ހާއްސަ އެހީއަށް ބޭނުންވާ ކުއްޖަކު ބެލެހެއްޓުމުގައި ދިމާވާ ދަތިތަކާއި، އެކަމަށް ހުރި ގޮންޖެހުންތައް އެންމެ ރަނގަޅަށް އެނގޭނީ އެކަން ތަޖުރިބާކުރާ ބެލެނިވެރިއަކަށެވެ. ދިވެހިރާއްޖެ އަކީ ސިއްހީ ފަރުވާ ހިލޭ ލިބޭ ޤައުމެއް ނަމަވެސް ބައެއް ކަހަލަ ފަރުވާތައް ހޯދުމުގައި ދިމާވާ ދަތިތަކުގެ ސަބަބުން އެންމެ އެކަށީގެންވާ ފަރުވާ ނުލިބި ލަސްވެގެން ދެއެވެ. ބައެއް ކަހަލަ ބަލިތަކަށް ބޭނުންވާ ތެރަޕީ ހޯދުމަށް ނަން ނޯޓުކޮށްގެން 1 އަހަރު ދުވަހު ވެސް އިންތިޒާރުކުރަން ޖެހިދެއެވެ.

ވިލިމާލޭގައި ދިރިއުޅޭ އަޒީނަތު އަބްދުﷲގެ 4 ކުދިން ތިބި އިރު ދެ ކުދިންނަކީ ހާއްސަ އެހީއަށް ބޭނުންވާ ކުދިންނެވެ. އޭގެ ތެރެއިން އެއް ކުއްޖަކީ އޯޓިޒަމް ކުއްޖެކެވެ. އޯޓިޒަމް ކުއްޖަކަށް ބޭނުންވާނެ ފަރުވާއާއި، ތެރަޕީތައް ވިލިމާލެއިން އެއްވެސް ވަރަކަށް ލިބޭކަށް ނުހުރެއެވެ. ދަރިފުޅަށް ބޭނުންވާ ފަރުވާ ހޯދުމަށް ދާން ޖެހެނީ އައިޖީއެމްއެޗަށް ނުވަތަ ހުޅުމާލޭގައި ހުންނަ އޯޓިޒަމް އެސޯސިއޭޝަނަށެވެ. އެތަންތަނުން ފަރުވާ ހޯދުމަށް ނަން ނޯޓުކޮށްފައި ތިބޭ މީހުންގެ އަދަދު ގިނަކަމުން ފަރުވާ ނުލިބި ވަރަށް ބޮޑަށް ލަސްވެގެންދާ ފަހަރު ވެސް އާދެއެވެ. އާންމު ގޮތެއްގައި ސިކުނޑިއާ ގުޅިފައިވާ ނުކުޅެދުންތެރިކަމަކީ އާރލީ ޑައިގްނޯސް ކޮންމެހެން ބޭނުންވާ ޙާލަތެކެވެ. މީގެއިތުރުން ހާއްސަ އެހީއަށް ބޭނުންވާ ކުއްޖަކު ގޮވައިގެން ފެރީގައި ދަތުރުކޮށްފައި ހޮސްޕިޓަލަށް ދިޔުމަކީ ކޮންމެކޮންމެ މީހަކަށް ކުރެވޭނެ ކަމެއް ނޫނެވެ. ބައެއް ކުދިންނަކީ އެގޮތަށް ގެންދެވޭ ވަރަށް ވުރެ ޙާލަތު ނާޒުކު ކުދިންނެވެ. ދަތުރުކުރުމަށް ތިން ހަތަރު މީހުންގެ އެހީ ބޭނުންވާ ކުދިންނެވެ.

