މަދިރިއަކީ އޭގެ ސަބަބުން ނުރައްކާތެރި އެތައް ބައްޔެއް ފެތުރޭ ސުއިއްޕެއް. އެއީ އިންސާނުންނާއި އެހެން ދިރޭ ޖަނަވާރުންގެ ގައިން ލޭ ބޮއެގެން ދިރިއުޅޭ ސުއިއްޕެއް. މަދިރީގެ ތެރެއިން ލޭ ބޮއެ އުޅެނީ އަންހެން މަދިރި އެކަނި. އެއީ އޭތީގެ ހަށިގަނޑުގައި ބިސް އުފެއްދުމަށް ބޭނުންވާ ޕްރޮޓިން ހޯދުމަށް.

މަދިރި އޭގެ ޝިކާރައެއް ފެނުމުން، ދުރަކަށް ނުދާނެ. އޭގެ މަގުސަދު ހާސިލްވަންދެން ނޫނީ އޭތި އެ އެއްޗެއްގެ ޝިކާރައަކަށް ވަންދެން މަދިރި ހިތްވަރު ކުރާނެ. މަދިރި އޭގެ ޝިކާރަ ދެނެގަންނަނީ ވަރަށް އާދަޔާ ހިލާފު ގޮތަކަށް. މަދިރީގައި ބޮޑު ދެލޯ އިންނަ އިރު އެއިން ކޮންމެ ލޮލެއްގަައި އެތައް ސަތޭކަ، ކުދި ކުދި ލެންސުތަކެއް ހުރޭ. މިއަށް ކިޔަނީ "އޮމަޓިޑިއާ". މީގެ ސަބަބުން މަދިރިއަށް އެކި އޭންގަލްތަކުން ފެނުމުގެ ފުރުސަތު ލިބޭ. ނަމަވެސް މަދިރިއަކީ މާ ދުރު ފެންނަ ސުއިއްޕެއް ނޫން.

މަދިރިއަކީ އޭގެ ވަސް ދެނެގަތުމުގެ ހިއްސު ގަދަ ސުއިއްޕެއް. މިގޮތަށް މަދިރިއަކީ ވަރަށް ދުރުންވެސް ކާބަންޑައި އޮކްސަައިޑް ދެނެގަތުމުގެ ގާބިލުކަން ލިބިފައިވާ ސުއިއްޕެއް. އެގޮތުން 50 އާއި 150 އާއި ދެމެދުގެ ދުރުމިނަކުން އޭތި ކާބަންޑައި އޮކްސައިޑު ދެނެގަނޭ. ދެން އެ ވަހާއި ދިމާލަށް ދަތުކުރަމުންދޭ. އެގޮތުން ޝިކާރައާއި 20 އާއި 50 ފޫޓާއި ދެމެދުގެ ދުރުމިނަކަށް ކައިރިވުމުން މަދިރީގެ ލޮލަށް އެ އެއްޗެއް ފެންނަން ފަށާ. އެހިސާބުން އަބަދުވެސް މަދިރީގެ ލޮލުން އެ ޝިކާރައެއް ފެންނާނެ. (މާ ދުރުނުވާނަމަ). އެއާއި އެކު ޝިކާރައާއި ދުރަށް ނުގޮސް، ޝިކާރައިގެ ކައިރީގައި، ފުރުސަތަކަށް ބަލަބަލާ މަދިރި އެނބުރޭނެ.

މީގެ އިތުރަށް ޝިކާރައިގެ ހަށިގަނޑުން އުފެދޭ ނުވަތަ ބޭރުވާ ހޫނަކީވެސް މަދިރިއަށް ދެނެގަންނަން ފަސޭހަ އެއްޗެއް. އެގޮތުން ޝިކާރައާއި 5 އާއި 10 ފޫޓާއި ދެމެދުގެ ދުރުމިނަކުން ހޫނު ދެނެގަންނަން ފަށާ. އެހިސާބަތް ގާތްވެވުމުން އެ ހިސާބެއްގައި ދަނޑިވަޅަކަަށް ބަލަބަލާ މަދިރި އުދުހޭ. މިއީ މަދިރި އޭތީގެ ޝިކާރަ ހޯދާ ގޮތް. މަދިރި، އިންސާނުންވެސް ހޯދާނީ ހަމަ މިއުސޫލުން.