފައި ހުރުމެވެ. އެއީ ހަށިގަނޑުގެ މަސްތައް ހަރުވުމާ އެކު ހަށިގަނޑުގެ ހަރަކާތްތައް ކޮންޓްރޯލް ކުރަން އުނދަގޫވުމެވެ.

މި ނުކުޅެދުންތެރިކަން ކުރިމަތި ވަނީ ކީއްވެ؟

މި ނުކުޅެދުންތެރިކަން ކުރިމަތިވާކަމަށް ފާހަގަ ކުރެވޭ އެންމެ މައިގަނޑު ސަބަބަކީ ކޮންމެ ވެސް ކަމަކާ ގުޅިގެން ކުއްޖާގެ ސިކުނޑިއަށް ގެއްލުންވުމެވެ. އެގޮތުން މައިމީހާގެ ބަނޑުގައި ކުއްޖާ އަށަގަންނަ އިރު ކުއްޖާގެ ސިކުނޑީގައި އުނިކަމެއް ހުރުމާއި، ސިކުނޑި ރަނގަޅަށް ނުއުފެދި ނުވަތަ ރަނގަޅަށް ފުރިހަމަ ނުވެ ހުންނަ ޙާލަތްތައް މެދުވެރިވުމުން މި ނުކުޅެދުންތެރިކަން ކުރިމަތިވެއެވެ. އަދި ކުއްޖާ ދުނިޔެއަށް އުފަންވުމަށްފަހު ފުރަތަމަ 4 ހަފުތާގެ ތެރޭގައި ކުއްޖާގެ ސިކުނޑިއަށް ލިބޭ ގެއްލުމެއްގެ ސަބަބުން ވެސް ސެރެބްރަލް ޕަލްސީ ކުރިމަތިވެދާނެއެވެ. މިގޮތަށް ލިބޭ ގެއްލުމުންތަކުގެ ތެރޭގައި ސިކުނޑިއަށް އަނިޔާވުން ނުވަތަ ސިކުނޑިއަށް ބޭނުންވާ ވަރަށް އޮކްސިޖަން ނުލިބުން ހިމެނެއެވެ. މީގެ އިތުރުން ކުއްޖާގެ އުމުރުން 28 ދުވަހާއި 5 އަހަރާ ދެމެދުގައި ކުއްޖާގެ ސިކުނޑިއަށް ލިބޭ ގެއްލުމަކާ ގުޅިގެން ވެސް މި ޙާލަތު ކުރިމަތިވެދާނެއެވެ. މީގެ ތެރޭގައި ކުއްޖާ ތަނަކުން ވެއްޓި ބޮލަށް ލިބޭ އަނިޔާ އާއި ބޮލުގައި އެއްޗަކުން ޖެހިގެން ލިބޭ އަނިޔާ ހިމެނެއެވެ.

ސެރެބްރަލް ޕަލްސީއަށް މަގުފަހިވާ ކަންކަން.

  • އުފަންވާއިރު މާ ބޮޑަށް ބަރުދަން ލުއިވުން.
  • މައިމީހާގެ ބަނޑަށް 32 ހަފުތާ ވުމުގެ ކުރިން އުފަންވުން ނުވަތަ އޮޕަރޭޝަން ކޮށްގެން ނަގަން ޖެހުން.
  • އެއްމާބަނޑު ކުދިން ލިބޭ ޙާލަތްތައް.
  • މާބަނޑުއިރު މައިމީހާއަށް ޖެހޭ ބައެއް ބަލިތަކުގެ ސަބަބުން (މައިމީހާގެ ލޭގައި ޖަރާސީމު އަށަގަތުން، ޗިކަންޕޮކްސް، ޗިކުންގުންޔާ، ރުބެއްލާ، ރަހިމުގެ ދޮރަށްޖެހޭ ބަލިތައް).
  • ބަލިވެއިނުމުގެ ކުރިން ވެސް މައިމީހާގެ ގައިގައި ހުރި ބައްޔެއްގެ ސަބަބުން (ފިޓް ޖެހުން، ތައިރޮއިޑް މައްސަލަ، ހަކުރުބަލި، ޕްރެޝަރު މަތިވުން ފަދަ ކަންކަން).
  • ވިހެއުމުގެ ތެރޭގައި ދިމާވާ ކަންކަން (ވިހެއުމުގެ ކުރިން ރަހިމުން މަސް ވަކިވުން، ފޫޅުދަނޑި ކަރުގައި އޮޅިގެން ވިއްސުމުގައި ދަތިތައް ދިމާވެ އޮކްސިޖަން ލިބުމަށް ހުރަސްއެޅުން).

