ދުނިޔޭގެ ހަޔާތަކީ އަބަދު އެއްގޮތަކަށް އޮންނާނޭ ތަނެއް ނޫނެވެ. ދުނިޔެ ހިނގާނީ ތޮށަލި ދުޅައަށޭ ބުނެވެނީ މިސަބަބައްޓަކައެވެ. މިއީ ދުނިޔޭގައި އުޅޭ ކޮންމެ އިންސާނެއްވެސް ހަނދާނުގައި ބަހައްޓަންވީ ވަރަށްވެސް މުހިންމު ނުކުތާއެކެވެ. މިއީ އަހަރެމެންގެ ދާއިމީ ހަޔާތް ބާއްޖަވެރި ކުރުމަށްޓަކައިވެސް މި ވަގުތީ ހަޔާތުގައި ލިބިގަންނަން ޖެހޭނޭ ފިލާވަޅެވެ.

ތަނަވަސްކަމާ މުދާ ވެރިކަމުގައި އަބަދު އިންސާނާއަށް ނުހުރެވިދާނެއެވެ. ކުރާނޭ ކަމެއް ނެތި، ދެކޮޅު ދެކޮޅަށް ހިނގަ ހިނގާ އަބަދަކު ނުހުރެވޭނެއެވެ. ގައިގަ ވަރު ހުރި ޒުވާނެއްގެ ގޮތުގައިވެސް އަބަދަކު ނުހުރެވޭނެއެވެ. ދުޅަހެޔޮ ސިއްހަތެއްގައިވެސް އަބަދަކުމެ ނުހުރެވޭނެއެވެ. މިއީ ދުނިޔެ ހިނގާ ގޮތެވެ. ވިސްނާ ފިކުރުކުރާ ބަޔަކަށް ނޫނީ ފިލާވަޅެއް، އިބުރަތެއްވެސް ނުލިބޭނެއެވެ.

އާދޭހެވެ! އިސްލާމް ދީނަކީ ހުރިހާ ޒަމާނަކަށް، އަދި ކިއެއް، ހުރިހައި އިންސީންނަކާއި ޖިންނީނަކަށް އައިސްފައިވާ ފުރިހަމަ ރިސާލަތެކެވެ. މި ދީނުގެ މައިގަނޑު ދެ މަސްދަރުކަމުގައިވާ ކީރިތި ޤުރުއާނާއި މާތް ރަސޫލާގެ ސުންނަތަކީ އިންސާނާ މި ދުނިޔޭގައި އުޅެންވީ ގޮތުގެ މަގު ކުރުހައިދޭ މަގުޗާޓެވެ. މުސްލިމުންގެ ސަމުގާއެވެ. އަހަރެމެންގެ ދުސްތޫރެވެ. އެގޮތުން މާތް ރަސޫލާ ހަދީޘް ކުރައްވާފައިވާ ބަސްފުޅެއްގެ މާނަައިގައި ވެއެވެ. "ފަސްކަމެއް ވުމުގެ ކުރިން، ފަސްކަމެެއްގެ ފައިދާ ހެޔޮގޮތުގައި ލިބިގަންނާށެވެ. މުސްކުޅި ވުމުގެ ކުރިން ޒުވާން ކަމުގެ ފައިދާ ހެޔޮގޮތުގައި ލިބިގަންނާށެވެ. ބަލިވުމުގެ ކުރިން ދުޅަހެޔޮ ކަމުގެ ފައިދާ ހެޔޮގޮތުގައި ހިފާށެވެ. ފަގީރު ވުމުގެ ކުރިން މުއްސަނދިކަމުގެ ފައިދާ ހެޔޮގޮތުގައި ހިފާށެވެ. އަވަދިނެތިވުމުގެ ކުރިން ހުސްވަގުތުގެ ފައިދާ ހެޔޮގޮތުގައި ހިފާށެވެ. އަދި މަރުވުމުގެ ކުރިން ހަޔާތުގެ ފައިދާ ހެޔޮގޮތުގައި ލިބިގަންނާށެވެ."

