ބައެއް ބަސްބަހާއި ކަންކަމުގެ މާނަ އެކި މީހުން އެކިގޮތަށް ކޮަށްފާނެއެވެ. އެގޮތުން "ދަތުރުކުރުން" މި ބަހުގެ މާނަވެސް އެކި މީހުންނަށް ކުރެވޭނީ އެކިގޮތަށެވެ. އެގޮތުން ދިވެހި ރަދީފުގައިވެސް ދަތުރުކުރުމެގެ އެއް މާނައަށް ވުރެ ގިނަ މާނަ ފާހަގަ ކުރައްވާފައި އެބަ އޮތެވެ. އެގޮތުން ފުރަތަމަ މާނައިގައި ބުނެފައިވާ ގޮތުން ދަތުރުކުރުމަކީ އިންސާނަކު ހުރިތަނުން އެހެން ތަނަކަށް ކަނޑުމަގުން ނުވަތަ އެއްގަމު މަގުން ގޮސްއައިސްވެ އުޅޭ އުޅުމެވެ. ދެވަނަ މާނައިގައި ވަނީ މީހަކު ނުވަތަ އެއްޗެއް އެއްތަނުން އަނެއްތަނަށް ދިއުމެވެ.

މިއީ ދަތުރުކުރުމުގެ މާނަތަކެވެ. އެގޮތުން ދިވެހި ރާއްޖޭގައިވެސް މި ދެންނެވި ދެ މާނައާއި އެއް އުސޫލަކުން ކަން ކަން ވަމުން އެބަދެއެވެ. އެހެންކަމުން ބިންކުޑަ މި ރަށްތަކުގެ އެއްގަމުގައި އެއްގެއިން އަނެއް ގެއަށް ދާ ދިއުމަކީވެސް ދަތުރުކުރުން ކަމުގައި ބުނެވޭނެއެވެ. އެހެނީ އެއީ ދެ މާނައަށްވެސް ފެތޭ ކަމަކަށް ވާތީއެވެ. ކޮންމެއަކަސް މިއުޅެނީ ދަތުރުކުރުމުގެ މާނައާއި މެދު ބަހުސް ކުރާކަށް ނޫނެވެ. ދައްކާން މިއުޅެނީ އަދި މުޅިން އެހެން ވާހަކައެކެވެ.

ރޭގަނޑު އެކަނި ގެއަށްދާން ނުކެރޭ ބުނާ މީހުންނާއި ދިމާލަށް އަހަރެެމެންނަށް ވަރަށް މަލާމާތް ކުރެވެއެވެ. ތީ ދެން ކޮން ކަމެއްހޭ ބުނެވެއެވެ. އޭނާއީ ފިނޑިއެއް ކަމަށް ނިންމައެވެ. ހާއްސަކޮށް ފިރިހެނެއް ނަމަ ރަނޑާލި އަންހެނެކޭ ބުނެއުޅެއެވެ. ހަގީގަތުގައި މިއީ ހިތާމަހުރި ކަމެކެވެ. އެފަދަ މީހުންނާއި ދިމާލަށް މަލާމާތުގެ އެއްވެސް ބަހެއް ރައްދު ކުރުމުގެ ހައްގެއް އަަހަރެމެންނަކަށް ނެތެވެ. ހަގީގަތުގައި ކަން އޮތްގޮތް އަހަރެމެންނަށް ނޭނގެނީއެވެ.

އާދޭހެވެ! ރޭގަނޑު އެކަނި ދަތުރުކުރަން ބިރުގަންނަން ޖެހެއެވެ. އެއީ ރާއްޖޭގެ ބިން ކުޑަ ރަށެއްގައި އެއްގަމު މަގުން ކުރާ ދަތުރެއްވިޔަސް މެއެވެ. އެހެނީ އެކަން ބަޔާން ކުރައްވާ ރަސޫލާ ހަދީޘް ކުރައްވާފައިވާ ބަސްފުޅެއް ވާތީއެވެ. ރޭގަނޑު އެކަނި ދަތުރު ކުރުމާއި ގުޅޭގޮތުން އެކަލޭގެފާނު ހަދީޘް ކުރައްވާފައިވާ ބަސްފުޅުގެ މާނައިގައި ވެއެވެ. "އެކަނި ދަތުރުކުރުމާއި މެދު ތިމަންކަލޭގެފާނަށް އެނގިވަޑައިގަންނަވާ ކަންކަން، ތިޔަބައިމީހުންނަށް އެނގޭނެނަމަ، ތިޔަބައިމީހުން ކުރެ އެކަކުވެސް ރޭގަނޑު އެކަނިމައިއެކަނި ދަތުރުކޮށެއް ނޫޅޭނެއެވެ." (ބުޚާރީ 2998).

މިއީ އަހަރެމެންގެ ގިނަ މީހުން ހަނދާން ނައްތާލާފައިވާ ކަމެކެވެ. އިންސާނުންނަށް އެންމެ ރައްކާތެރިކަން ބޮޑު މަގެއް ކަށަވަރުކޮށްދޭ ހަމަ އެކަނި ދީނަކީ އިސްލާމްދީނެވެ. ވީއިރު މި ދީނުގެ ދެވަނަ މަސްދަރު ކަމުގައިވާ ރަސޫލާގެ ސުންނަތުން ސާބިތުވާން މި އޮންނަ ގޮތުގައި ރޭގަނޑު އެކަނި ދަތުރުކުރުމަކީ އެންމެ އެދެވޭ ގޮތެއް ނޫނެވެ. ދީނުގެ ގިނަ އިލްމުވެރިން އެއްބަސްވެލައްވާ ގޮތުގައި މި ހަދީޘްފުޅުގައި އެކަލޭގެފާނު އެ ބަޔާންކުރައްވަނީ އެކަނި ދަތުރުކުރުމުގެ ނުރައްކާ ބޮޑުކަމުގެ ވާހަކައެވެ.

ކަންއޮތީ މިހެންކަމުން ރޭގަނޑު، އެކަނި އެވެނި މިވެނި ތަނަކަށް ދާން ނުކެރޭ ބުނާ މީހުންނާއި ދިމާލަށް މަލާމާތް ކުރުމެއް ނެތެވެ. އޮތީ އެމީހުންނާއި އެކު އެ ދަތުރެއްގައި ބައިވެރި ވުމެވެ. މަގެއްގެ ގޮތުން އެންމެ ރައްކާތެރި ގޮތަކީ ހަމަ އެއީއެވެ.