ދަރިން ތަރުބިއްޔަތު ކުރުމަކީ އެއްވެސް ޒަމާނެއްގައި އެއީ ފަސޭހަ ކަމަކަށް ވެފައި އޮތް ކަމެއް ނޫނެވެ. ދަރިން ހެޔޮ ގޮތުގައި ތަރުބިއްޔަތު ކުރުމަށް އެކި ދުވަސްވަރު އެޅިފައި އޮންނަނީ އެކި ކަހަލަ ހިޔަނިތަކެވެ. އަދި މިކަމުގައި އެކި ބެލެނިވެރިން ކުރިމަތިލާން ޖެހޭ ކަންކަން ތަފާތުވެސް ވާނެއެވެ.

ތުއްތު ކުދިންގެ ވިސްނުން ތަރައްޤީ ކުރުމަށާއި، އެ ކުދިން ލޯ ހުޅުވެމުންދާ މާހައުލު އެކުދިންނަށް ދަސްކޮށް ދޭން ބޭނުން ކުރަން ޖެހެނީ ހަމައެކަނި ވާހަކައެއް ނޫނެވެ. ކުޅޭ އެއްޗެއްސާއި، ޤުދުރަތީ މަންޒަރާއި، ބޮޑެތި މީހުންގެ ޙަރަކާތްތަކަކީ ވަސީލަތެއްގެ ގޮތުގައި ބޭނުން ކުރާން ޖެހޭނޭ ތަކެއްޗާއި ކަންކަމެވެ.

ކުޑަކުއްޖާ ބޮޑުވަމުން އަންނަ އިރު ކުޅިވަރު ކުޅުމުގައި އެކުއްޖާ ގިނަ ވަގުތުތަކެއް ހޭދަކުރާނެއެވެ. އެކުދިންނަށް ކުޅެން ދެވޭ އެއްޗަކުން އެ ކުދިންނަށް ކުރާ އަސަރުގެ މައްޗަށް ވިސްނާލުމަކީވެސް މުހިންމު ކަމެކެވެ. މި ޒަމާނުގެ ފެންވަރު ރަނގަޅު ކުޅޭ ކުޅޭ އެއްޗިއްސަކީ ކުދިންގެ ސިކުނޑި ހަގީގަތުގައި ތަރައްގީ ވާން ޖެހޭ މިންވަރަށް ތަރައްގީ ވުމުގައި އެހީތެރިވެދޭ އެއްޗެހި ކަމުގައި ބުނެވޭކަށް ނެތެވެ. އާދޭހެވެ! މިސާލަކަށް ބެޓެރި ލައްވައިގެން ނުވަތަ ރިމޯޓަކުން ކޮންޓްރޯލް ކޮށްގެން ދުއްވާ ކާރެއްގެ ސަބަބުން ކުއްޖެއްގެ ސިކުނޑި ތަރައްގީ ވެދާނެއެވެ. ކާރަކީ ކިހިނެއް މަސައްކަތްކުރާ އެއްޗެއްކަން ވިސްނިދާނެއެވެ. ނަމަވެސް އެއަށްވުރެ ދުރަކަށް އެ ކުދިންނަކަށް ނުވިސްނޭނެއެވެ. މިއާއި ހިލާފަށް ޚާއްޞަ ސިފައެއް ނެތް އެއްޗެއް ކުއްޖެއްގެ އަތަށް ދިނުމުން އެ ކުއްޖާ އަމިއްލަ އަށް އެ އެއްޗަކުން ކުރާނޭ ބޭނުމަކާއި ނުވަތަ ކުރެވޭނޭ ކަމަކާއި މެދި ވިސްނާނޭ ޖާގަ ދެވުނީއެވެ. ބައެއް ފަހަރަށް އެއީ މަތިންދާ ބޯޓެކޭ ކިޔާފައި އުދުއްސާނެއެވެ. ނުވަތަ ބައެއް ފަހަރަށް އެ އެއްޗެއް ވެގެން ދާނީ ބޯއްޓަކަށް ނުވަތަ ދޯންޏަކަށެވެ. ނުވަތަ މި ނޫނަސް މި ފަދަ ހިޔާލީ އެއްޗަކަށެވެ. އެހެންވީމާ ކުދިންގެ އަތަށް މި ފަދަ އެއްޗެހި ދިނުމުން އެކުދިން އަމިއްލަ ނަފްސުން ވިސްނާ ގޮތްނިންމުމާއި އެކު އަމިއްލަ ނަފްސަށް ކުރާ އިތުބާރު ބޮޑުވެގެން ދެއެވެ.