މުސްކުޅިވެ ގައިބާރު ދެރަވުމަކީ ދުނިޔޭގައި އާދައިގެ އާންމު ދިރިއުޅުމެއް އުޅެން ދުނގަދޫވާނޭ ކަމެކެވެ. ޒުވާން ކަމުގައި ކޮށް އުޅުނު އެތައް ކަމެއް ނުކުރެވޭނޭ ކަމެކެވެ. އެހެން ކަމުން، މުސްކުޅިވެ ގައިގެ ބާރު ދެރަވުމުގެ ކުރިން، ޒުވާނެއްގެ ގޮތުގައި މި ބިންމަތީ އުޅެމުން ދާ ދުވަސްތަކުގެ ބޭނުން ހެޔޮގޮތުގައި ހިފަން ވާނެއެވެ. އިންސާނާގެ ސިއްހަތަކީވެސް ހަމަ މި މޭރުމުން، މި މީޒާނުގައި ކިރޭނޭ ކަމެކެވެ. އެހެންކަމުން ޒުވާން ދުވަސްވަރުގައްޔާއި، ދުޅަހެޔޮކަމުގައި ހެޔޮ އަމަލު ކުރުން ގިނަ ކުރަން ވާނެއެވެ. ހާއްސަކޮށް ކުޅަދާނަކަން ލިބިހުރި ޒުވާނާ، ޒުވާން ކަމުގައި ހައްޖުގެ ވާޖިބު އަދާކުރުންވެސް ވަރަށް މުހިންމެވެ.

ތަނަވަސްކަމާއި މުދާވެރިކަމަކީ އިންސާނާގެ ހިތް މޮޅުވެ ބޮޑާކަން ވެރިކުރުވަފާނޭ ކަމެކެވެ. ނަމަވެސް އެ ތަނަވަސްކަމާއި މުއްސަނދިކަމުގެ ބޭނުން ހެޔޮގޮތުގައި ނުހިފެނީސް އެ ތަނަވަސްކަން ބީވެ ހިނގައިދާނެއެވެ. އެހެންކަމުން މުއްސަނދިކަމުގައި ވީ ހިނދު، ހޭދަކުރުން ގިނަ ކުރުމާއި މުދަލުގައިވާ ފަގީރުންގެ ހައްގުތަކަށް ރައްކާތެރިވުން ވަރަށްވެސް މުހިންމެވެ.

އިންސާނާ ފަރުވާކުޑަކުރާ ކަންކަމުގެ ތެރެއިން އެންމެ އާންމު އެއް ކަމަކީ ނުވަތަ އެއްޗަކީ ހުސްވަގުތެވެ. ނަމަވެސް މި ހުސްވަގުތުގެ ބޭނުން އެންމެ އެދެވޭގޮތުގައި ހިފައިގެން ނޫނީ އަހަރެމެންނަށް، އަހަރެމެންގެ ދާއިމީ ހަޔާތް ބާއްޖަވެރިއެއް ނުކުރެވޭނެއެވެ.

ކަން މިހެން ހުރުމާއި އެކު އިސްވެ ދެންނެވުނު ހުރިހާ ކަމަކީވެސް މި ދުނިޔޭގައި އިންސާނާ ދިރިހުއްޓާ ކުރެވޭނޭ ކަންކަމެވެ. މަރުގެ މަލާއިކަތާ، ހާޒިރުވުމުން ދެން ކުރެވޭ ހަމަ އެއްކަމެއްވެސް ނޯންނާނެއެވެ. އެހެންކަމުން މަރުވާނޭކަން އަބަދުމެ ހަނދާންކޮށް، ދުނިޔޭގެ ހަޔާތުގެ ބޭނުން ހެޔޮގޮތުގައި ހިފަންވާނެއެވެ. އުހުރަވީ ހަޔާތްވެސް ބާއްޖަވެރިވާނީ މިފަދައިން މަސައްކަތް ކޮށްގެނެވެ.