އަޒީނަތަށް މިކަހަލަ ދަތި އުނދަގޫތައް ތަހައްމުލުކުރަން ޖެހުމުން މި ފަދަ އެހެން ބެލެނިވެރިން އުޅޭނެ ޙާލާ މެދު ވިސްނާލެވުނެވެ. ވީވަރަކުން އެހެން މީހުންނަށް އެހީތެރިކަން ފޯރުކޮށްދިނުމުގެ މަޤުޞަދުގައި އެންމެ ފުރަތަމަ ހެދީ ވައިބަރ ގްރޫޕެކެވެ. އެ ގުރޫޕްގައި މުޅިން ވެސް ތިބީ ވިލިމާލޭގައި ދިރިއުޅޭ ހާއްސަ އެހީއަށް ބޭނުންވާ ކުދިންގެ ތެރެއިން، ހާއްސަ ތެރަޕީތައް ބޭނުންވާ ކުދިންގެ ބެލެނިވެރިންނެވެ. އޭރު ތެރަޕީ ބޭނުންވާ 40 ކުދިން ވިލިމާލޭގައި ދިރިއުޅެއެވެ. އެންމެ ފުރަތަމަ އެ ގްރޫޕްގެ ތެރެއިން ކޮށްދެވުނު ކަމަކީ ކުދިންނަށް ބޭނުންވާ ތެރަޕީތަކަށް ނަން ނޯޓުކުރުމާއި ފޯމު ފުރައިދިނުމެވެ. އެ ގްރޫޕްގެ ތެރެއިން އެހެން ބެލެނިވެރިންގެ ޝަކުވާތަކާއި، ކަންބޮޑުވުންތައް އެނގުނު އިރު ޖުމުލަގޮތެއްގައި އެންމެންގެ ވެސް ހުރީ އެއްކަހަލަ ކަންބޮޑުވުންތަކެކެވެ. ހާއްސަ އެހީއަށް ބޭނުންވާ ކުއްޖަކު ގޮވައިގެން ދަތުރުކުރުމުގައި ހުރި ދަތިތަކާއި، ބޭނުންވާ މިންވަރާ ގާތަށް ވެސް ކުދިންނަށް ތެރަޕީ ނުލިބޭ ވާހަކައެވެ.  

އަޒީނަތު އިސްވެ ހުރެ އެންމެ ފުރަތަމަ މަސައްކަތް ކުރީ ވިލިމާލޭ ހޮސްޕިޓަލުން ތެރަޕީތައް ލިބޭނެ ގޮތެއް ހަމަޖެއްސޭތޯއެވެ. އެގޮތުން އައިޖީއެމް ހޮސްޕިޓަލަށް ސިޓީއެއް ލިޔެގެން، ހަފުތާއަކު އެއް ދުވަހު ވިޔަސް ވިލިމާލޭ ހޮސްޕިޓަލުގައި ތެރަޕީ ލިބޭނެ ގޮތެއް ހަމަޖައްސައިދެއްވުން އެދި ދެންނެވިއެވެ. އެކަމަކު އެކަން ހަމަޖެހޭ ގޮތެއް ނުވިއެވެ. އެކަމަށް އިތުރު މަގެއް ފެނޭތޯ ސަކުރާރުގެ ކަމާ ބެހޭ ބޭފުޅުންގެ އަރިހަށް ވެސް ދިޔައެވެ. މަޖިލިސް މެމްބަރުންނާއި، ސިޔާސީ ގޮތުން ނުފޫޒު ގަދަ ބޭބޭފުޅުންނާއި ބައްދަލުކޮށް، މި ކަމަށް ހުރި ދަތިތައް ހިއްސާކުރިއެވެ. ދެން ވެސް އަލިމަގެއް ނުފެނުނެވެ. އެކަމަކު ދެން ވެސް އަޒީނަތުގެ ހިތްވަރަކަށް ބަދަލެއް ނައެވެ. އެހީއަށް އެދި ދިއްކުރި އަތުގައި ހިފާނެ މީހަކު ނުވުމުން ދެން އަޒީނަތު ވިސްނީ ތަންކޮޅެއް ފުޅާކޮށް މި މަސައްކަތް ކުރާށެވެ. އެގޮތުން އެން.ޖީ.އޯ އެއްގެ ގޮތުގައި ރަޖިސްޓްރީކޮށްގެން މިކަން ކުރަން އުޅެފިނަމަ ފަސޭހަވާނޭ ހީކޮށް "ވީލަވްސް"ގެ ނަމުގައި އެން.ޖީ.އޯ އެއް އުފެއްދިއެވެ.

