ދުނިޔޭގެ އެކިއެކި ކަންކަމާއި ބެހޭގޮތުން ދެކެވޭ ބައެއް ވާހަކަތަކަކީ އިންސާނުން އެވާހަކަތަކެއް ގަބޫލު ކުރުމާއި ނުކުރުމުގައި ހިލާފުތަކެއް އުޅޭ ކަންކަމެވެ. އެގޮތުން "ޑައިނަސޯރ" އަކީ ބައެއް މީހުން ގަބޫލު ކުރާ އަދި އަނެއްބައި މީހުން ގަބޫލު ނުކުރާ އެއްޗެކެވެ. ނަމަވެސް ސައިންސުވެރިންނާއި އާކިއޮލޮޖިސްޓުން ވަނީ އެކަން ސާބިތުކޮށްދޭފަދަ އެތައް ހެކިތަކެއް ދުނިޔޭގެ ބިމުގެ އަޑިން ހޯދާފަައެވެ.
ބޮޑެތި ދިރޭ ތަކެތީގެ ކަށިތައް ކަމަށް ބެލެވޭ ކަށިތަކެއް ހޯދާ އެ ކަށިތައް އަތުރާ ތަރުތީބުކޮށްގެން އެއިން ދިރޭ އެއްޗެއްގެ ސިފަ ގެނެއެވެ. އެއާއި އެކު އެއީ ކޮންމެވެސް ޒަމާނެއްގައި މި ދުނިޔޭގައި އުޅެފައިވާ ބާވަތެއްގެ ދިރޭ އެއްޗެއްކަމަށް އެބައިމީހުން ބުނެއެވެ. މިފަދައިން އެތައް ވައްތަރެއްގެ ޑައިނަސޯ އެއް ވަނީ އާކިއޮލޮޖިސްޓުން ހޯދާ އެ އެއްޗެއްސަށް އެކި ނަންނަން ދީފައެވެ. އޭގެތެރޭގައި އެއްގަމުގައި ފަތްކައިގެން އުޅޭ ޑައިނަސޯރ އާއި އެއްގަމުގައި ޝިކާރަކޮށްގެން ކައި އުޅޭ ޑައިނަސޯރ އުޅެއެވެ. އަދި އުދުހޭ އެއްޗެއްސާއި ކަނޑުގައި ފީނާ އުޅޭ ޑައިނަސޯރ ވެސް އުޅެއެވެ.
އެކި ދުވަސްވަރު ދުނިޔޭގެ އެކި ހިސާބުތަކުން ސައިންސުވެރިން ދަނީ މިފަދަ އެތައް ހެއްކެއް ނުވަތަ ކައްޓެއް ހޯދަމުންނެވެ. އެގޮތުން ސައިންސުވެރިން މި ވަނީ ދަރި ވެފައިވާ ޑައިނަސޯރ ބިހެއްގެ "ނިޝާންތައް" ހޯދާފައެވެ. ޗައިނާގެ ދެކުނު ގަންޒޯއު އަވަށުން ފެނުނު މި ބިސް އޮތީ ދަރިވެ، ވިހަން ކައިރިވެފައި ކަމަށް ސައިންސުވެރިން ބުނެއެވެ. މި ބިހަށް ގާތްގަނޑަކަށް 66 މިލިއަން އަހަރުވެދާނޭ ކަމަށްވެސް އެމީހުން ބުނެއެވެ. މިއީ ދަތްނެތް "ތެރޮޕޮޑް" ނުވަތަ "އޮވިރަޕްޓޮރޯސާ" ނަމަކަށް ކިޔާ ޑައިނަސޯރގެ އާއިލާގެ ބިހެއް ނުވަތަ ދަރިއެއް ކަމަށް ވެއެވެ. އެގޮތުން މި ބިހަށް (ބިހުގައިވާ ދަރި ޑައިނަސޯއަށް) ބޭބީ ޔިންގް-ލިޔަން ގެ ނަމުން ވަނީ ނަން ދީފައެވެ.
މި ބޭބީ ޔިންގް-ލިޔަން ގެ ބިހުގެ ދިގުމިނުގައި 6.7 އިންޗި ހުއްޓެވެ. އަދި ބިހުގެ އެތެރޭގައި އޮތް ޑައިނަސޯގެ ދިގުމިނުގައި 10.7 އިންޗި ހުރިކަމަށްވެސް ސައިންސުވެރިން ބުނެއެވެ. މި ފެނުނު ދަރިވެފައިވާ ޑައިނަސޯގެ ބިހަކީ މިހާތަނަށް ފެނުނު މިފަދަ އެންމެ ސާފު ބިސްކަމުގައި ސައިންސުވެރިން ފާހަގަ ކުރެއެވެ. އަދިވެސް އެ ބިހުގައި އޮތް ޑައިނަސޯގެ ކަށިތަކުގައި ވެއްޔާއި ހިލަ ހުރިކަމަށާއި އިތުރަށް ސާފުކުރުމުން، އަދިވެސް މިއާއި ބެހޭ ގިނަ މައުލޫމާތު ތަކެއް ސާފުވާނޭ ކަމަށް ބެލެވެއެވެ.