މި ނޭވާގައި އިތުރު އެހެން ނުކުތާއަކަށް ބަލައިލާނަމެވެ. އެއީ ކުޅޭ ކުޅޭ އެއްޗެއް ލިބުމާއި އެކު އެ ކުދިން އެޔަށް ހަދާ ގޮތުގެ މައްޗަށެވެ. ގިނަފަހަރަށް ކުޅޭ އެއްޗެހި ވެގެންދަނީ އެކުދިން "ކުޅޭ" އެއްޗަކަށެވެ. މިސާލަކަށް ރިމޯޓު ކާރެއް ފަދަ އެއްޗެއްގެ ހަގީގީ ބޭނުން ހިފޭނީ ރިމޯޓުން ދުއްވައިގެންނެވެ. ނަމަވެސް އެ ކުއްޖާ އެ ކާރު އަތުން ކޮށްޕުމާއި، އުކުމާއި އަދި އެއްލައިލުން ފަދަ ކަންކަން ކުރާނެއެވެ. ހަމަ އެފަދައިން އެކުދިންނަށް ގެނެސްދޭ އެހެންކަހަލަ ކުޅޭ ސެޓެއް ނަމަވެސް އޭގައި ހުންނަ ސާމާނުތަކުން ހަގީގަތުގައި ކުރަން ޖެހޭ ބޭނުމުގެ އިތުރުން އެތައް ކަމެއް އެ ކުއްޖާ އެ ކުޅޭ އެއްޗަކުން ކުރަން ބޭނުން ވާނެއެވެ. ހަގީގަތުގައި މިކަމުން މި ދޭހަ ކޮށްދެނީ އެ ކުއްޖާގެ ވިސްނުން އެ ކުޅޭ އެއްޗަށްވުރެ ދުރަށް ވިސްނޭ ކަމެވެ. ނަވެސް ވަކި ހާއްސަ ކަމެއް ނުވަތަ ވަކި ހާއްސަ ސިފައެއް ހުންނަ ކުޅޭ އެއްޗެއް ކަމުން އެ ކުއްޖާއަށް އެއިން އިތުރު ބޭނުމެއް ކުރާން ވިސްނުމަކީ ކޮށިކަމަށް ވެދެއެވެ. ނަމަވެސް ހާއްސަ ސިފައެއް ނެތުމުން، އެއިން އެކި ހިޔާލު ތަރައްގީކޮށް އެކި ފަހަރު އެކި ކަންކަމަށް އޭގެ ބޭނުން ކުރަމުން ދެއެވެ.

އާދޭހެވެ! މިއާއި ދެކޮޅަށްވެސް ވާހަކަ ދެއްކުމާއި ހިޔާލު ފާޅު ކުރެވުމަކީ ހަމަ ވުން ގާތް ކަމެކެވެ. ނަމަވެސް މިއީ ވެސް މިކަމުގައި ކަން ވާނޭ ގޮތެކެވެ. ބެލެނިވެރިންނާއި، މުދައްރިސުން މިކަންކަމަށް ފަރުވާތެރި ވާން ވާނެއެވެ. އެމީހެއްގެ ދަރިފުޅަށް އެންމެ ރަނގަޅު ގޮތް ކޮންމެ ބެލެނިވެރިއަކުވެސް އިހްތިޔާރު ކުރަންވާނެއެވެ. ހަމަ އެކަނި ކުއްޖާ މައްސަލާ ކުރުމަށް ވިސްނުމުގެ ބަދަލުގައި ކުއްޖާގެ ހިޔާލާ ފިކުރު ތަރައްގީ ކުރަންވެސް ވިސްނަން ވާނެއެވެ.

އިސްވެ މިދެންނެވި ފަދައިން ހާއްސަ ސިފައެއް ލިބިގެންވާ ކުޅޭ އެއްޗަކާއި ހާއްސަ ސިފައެއް ލިބިގެން ނުވާ ކުޅާ އެއްޗެއް ކުއްޖާގެ އަތަށްދީ، ކުއްޖާގެ އަމިއްލަ ވިސްނުމާއި ހިޔާލު އެކަމެއްގެ މައްޗަށް އިސްކުރަނީ ކޮން ކަމެއްތޯ ބަލާ، އެކުދިން އަމިއްލަ އަށް ގޮތްނިންމަން ދަސްކުރޭތޯ އަމިއްލައަށް ބަލައިލާ ތަޖުރިބާކޮށްލުން ކީއްތޯއެވެ؟