އިންޑިޔާގައި ކުއްތާތަކެއްގެ ޝިކާރައަކަށްވެ އުމުރުން 3 އަހަރުގެ ކުޑަ އަންހެން ކުއްޖަކު މަރުވެއްޖެއެވެ. އެގައުމުގެ ރިޕޯޓުތައް ބުނާގޮތުން އެކުއްޖާއަށް ހަމަލާދީފައިވަނީ ތިން ކުއްތާއެކެވެ. އިންޑިޔާގެ ނިއުދިއްލީގައި ހިނގި މިހާދިސާ އާއި ގުޅިގެން އެ ސަރަހައްދުގެ ޕޮލިހުން ބުނާ ގޮތުގައި އެ ކުޑަކުއްޖާ އޮތީ "ކާލާފައެވެ".
ރިޕޯޓުތައް ބުނާގޮތުން އެ ކުއްޖާއަށް ކުއްތާތަކެއް ހަމަލާދިނީ އެކުއްޖޭގެ ބައްޕަ އާއި އެކު ޕާކަކަށް ގޮސް އުޅެނިކޮށެވެ. އެކުއްޖާގެ ބައްޕައަކީ އެ ޕާކު ބަލަހައްޓާ މީހެކެވެ. ކުއްތާތަކުގެ ހަމަލާތަކާއި އެކު އެ ހަމަލާތަކުން އެކުއްޖާ ސަލާމަތް ކުރެވުނުއިރު އެކުއްޖާ އޮތީ ލެޔާއި ތަތްތެޅިފައެވެ. އެއާއި އެކު އެ ސަރަހައްދުގައި ހުރި އޭބީޖީ ހޮސްޕިޓަލަށް އެކުއްޖާ ވަނީ ގެންދެވިފައެވެ. ނަމަވެސް ހޮސްޕިޓަލުން މައުލޫމާތުދޭ ގޮތުގައި އެކުއްޖާ ހޮސްޕިޓަލަށް ގެންދެވުނު އިރުވެސް އެކުއްޖާ އޮތީ މަރުވެފައެވެ.
ފުލުހުން ދަނީ މިކަން ހިނގައިދިޔަ ގޮތެެއް ތަހުގީގު ކުރަމުންނެވެ. އެ ސަރަހައްދުގައި އުޅޭ ބައެއް މީހުން ބުނާގޮތުގައި އެ ކުއްތާ ތަކަކީ މީގެ ކުރިން އެ ސަރަހައްދުން ނުފެންނަ ކުއްތާ ތަކެކެވެ.
އިންޑިޔާގައި ކުއްތާ އަކީ އާންމު ޖަނަވާރަކަށް ވާއިރު ކުއްތާގެ ފަރާތުން އަނިޔާލިބި ފަރުވާ ހޯދާމީހުން މަދެއް ނޫނެވެ. އެގޮތުން އެވްރެޖުކޮށް ކޮންމެ އަހަރަކު 150 އަށް ވުރެ ގިނަ މީހުން ކުއްތާގެ ހަމަލާތަކަށް ފަރުވާހޯދަން އޭބީޖީ ހޮސްޕިޓަލަށް އަންނަކަމަށް އެ ހޮސްޕިޓަލުން މައުލޫމާތު ދެއެވެ.