މި އެން.ޖީ.އޯ އުފައްދަން އުޅުމުގެ ތެރެއިން އަޒީނަތަށް އިތުރު އެހެންކަމެއް ވެސް އެނގިގެންދިޔައެވެ. ހާއްސަ އެހީއަށް ބޭނުންވާ ކުދިންގެ ބެލެނިވެރިންގެ ތެރެއިން ބައެއް މީހުންނަކީ ޑިޕްރެޝަން ތަހައްމުލުކުރާ މީހުންނެވެ. މާލޭގެ ދަތި ދިރިއުޅުމަކީ ގިނަ ބަޔަކު ނަފުސާނީ ބަލިމަޑުކަމެއްގެ ތެރެއަށް ގެނބިގެންދާ ކަމެކެވެ. ގިނަ މީހުންނަކީ ވަރަށް ކުދިކުދި ތަންތަންކޮޅުގައި، ވަރަށް ދަތި ހާލުގައި އުޅޭ މީހުންނެވެ. އެފަދަ ދަތި ދިރިއުޅުމެއްގެ ތެރެއަށް ހާއްސަ އެހީއަށް ބޭނުންވާ ކުއްޖަކު އުފަންވެ، އެކުއްޖާއަށް އެންމެ އެކަށީގެންވާ ފަރުވާއާއި، އެކުއްޖާ ބޮޑުވަމުން ދާއިރު ލިބެންޖެހޭ ހައްޤުތަކުން މަހުރޫމުވާތަން ދެކުމަކީ އެއްވެސް މައެއްގެ ހިތަށް ކުޅަދާނަވާނެ ކަމެއް ނޫނެވެ. އެކަށީގެންވާ ރަނގަޅު ހައްލެއް ނުލިބި، މި ފަދަ މައްސަލަތަކުގައި މައިމީހާ ބަނދެވުމުން، މައިމީހާގެ ނަފުސާނީ ޙާލަތު ދަށަށް ގޮސް ޑިޕްރެޝަނަށް ހުށަހެޅިގެން ދެއެވެ.

ރާއްޖޭގައި ނަފުސާނީ މައްސަލަތަކަށް ފަރުވާ ހޯދުމަކީ ވަރަށް އުނދަގޫ ކަމެކެވެ. ނަފުސާނީ މައްސަލަތަކަށް އައިޖީއެމް ހޮސްޕިޓަލުން ފަރުވާ ހޯދަން ނަން ނޯޓުކޮށްފައި ތިބޭ މީހުންގެ އަދަދު ގިނަ ފަހަރަށް އޮންނަނީ ހާހަކަށް ވުރެ މަތީގައެވެ. ޑޮކްޓަރަށް ދައްކަން ފުރުޞަތު ލިބެނީ ނަން ނޯޓު ކުރާތާ ގިނަ ދުވަސްތަކެއް ފަހުންނެވެ. އެހެންކަމުން 2020 ވަނަ އަހަރު އެންޖީއޯ އެއްގެ ގޮތުގައި "ވީލަވްސް" ރަޖިސްޓްރީ ކުރެވުނީ ހާއްސައެހީއަށް ބޭނުންވާ ކުދިންނާއި، ނަފުސާނީ ބަލިތައް ތަހައްމުލުކުރާ މީހުންނަށް އެހީތެރިކަން ފޯރުކޮށްދޭ އޮގަނައިޒޭޝަނެއްގެ ގޮތުގައެވެ. މި އޮގަނައިޒޭޝަންގެ ފައުންޑަރ މެމްބަރުންނަކީ އަޒީނަތު އަބްދުﷲ އާއި ޝިފާނާ މުޙައްމަދެވެ. މީގެ ތެރެއިން އަޒީނަތު އަބްދުﷲ އަކީ އެންޖީއޯގެ ރައީސެވެ. ޝިފާނާ މުޙައްމަދަކީ ނައިބު ރައީސެވެ. "ވީލަވްސް"ގެ އެގްޒެކްޓިވް މެމްބަރުންގެ ތެރޭގައި ހިމެނެނީ:

