ުޖަޕާނުގެ ޓޯކްޔޯގައި ހުންނަ މެއިޖީ ޔުނިވަރސިޓީގެ ޕްރޮފެސަރެއް ކަމަަށްވާ މިޔާޝިތާ މިވަނީ ރަހަ ލާ ސްކްރީނެއް އުފައްދާފައެވެ. އެއީ ޓީވީ ސްކްރީނެއް ކަހަލަ ސްކްރީނެކެވެ. އޭގައި ދޫކާތާލުމުން އެއިން ރަހައެއް ދެއެވެ.
މި ވަސީލަތަށް ދެވިފައިވާ ނަމަކީ "ޓޭސްޓް ދަ ޓީވީ (ޓީ.ޓީ.ޓީ.ވީ)" އެވެ. މައިގަނޑު 10 ރަހައެއް ބޭނުން ބޭނުން ކޮށްގެން އުފައްދާފައިވާ މި ސްކްރީނުން އެތައް ބައިވަރު ރަހައެއް ދެއެވެ. އެ ރަހަތައް އުފެއްދުމުގައި ބޭނުން ކުރެވެނީ އެކި ރަހަތައް މަސްހުނި ކުރެވިގެންނެވެ.
ޕްރޮފެސަރ ވިދާޅުވާ ގޮތުގައި މި ޓެކްނޮލޮޖީގެ ސަބަބުން ދުނިޔޭގެ ކޮންމެ ހިސާބެއްގައި ތައްޔާރުކުރާ ކާ އެއްޗެހީގެ ރަހަ ބަލައިލެވޭނެ ކަމަށެވެ. އަދި މިއީ ގޭގައި ތިބެގެން ކާ އެއްޗެއްސަށް އޯޑަރު ދޭއިރުވެސް ވަރަށް މުހިންމު ޓެކްނޮލޮޖީއަކަށް މުސްތަގުބަލުގައި ވާނޭ ކަމަށެވެ. މި އުފެއްދުން ތަރައްގީ ކުރުމުގައި ޕްރޮފެސަރ މިޔާޝިތާ އާއި އެކު އޭނާގެ 30 ދަރިވަރުން ވަނީ ބައިވެރި ވެފައެވެ. އެގޮތުން އުމުރުން 22 އަހަރުގެ ޔުކި ހޮއު ވަނީ ރިޕޯޓަރުންނަށް ޓީ.ޓީ.ޓީ.ވީ ބޭނުން ކުރާނޭގޮތް ދައްކައިދީފައެވެ. ޔުކި ވަނީ މިލްކް ޗޮކޮލެޓްގެ ރަހަ ބަލައިލާފައެވެ.