މާބަނޑު އަންހެނުންނަށް ދިމާވާ އެކި އެކި އުނދަގޫތަކާއި ވޭންތައް ހުރެއެވެ. އެގޮތުން ދުވަސް ނުފުރާ ވިހެއުމަކީވެސް ހަގީގަތުގައި މިފަދަ ކަމެކެވެ. އަދި މިއީ އާންމުކޮށް ދިމާވާވެސް ކަމެކެވެ. ދުވަސްނުފުރާ ވިހެއުމަކީ ކޮބާހެއްޔެވެ؟ އެއީ މައިމީހާގެ ބަނޑަށް 37 ހަފްތާ ހަމަ ނުވެ، އޭގެ ކުރިން ކުއްޖާ ވިހެއުމެވެ. ދުވަސްނުފުރާ ވިހާކުދިންނަކީ އެކުދިންގެ ހަޔާތުގެ ފުރަތަމަ ދުވަސްވަރު ވަރަށް ގާތުން މޮނިޓަރ ކުރެވި ހާއްސަ ފަރުވާތަކެއް ލިބެންޖެހޭނޭ ކުދިންނެވެ.
މިލިޔުމުގައި މި ބަލައިލަނީ މާބަނޑު އަންހެނަކު ދުވަސްނުފުރާ ވިހަން ޖެހިދާނޭ ބައެއް އާންމު ސަބަބުތަކަށެވެ. އެގޮތުން ޑަކްޓަރުން ފާހަގަ ކުރާ އެއް ކަމަކީ މައިމީހާގެ ރަހިމާއި ރަހިމުހެ ދޮރުގައި ޖަރާސީމު އަށަގަތުމެވެ. މިކަން މެދުވެރިވާ ސީދާ ސަބަބެއް ޑަކްޓަރުންނަށްވެސް ބުނަން ދައްޗެވެ. ނަމަވެސް މާބަނޑު ދުވަސްވަރު އަންހެނާގެ ކުރިމަތި ފަރާތުގެ ސާފުތާހިރުކަން ކުޑަނަމަ، ޖަރާސީމު އަށަގަތުމުގެ ފުރުސަތު ބޮޑުވެއެވެ. ބައެއް މީހުން އެމީހުންގެ މާބަނޑު ދުވަސްވަރު، ދުވަސް ހަމަވުމުގެ ކުރިން އެމީހުންގެ ރަހިމުގެ ދޮރު ކުރުވާން ފަށައެވެ. ޑަކްޓަރުން ފާހަގަ ކުރާގޮތުގައި މި ދޮރު ކުރުވުމަކީ ދުވަސްނުފުރާ ވިހަން ޖެހިދާނޭ ކަމެކެވެ. މިފަދައިން ރަހިމުގެ ދޮރު ކުރުވާނަމަ، މާބަނޑު ދުވަސްވަރު ހަދަމުންދާ ސްކޭން ތަކުން އެކަން ފާހަގަވާނެއެވެ.
ދިވެހިންގެ ތެރޭގައި ކުރީގައި އޮންނަ އެއް އާދައަކީ އަހަރު ދެކޮޅު ވިހެއުމެވެ. މިފަދައިން އެ ކުދިންގެ ދޭތެރޭގައި 6 މަހަށް ވުރެ ކުރު މުއްދަތެއް ހޭދަކުރުމަކީ ދުވަސްނުފުރާ ވިހަން ޖެހިދާނޭ ސަބަބެކެވެ. އެހެނީ ދަރިމައިވުމުގެ ނިޒާމުގައި ހުރި ގުނަވަންތައް އެންމެ ފުރިހަމަގޮތަށް ރުޖޫއަ ނުވެ ހުރެދާނެތީއެވެ. މާބަނޑު ދުވަސްވަރު، ދުންފަތުގެ އިސްތިއުމާލު ކުރުމާއި ބަނގުރާ ބުއިމާއި މަސްތުވުންފަދަ ކަންކަމަކީ އޭގެ ސަބަބުން ބަނޑުގައިވާ ތުއްތު ކުއްޖާ "ސްޓްރެސް" ކުރުވާނޭ ކަންކަމެވެ. މިކަމުގެ ނަތީޖާއަކަށް ވެގެންދަނީ ދުވަސްނުފުރާ ވިހަން ޖެހުމެވެ.
ދާއިމީ އެކި އެކި ބަލި ބައްޔަށް ބޭސް ކުރަމުންދާ މާބަނޑު އަންހެނުންނަކީވެސް ދުވަސްނުފުރާ ވިހަން ޖެހިދާނޭ ކަމުގެ ބިރު އޮތް ބައެކެވެ. އެގޮތުން ފާހަގަކޮށްލެވޭ ދެ ބައްޔަކީ ލޭމައްޗަށްދިއުމާއި ހަކުރު މަތިވުމެވެ. މި ދެކަންތައް ނުވަތަ މިތަނުން ކަމެއް ކުރިމަތިވެފައިވާ މާބަނޑު އަންހެނުން މިކަންކަން ހަމައިގައި ހިފެހެއްޓުން ވަރަށްވެސް މުހިންމެވެ. މާބޮޑަށް ބަރު އަދި މާބޮޑަށް ލުއި މީހުންނަކީވެސް މިކަމުގެ ބިރު އޮތްބައެކެވެ. އެހެން ކަމުން އެކަށޭނަ މިންވަރެއްގައި ބަރުދަންހިފަހައްޓަންވެސް ޖެހޭނެއެވެ.
ދުވަސްނުފުރާ ވިހެއުމަށް މެދުވެރިވާ ސަބަބުތަކުގެ ތެރެއިން އެންމެ އާންމު އަދި އެންމެގިނަ މާބަނޑު އަންހެނުންނަށް ދިމާވާ ކަމެއްކަމަށް ޑަކްޓަރުން ފާހަގަ ކުރާ ކަމަކީ ގިނަ ކުދިންނަށް ބަލިވެ އިނުމެވެ. ނުވަތަ ގިނަ ކުދިން ވިހާފައިވާ ވުމެވެ. މި ބަލައިލެވުނީ ޖުމުލަކޮށް ނުވަތަ އާންމުކޮށް ދުވަސްނުފުރާ ވިހަން މެދުވެރިވާ ސަބަބުތަކާއި އެކަމުގެ ފުރުސަތު ނުވަތަ ބިރު ބޮޑު މީހުންނަކީ ކޮންބައެއްކަމެވެ. އެހެންކަމުން މިކަންކަމަށް ސަމާލުވެ ފަރުވާތެރިވުމަކީ ކޮންމެ މާބނަޑު އަންހެނެއްގެ ޒިންމާއެކެވެ.