އާމިނަތު ޝީޒާ (މީޑިއާ އޮފިސަރ)

ހުސްނާ ނަސީރު (އެޑްމިނިސްޓްރޭޓިވް އޮފިސަރ)

އާމިނަތު އަންޖުނާ (އެޑްމިނިސްޓްރޭޓިވް އޮފިސަރ)

ނަސްރީނާ އިބްރާހިމް (ހަޒާންދާރު)

އާމިނަތު ޝަފާ (އެވެއަރނެސް ކޯޑިނޭޓަރ)

ޝަޒީނާ އަޙްމަދު ނަސީމް ((އެވެއަރނެސް ކޯޑިނޭޓަރ)

އާމިނަތު ނަފުހާ ރަފީޤް (އެގްޒެކްޓިވް ސެކްރެޓަރީ)

ހުމައިދާ ހަމީދު (ސެކްރެޓަރީ) އެވެ.

އެންޖީއޯ އުފެދުމުން "ވީލަވްސް"ގެ އޮފީހެއް ވިލިމާލޭގައި ހުޅުވިއެވެ. މި އޮފީސް ހުޅުވުނީ ހެޔޮއެދޭ ވަރަށް ގިނަ ފަރާތްތަކުގެ އެހީއާ އެއްބާރުލުން ލިބިގެންނެވެ. ހާއްސަގޮތެއްގައި އެގްޒެކްޓިވް މެމްބަރުންގެ ވަރަށް ބުރަ މަސައްކަތުންނެވެ. އެ އޮފީސް ހިންގަނީ އެމް.ޕީ އުޝާމްގެ އެހީއާ އެކު ލިބިފައި ހުރި ވަރަށް ކުޑަ ތަންކޮޅެއްގައެވެ. އޮފީސް ހުޅުވުމުގެ މައިގަނޑު މަޤުޞަދަކީ ހާއްސަ އެހީއަށް ބޭނުންވާ ކުދިންނަށް އެހީތެރިކަމާއި، ތެރަޕީ ފޯރުކޮށްދިނުން ކަމުގައި ވިޔަސް އެކަން ވެސް ކުރެވޭ ގޮތެއް ނުވިއެވެ. އެތަނުން ތެރަޕީ ދެވެނީ ކްލިނިކެއްގެ ގޮތުގައި ހެލްތު މިނިސްޓްރީގައި ތަން ރަޖިސްޓްރީ ކޮށްގެންނެވެ. އެއީ ކްލިނިކެއްގެ ގޮތުގައި ރަޖިސްޓްރީކޮށްގެން ޚިދުމަތް ދެވޭ ގޮތަށް ހުރި ތަނެއް ނޫނެވެ. އެތަނުގައި ޖާގައިގެ ދަތިކަން ވަރަށް ބޮޑެވެ. ތަންހުރީ ވަރަށް ބޮޑަށް ބާވެ، މަރާމާތުކުރަން ޖެހިފައެވެ.  

