ގުދުރަތީގޮތުން ދިވެހިރާއްޖެ އުފެދިފައިމި ވަނީ އިކުއޭޓަރ ނުވަތަ ދުނިޔޭގެ މެދޭ މި ކިޔާ ހިސާބުގައެވެ. އެއާއި އެކު ރާއްޖޭގެ މާހައުލަކީ ނިސްބަތުން ހޫނު މާހައުލެކެވެ. ރާއްޖޭގައި އޮންނަނީ ދެ މޫސުމެކެވެ. އެއީ ހުޅަނގު މޫސުމާއި އިރުވައި މޫސުމެވެ. މިއިން ކޮންމެ މޫސުމެއްގައިވެސް، މި ޖަޒީރާ ރަށްތަކުގެ ވަށައިގެންވާ ދޮންފަސްގަނޑު ކޮންމެވެސް އެއްކޮޅެއްގައި ވޮޑިފައި އޮވެއެވެ. ކޮންމެ މޫސުމެއްގައިވެސް ތުނޑިއެއް އޮވެއެވެ. ނަމަވެސް ތަފާތުވަނީ ތުނޑި ނުވަތަ އެ ފަސްގަނޑު ވޮޑިފައި އޮންނަ ދިމާލެވެ. ހުޅަނގު މޫސުމުގައި ފަސްގަނޑު ވޮޑޭނީ އިރުމަތީ ފަރާތަށެވެ. އިރުވައި މޫސުމުގައި މި ފަސްގަނޑު ވޮޑެމުން ދާނީ ރަށުގެ ހުޅަނގުފަރާތަށެވެ. މިއީ ގުދުރަތީ ނިޒާމު ތަރުތީބުވެ ހިނގާގޮތެވެ.

އާދޭހެވެ! އިންސާނާގެ ހަޔާތަކީ މިފަދައިން ތަރުތީބު ކުރަންޖެހޭނޭ އެއްޗެކެވެ. އެހެނީ އިންސާނާގެ ހަޔާތުގައިވެސް އެކި ދުވަސްވަރު، އެކި އެކި ކަންކަމާއި ކުރިމަތިލާން ޖެހޭނެއެވެ. ދިރިއުޅުމުގައި އެކި ދިމަ ދިމާލުން ވައި ޖެހޭނެއެވެ. އެއިން ކޮންމެ ހާލަތަކަށްވެސް އިންސާނާ ކިޔަމަންވެ އެހާލަތަކައިގެން އުޅެވެން އޮތް އެންމެ ރަނގަޅު ގޮތަކަށް އެމީހެއްގެ އުޅުން ބައްޓަން ކުރަންވާނެއެވެ. ނޫންނަމަ ތިމާގެ ހަޔާތުން އެ ރީތި ހިތްގައިމު ދޮން ފަސްގަނޑު ގެއްލިގެން ހިނގައިދާނެއެވެ.

ގަބޫލުކުރަން ޖެހޭ ހަގީގަތަކީ ދުނިޔޭގައި އަބަދު އެއްގޮތަކަށް ކަންކަން ވަމުން ނުދާނޭ ކަމެވެ. ދުނިޔެ ހިނގާނީ ތޮށަލި ދުޅައަށޭ ބުނަނީވެސް މި ސަބަބަށްޓަކައެވެ. މިފަދައިން ދުނިޔެއަށް ނުވަތަ ތިމާގެ ހަޔާތަށް އަންނަ ކޮންމެ ބަދަލަކާއި އެކު ތިމާ އެ ބަދަލެއް ގަބޫލުކޮށް އެހާލަތަކަށް ރުހެން ޖެހޭނެއެވެ. އަދި އެ މިންވަރަކަށް އީމާންވާން ޖެހޭނެއެވެ. އޭގެފަހުގައި އެ ބަދަލަކާއި އެކު ނުވަތަ އެހާލަތަކާއި އެކު ތިމާގެ ދިރިއުޅުން ކުރިއަށްގެންދަން ވާނެއެވެ.

ބަދަލުވި ވަޔާއި އެކު ނަގަމުންދާ ރާޅުތަކުން، ގިރާލަމުންދާ ހަޔާތުގެ ފަސްތައް އެހެން ދިމާލަކަށް ގެންދަން ޖެހޭނެއެވެ. ހަމަ ގައިމުވެސް އެ ދިމާލަކަށް ނުވަތަ ފަރާތަކަށް ވާނީ ވައިގެ ނިވައި ލާ ދިމާލެވެ. އެފަދައިން އިންސާނާގެ ދިރިއުޅުން ތަރުތީބުކުރާނަމަ، ގައިމުވެސް ދިރިއުޅުމުގައި ފަހަތަށް ދާކަށް ނުޖެހޭނެއެވެ. އެއީ ކޮންމެ ދިމާލަކުން ވައި ޖެހުނު ނަމަވެސް މެއެވެ.

މިއީ ގުދުރަތީގޮތުން މޫސުމަށް އަންނަ ބަދަލާއިކު ތިމާވެށި އެކަމަށް ހޭނޭ ގޮތުގެ މިސާލެކެވެ. މިފަދައިން އިންސާނާވެސް އޭނާގެ ހަޔާތުގައި އަންނަ އެކި އެކި މޫސުން ތަކުގައި އެ މޫސުމަކަަށް ހޭނެން ޖެހޭނެއެވެ. ދިމާވާ އެ ކަމަކާއި ދެކޮޅަށް މާ ގަދަޔަށް ވިއްދާ، ވަޔާއި އޮޔާއި ދެކޮޅަށް ކަނބަން އުޅޭނަމަ، ރިތް ބިނދި ގައިން ވަރުދިޔުން ނޫން ކަމެއް ނުވާނެއެވެ. އެހެންކަމުން ކޮންމެ މީހަކީވެސް މިފަދައިން އިބުރަތް ހާސިލުކޮށް، ހަޔާތުގައި ކޮންމެ ކަމެއް ކޮންމެ ގޮތަކަށް ދިމާވި ނަމަވެސް އެކަމަކާއި އެކުގައި ކުރިއަށް ދާނޭ މަގު ހޯދާ، އަބަދުވެސް ކުރިއަށް ފިޔަވަޅު އަޅާ މީހަކަށް ވާން ޖެހޭނެއެވެ. ކާމިޔާބު ދިރިއުޅުމެއް ލިބޭނީ އޭރުންނެވެ.