ދުނިޔޭގައި ކަންކަން ހިނގަމުންދާ ގޮތުން ބައެއްކަންކަން ހާސިލް ކުރުމަށްޓަކައި އިންސާނާ، ކަންކަމުގެ ނިޒާމުން އެއްކިބާވާ މަންޒަރު ފެނެއެވެ. އެކަންކަމުގައި އޮންނަ ހަމައާއި އުސޫލުން ބޭރުން އެތައް ކަމެއް ކުރާތީ ދެކެމެވެ. މިފަދައިން ކަންކުރާ މީހުންގެ އަދަދު އެހާމެ ގިނަވެސްމެއެވެ. ނަމަވެސް ހިތާމައަކީ މި ކުރެވޭ ކަމަކީ ކިހާވަރެއްގެ ކަމެއްކަން އެކަން ކުރާމީހުންނަށް އިހުސާސް ނުވާކަމެވެ. ހަމަ ގައިމު އިހުސާސް ނުވިނަމަވެސް އެކަން އެނގޭނެކަން ޔަގީނެވެ.

"ކޮރަޕްޝަން، ނިގުޅައިގަނެވެނީ ތިބާގެވެސް ހައްގު!" މިފަދައިން ޓީވީ ރޭޑިއޯތަކުން ކިޔާތީ އަޑުނާހާ މީހަކު މަދުވާނެއެވެ. ސުކޫލު މަދަރުސާ ތަކާއި އެކި އެކި މައުލޫމާތުދޭ ބައްދަލުވުންތަކުގައްޔާއި ދީނީ ދަރުސްތަކުގައި ކޮރަޕްޝަނުގެ ވާހަކަ ދެކެވޭލެއް މަދެއްވެސް ނޫނެވެ. ދިވެހިރާއްޖޭގެ ގާނޫނު ހަދާ މަޖީލީހުގައި ކޮރަޕްޝަނާއި ބެހޭގޮތުން ބޮޑެތި ވަރުގަދަ އެތައް ބަހުސެއް ވަނީ ކުރެވިފައެވެ. އެތައް ގާނޫނަކަށް އެތައް އިސްލާހެއް ހުށަހަޅާ ފާސްކޮށްފައިވެސް ވެއެވެ. ނުވިތާކަށް އެންޓި ކޮރަޕްޝަން ކޮމިޝަންގެ ނަމުގައި ކޮމިޝަނެއްވެސް ވަނީ އުފައްދާފައެވެ. ކޮންމެ އިންތިހާބަކާއި ދިމާކޮށް އެ އިންތިހާބުތަކަށް ވާދަކުރާ ކޮންމެ މީހަކުވެސް، ރައްޔިތުންގެ ތާއީދު ހޯދުމަށް ދައްކާ އެއް ވާހަކައަކީ ކޮރަޕްޝަން ހުއްޓުވާ ވާހަކައާއި ދެފުށް ފެންނަ ނިޒާމެއްގެ ވާހަކައެެވެ. އާދޭހެވެ! މިއީ ކޮރަޕްޝަނާއި މެދު ދިވެހިން ނުރުހޭކަމާއި ދެކޮޅުކަން ހާމަކޮށްދޭ އަލިގަދަ ހެކިތަކެވެ.

ކަންއޮތީ މިހެން ކަމުގައިވީނަމަވެސް ކޮރަޕްޝަންގެ ނުބައި ފަނި ނުވަންނަ މުއައްސަސާއެއް ނެތޭބުނުން ދޮގަކަށް ނުވާނެއެވެ. ހިދުމަތްތައް ހޯދުމުގައި ލަސްކަމެއް ނުވަތަ ދަތިތަކެއް ކުރިމަތިވާ ކޮންމެ ފަހަރަކު ނުވަތަ ހިދުމަތެއް ހޯދަން ޖެހޭ ކޮންމެ ފަހަރަކު ގިނަ މީހުންނަށް ހުޅުވެނީ މިދެންނެވި ކޮރަޕްޝަނުގެ ދޮރެވެ. މިއީ ހިތާމަހުރި ކަންކަމެވެ.

ކޮރަޕްޝަނުގެ ވާހަކަ ދެކެވޭއިރު އެންމެނަށް އެއްހަމައެއްގައި ލިބިދޭ އަސާސީ ހިދުމަތްތަކުގެ ތެރޭގައި ކޮރަޕްޝަން ހިންގުމަކީ އަމުދަކުން ބަލައިގަނެވޭނޭ ކަންކަމެއް ނޫނެވެ. އެގޮތުން ފާހަގަކޮށްލެވޭ އެއްކަމަކީ އާސަންދައިގެ ނިޒާމުގެ ވާހަކައެވެ. މިއީ ކިތަންމެ ފުރިހަމަ ކިތަންމެ ކާމިޔާބު ހިދުމަތެއް ނަމަވެސް މި ހިދުމަތުގެ ތެރެއަށްވެސް ކޮރަޕްޝަންގެ ފަނި ވަނުމުން އެ ނިގުޅައިގަނެވެނީ ކިތައް ކިތައް މީހުންގެ ހައްގުތޯ ވިސްނާލެވޭ ހެއްޔެވެ! އެއްބަޔަކު އާސަންދަ ނުލިބި އެގޮތް މިގޮތަށް އެކޮޅު މިކޮޅަށް ދުވެ ހަދާއިރު، އަނެއްބަޔަކު ކޮށްލާ އެންމެ ފޯނު ކޯލަކުން މިކަން ހަމަޖެހޭ އުސޫލަކީ ހަޑިމުޑުދާރު ނަޖިސް އުސޫލެކެވެ. މިއީ މިފަދަ އަސާސީ ހިދުމަތްތަށް ހިނގަން ވާނޭ އުސޫލެއް ނޫނެވެ. މި ބަލައިލެވުނީ މިފަދަ އެއް ނިޒާމަށެވެ. މިފަދަ ކިތައްމެ ނިޒާމެއްގައި މިފަތަ ކިތައްމެ ހާލަތްތަކެއް ވާނޭކަން ޔަގީނެވެ.

ބުއްދި ސަލާމަތުން ހުރި ކޮންމެ މީހަކަށް ކޮރަޕްޝަން ހިންގުމަކީ ނުބައި ކަމެއްކަން އެނގޭނެއެވެ. ނަމަވެސް މޮޅުކަމާއި ބޮޑާކަމާއި އެކު މާލީ ތަނަވަސްކަން ހުރުމާ، އާރާއި ބާރު އޮތުމުން ދުނިޔެ ހިތަކަށް ލިބިފައި ތިބޭކަހަލައެވެ. މަރުވާނޭ ކަމާއި، ސުވާލު ކުރެވޭނޭކަން ހަނދާނުގައި ނުހުންނަނީއެވެ. ކޮރަޕްޝަނުގެ ވަގުތީ ފައިދާ ފެންނަން އޮތަސް އެއިން ލިބޭނޭ ދާއިމީ ގެއްލުން އިހުސާސް ނުކުރެވެނީއެވެ. މިއީ ކޮންމެ މީހަކުވެސް ވިސްނާ ފިކުރު ކުރުން މުހިންމު ކަމެކެވެ.