މި ފަދަ ކަންކަމަކީ ތުއްތުކުއްޖާއަށް ސެރެބްރަލް ޕަލްސީ ޖެހުމުގެ ފުރުޞަތު އިތުރުވާ ކަންކަމެވެ.

ސެރެބްރަލް ޕަލްސީގެ އަލާމާތެއް ފެނިއްޖެނަމަ ދެން ހަދާނީ ކިހިނެއް؟

ސެރެބްރަލް ޕަލްސީ އަކީ ހަށިގަނޑުގެ މަސްތަކަށް ޖެހޭ ބައްޔެއް ކަމުން އެންމެ ތުއްތު އިރުގައި މިކަން ފާހަގަނުކުރެވިދާނެއެވެ. ނަމަވެސް ކުއްޖާގެ އުމުރުން 4-3 މަހުގައި ރަނގަޅަށް ބަލައިފިނަމަ ބައެއް ކަންކަން ފާހަގަކުރެވޭނެއެވެ. ހަމައެހެންމެ ކުއްޖާއާ އެއް އުމުރުގެ އެހެން ކުއްޖަކާ އަޅާބަލާއިރު އެކުއްޖާގެ ކިބައިން ފެންނަ ބައެއް ކަންކަން ކުއްޖާގެ ކިބައިން ނުފެނި މާ ބޮޑަށް ލަސްވާނަމަ އެކަން ބެލެނިވެރިޔާގެ ސަމާލުކަމަށް އައިސްދާނެއެވެ. ގިނަ ފަހަރަށް ކުއްޖާގެ ހަރަކާތްތައް (ކަނދުރާހިފުން، އިށީނުން، ފިރުކުން، ހިނގުން، ހަފައިގެން ކެއުން، އަޑުލެއްވުން) މާ ބޮޑަށް ލަސްކަން ފާހަގަކުރެވެނީ އަހަރެއްހާ ދުވަސް ފަހުންނެވެ. ނުވަތަ އެއަށްވުރެ ވެސް ފަހުންނެވެ. މިފަދަ ކަމެއް ހުރެއްޖެނަމަ ވީ އެންމެ އަވަހަށް ކުޑަކުދިންގެ ޚާއްޞަ ޑޮކްޓަރަކަށް ދެއްކުމަކީ ވަރަށް މުހިއްމު ކަމެކެވެ. ކުއްޖާގެ ސިކުނޑީގައި އެއްވެސް މައްސަލައެއް ހުރިތޯ ބަލަން ހަދާ ޓެސްޓްތައް (އެމް.އާރު.އައި އަދި އީ.އީ.ޖީ) ހަދަން ވާނެއެވެ.

ސެރެބްރަލް ޕަލްސީގެ އަލާމާތްތަކާއި، މި ބަލިޖެހުމުން ދިމާވާ އުދަނގޫތައް އެކި މީހުން ތަޙައްމުލުކުރަނީ އެކި މިންވަރަށެވެ. އެކި ގޮތަށެވެ. މި ބަލީގެ އެންމެ ނުރައްކާތެރި ޙާލަތުގައި އެއްވެސް ގޮތަކަށް ތެދުވެ ނޫޅެވިދާނެއެވެ. ނުވަތަ ކޮޅަށް ތެދުވެ ހުރުމަށް ކޮންމެވެސް އެއްޗެއްގެ އެހީ ހޯދަން ޖެހިދާނެއެވެ. އަދި މުޅި އުމުރަށް އެހެން މީހުންގެ އެހީ ބޭނުން ވެދާނެއެވެ. ތަންކޮޅެއް އާދައިގެ ޙާލަތުގައި  އުނދަގުލުން ނަމަވެސް ކުޑަކޮށް ހަރަކާތްތެރިވެ އުޅެވިދާނެއެވެ. އަދި ބައެއް މީހުންނަށް އުނދަގޫތައް ތަޙައްމުލުކުރަން ޖެހުނު ނަމަވެސް އެހެން މީހުންގެ މާ ބޮޑު އެހީއަކާ ނުލައި އުޅެލެވޭ ވަރުވެއެވެ.

