އެސްޓީއޯ އިން 2022 ވަނަ އަހަރަށް ތައްޔާރުކުރި ޚާއްޞަ ކަލަންޑަރު ތަޢާރަފުކޮށްފިއެވެ. އެސްޓީއޯ އިން މިއަދު ހަވީރު އާޓިފިޝަލް ބީޗްގައި ބޭއްވި ކުޑަކުދިންގެ ހަވީރުގައި އެ ކަލަންޑަރު ތަޢާރަފުކޮށްދެއްވީ އެ ކުންފުނީގެ ސީއީއޯ އަދި މެނޭޖިން ޑިރެކްޓަރ ޙުސެއިން އަމްރު މުޙައްމަދު ރަޝާދެވެ.

އެސްޓީއޯގެ ހުނަރުވެރި މުވައްޒަފުން ފަރުމާކުރާ ޚާއްޞަ ކަލަންޑަރެއް ކޮންމެ އަހަރަކު ވެސް އެސްޓީއޯ އިން ތަޢާރަފުކުރެއެވެ. އެގޮތުން 2022 ވަނަ އަހަރުގެ ކަލަންޑަރުގައި އެކުލެވިގެން ވަނީ ވަރަށް ދިވެހިވަންތަ ތަސައްވުރެކެވެ. އެސްޓީއޯ އިން ބުނި ގޮތުގައި މިއީ ދިވެހި އަދަބީ ބަސްތައް ދިރުވައި އާލާކުރުމުގެ މަޤުޞަދުގައި ތައްޔާރުކޮށްފައިވާ ކަލަންޑަރަކެވެ. އަދި މި ކަލަންޑަރުގެ ގަނޑުތަކުން ޚިޔާލީ ދުނިޔެއަކަށް ފީނާލެވޭނެއެވެ.

މި އިވެންޓްގައި އެސްޓީއޯ އިން ވަނީ ކުޑަކުދިންނަށް ޚާއްޞަ އަދަބީ ބަސް އެކުލެވޭ ފޮތެއް ވެސް ނެރެފައެވެ. އެސްޓީއޯ އިން ބުނި ގޮތުގައި މި ފޮތް ނެރުމުގެ މަޤުޞަދަކީ ދިވެހިބަސް ދިރުވައި އާލާކުރުމެވެ. މި ފޮތް ނެރެދެއްވީ ދިވެހިބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަޙީމެވެ.

މި ރަސްމިއްޔާތުގައި ވާހަކަފުޅުދައްކަވަމުން އަމްރު ވިދާޅުވީ ދުނިޔޭގެ އެހެން ޤައުމުތަކުގެ ބަސްތަކުގައި ވެސް އަދަބީބަސް ބޭނުންކޮށް އުޅޭ ކަމަށެވެ. އަދި އެފަދަ ބަސްތައް އުފެދިފައި ހުންނަނީ ވަރަށް ގިނަ ބައެއްގެ ތަޖުރިބާތަކުގެ ތެރެއިން ކަމަށެވެ. 2022 ވަނަ އަހަރުގެ ކަލަންޑަރު އަދަބީބަހަށް ޚާއްޞަކޮށްގެން ނެރެން ނިންމީ މިހާރު ދިވެހިންގެ ތެރޭގައި ބޭނުންކުރެވޭ ހަރުބަސްތަކާއި، މިސާލުބަސްތަކަކީ ވަރަށް ކުރީއްސުރެ އުފެދިގެން އައިސްފައިވާ ބަސްތަކެއް ނަމަވެސް، ދުނިޔެ ބަދަލުވެ، އާ ޚިޔާލާއި، އާ ކަންތައްތަން ތަޢާރަފުވަމުން އަންނަ އިރު އަދަބީބަހަކީ ވެސް އާ ވަމުން އަންނަ އެއްޗަކަށްވުމަކީ މުހިއްމުކަމެއްގެ ގޮތުގައި ދެކޭތީއެވެ. އަދި އާ ހަރުބަސްތަކާއި މިސާލުބަސްތައް އިތުރަށް އުފައްދަންޖެހޭ ކަމަށް ވެސް އަމްރު ވިދާޅުވިއެވެ.