އެންޖީއޯ އުފައްދައި، އޮފީހެއް ހުޅުވުމުން ވެސް އަލިމަގެއް ނުފެނުމުން އެންޖީއޯގެ މަސައްކަތް އެހެން ގޮތަކަށް ކުރިއަށް ގެންދަން މަޖުބޫރުވިއެވެ. އެހެންކަމުން ދެން ފެށުނީ އެފަދަ ކުދިންގެ ބެލެނިވެރިން އެކަމަށް ހޭލުންތެރިކޮށް، ގޭގައި އަމިއްލައަށް ދެވޭނެ ބައެއް ތެރަޕީތައް ބެލެނިވެރިންނާ ހިއްސާކުރުމުގެ ހަރަކާތްތަކެކެވެ. އެގޮތުން ކްލަބްހައުސްގައި ކޮންމެ ހޮނިހިރު ދުވަހެއްގެ ރޭ ވަކި މައުޟޫއެއް ނަގައިގެން، ބެލެނިވެރިން ހޭލުންތެރިކުރުވުމުގެ ޕްރޮގްރާމެއް ކުރިއަށް ގެންދެއެވެ. އަދި އަތޮޅުތެރޭގެ ރަށްރަށުގައި ތިބި ބެލެނިވެރިންނަށް ހާއްސަކޮށް ޔޫޓިއުބް ޗެނަލްއެއް ހެދުމުގެ މަސައްކަތް ވެސް ވަރަށް ބުރަކޮށް ކުރެވެމުންދާ ކަމަށް "ވީލަވްސް" އިން ބުންޏެވެ.

"ވީލަވްސް" އިން ބުނި ގޮތުގައި ހިލޭ ސާބަހަށް މި މަސައްކަތަށް އެހީތެރިކަން ފޯރުކޮށްދޭނެ މީހުން އެބަތިއްބެވެ. އެގޮތުން ގިނަ ދިވެހިންގެ ލޯތްބާއި އިތުބާރު ހޯދާފައިވާ ކުޑަކުދިންގެ ޑޮކްޓަރުން ކަމުގައިވާ ޑރ. ފަރުޒާނާ ޝައުޤީ، ޑރ.ނިޔާފް އަދި ޑރ. އަފީފްގެ އެހީތެރިކަން ލިބޭކަން އަޒީނަތު އުފަލާއެކު ފާހަގަކުރިއެވެ. އަދި މީގެ އިތުރުން މާލޭގެ ބައެއް ސްކޫލްތަކުގެ "ސެން" ޓީޗަރުންނާއި، ބައެއް ނަރުހުންނާއި، ސައިކޮލޮޖިސްޓުންނާއި، އައިޖީއެމްއެޗްގެ ފިޒިއޮތެރަޕީ އެސޯސިއޭޝަންގެ އެހީތެރިކަން ވެސް ވަރަށް ބޮޑަށް ލިބޭކަން ފާހަގަކުރިއެވެ.

ގިނަ އެންޖީއޯތައް އުފެދިގެން އަންނަނީ މާލީގޮތުން ފުދުންތެރި ބަޔަކު މުގުލުގައި ތިބެގެން ކަމުގައި ވިޔަސް "ވީލަވްސް" އުފެދިގެން އައީ ދަރީންގެ ފަރުވާއާ މެދު ގޮތް ހުސްވެފައި ތިބި ބެލެނިވެރިންތަކެއް އިސްވެތިބެގެންނެވެ. އެކަންކަމުން ފައިސާގެ ދަތިކަމާ ހުރެ، ޚިދުމަތް ދޭނެ ތަނެއް ކުއްޔަށް ނެގޭކަށް ނެތެވެ. މާލެއާ ޚިލާފަށް ވިލިމާލެއަކީ ޖާގަ ތަނަވަސް އަވަށެވެ. ހުސް އިމާރާތްތައް އެބަހުއްޓެވެ. "ވީލަވްސް" ގެ އެދުމަކީ މި ޚިދުމަތް ފޯރުކޮށްދިނުމަށް ސަރުކާރުގެ ކަމާ ބެހޭ ފަރާތްތަކުން މިކަމަށް އެކަށީގެންވާ ރަނގަޅު ތަނެއް ހަމަޖައްސައިދިނުމެވެ. މިފަދަ ކުދިންގެ ބެލެނިވެރިން ކުރާ އާދޭހުގެ އަޑު އެއްސެވުމެވެ. މިފަދަ ބޮޑެތި މައްސަލަތައް ކަމާ ބެހޭ ފަރާތްތަކުގެ ސަމާލުކަމަށް އައިސް، އެކަށީގެންވާ އެހީތެރިކަމެއް ފޯރުކޮށްދެއްވުމެވެ.