މި ބައްޔަށް އޮތް ފަރުވާއަކީ ކޮބާ؟

ސެރެބްރަލް ޕަލްސީ އަކީ މިހާތަނަށް ވަކި ޚާއްޞަ ފަރުވާއެއް ހޯދިފައި ނުވާ ބައްޔެކެވެ. ވަކި ކަހަލަ ބޭހެއް ދީގެން އެހެނިހެން ބަލިތައް ރަނގަޅު ކުރާހެން ރަނގަޅު ކުރެވޭ ބައްޔެއް ނޫނެވެ. މި ބަލި ހުރިކަން ދެނެގަނެވޭ ހިސާބުން، ވީ އެންމެ އަވަހަކަށް ތެރަޕީ ފަށަންވާނެއެވެ. މަސްތައް ހަރުވާ ކުދިންނަށް ފިޒިއޮތެރަޕީ ދޭންވާނެއެވެ. އެންމެ ތުއްތުއިރުގެ ހަރަކާތްތަކަށް (އިށީނދެ އިނުން، ފިރުކުން، ކޮޅަށް ތެދުވުން،  ހިނގުން) އޮކިއުޕޭޝަނަލް ތެރަޕީ ބޭނުންވާނެއެވެ. އަނގައިގެ މަސްތައް ވަރުގަދަ ކުރުމަށް (ހިންދިރުވުން، ދޫ ބޭނުންކުރުން، ވާހަކަދެއްކުން) ސްޕީޗް ތެރަޕިސްޓެއްގެ އެހީ ހޯދަން ޖެހޭނެއެވެ.

މި ހުރިހާ ތެރަޕީތަކަކީ ރާއްޖެއިން ވެސް ލިބެން ހުރި ތެރަޕީތަކެއް ނަމަވެސް، ބޭނުންވާ މިންވަރާ ގާތަށް ވެސް މިފަދަ ޚިދުމަތްތައް ލިބެން ނެތް ކަން ހިތާމައާ އެކު ފާހަގަކޮށްލަން ޖެހެއެވެ. ޚާއްޞަކޮށް އޮކިއުޕޭޝަނަލް ތެރަޕިސްޓުން ވަރަށް މަދެވެ. އަތޮޅުތެރޭގައި އެއްވެސް ވަރަކަށް މި ޚިދުމަތްތައް ލިބޭކަށް ނެތެވެ. މާލެއިން ޚިދުމަތް ލިބެނީ ވަރަށް އުނދަގުލުންނެވެ. ޚިދުމަތުގެ އަގު އެހާމެ ބޮޑެވެ. މާލޭގައި ތިބި ގިނަ ތެރަޕިސްޓުންނަކީ ޕްރައިވެޓް ކްލިނިކްތަކުގައި މަސައްކަތްކުރާ މީހުންނެވެ. ގިނަ ފަހަރަށް ކްލިނިކްތަކުން ޚިދުމަތް ދެނީ ވިޔަފާރި އުސޫލުންނެވެ. މިފަދަ ޚިދުމަތް އެންމެ މުހިންމުވާ މީހުންނަށް އިސްކަންދީގެންނެއް ނޫނެވެ. ސެރެބްރަލް ޕަލްސީ ކަހަލަ އާރލީ ޑައިގްނޯސް ބޭނުންވާ ބަލިތަކަށް ފަސޭހައިން ފަރުވާ ހޯދޭނެ ނިޒާމެއް ހަމަޖެހިފައި އޮތުމަކީ ކޮންމެހެން ބޭނުން ކަމެކެވެ.

ރިފަރެންސް:

އާމިނަތު ޝަފާ. (2021). ސެރެބްރަލް ޕަލްސީ އެނގެނީ ކިހާ މިންވަރަކަށް. ނެގީ: ތީރު މީޑިއާ. މާލެ.