ވަޒީފާތަކާއި މަސައްކަތްތަކަކީ މިއަދު އާއިލާ ތަކާއި އެކުގައި ތިބެގެން ކުރެވޭ ކަންކަމަކަށް ނުވެއެވެ. ވަޒީފާ އަދާކުރުމަށް އާއިލާއާއި ލޯބިވާ މީހުންނާއި ލޯބިވާ އުފަން ރަށް ދޫކޮށް އެހެން ތަންތަނުގައި ދުވަސްތައް ހޭދަކުރަންޖެހެއެވެ. މިއީ އަދުގެ ދުނިޔެ ތަމްސީލު ކުރަމުންދާ ކަންކަމެވެ. މިއީ މިޒަމާނުގައި ވަރަށް އާދައިގެ ކަމެކެވެ. ނަމަވެސް މިއީ ހަގީގަތުގައި "އާދައިގެ" ކަމެއް ނޫނެވެ. މި ހިއްސާކޮށްލަނީ އުމުރުން 4 އަހަރުގެ ކުއްޖަކު އެކުއްޖާގެ ބައްޕައާއި މުހާތަބުކޮށް ބުނި ވާހަކައެކެވެ.

އެއީ ރާއްޖޭގެ ދެކުނުގެ ރަށެކެވެ. ދެމަފިރިންނަށް ލިބި ތިބި 2 ދަރިން ކުރެ އެއް ދަރިއެވެ. އެ ކުއްޖާގެ މަންމަ އެ ކުއްޖާ އާއި އެކު އަބަދުވެސް ވަގުތު ހޭދަކުރެއެވެ. ނަމަވެސް އެކުއްޖާގެ ބައްޕައަކީ ރިސޯޓެއްގައި ވަޒީފާއަދާ ކުރާ މީހެކެވެ. ރިސޯޓުގައި ބުރަކޮށް މަސައްކަތް ކުރަނީ އެ އާއިލާއަަށް އުފާވެރިކަން ހޯދައިދޭށެވެ. އެ ދަރީންނަށް ހެޔޮގޮތް ތަނަވަސްކޮށްދޭށެވެ.

ރިސޯޓުގައި މަސައްކަތް ކުރުމުގެ ސަބަބުން އެ ބައްޕައަށް އެކުދީންނާއި އެކު ވަގުތު ހޭދަކުރެވޭ މިންވަރު ވަރަށްވެސް މަދެވެ. އާއިލާއަަށް ވަގުތު ދެވޭ މިންވަރުވެސް ވަރަށް ކުޑައެވެ. ނަމަވެސް މިއީ އާދައެއް ކަމުގައި ދެކެވި މި އުސޫލުން ދިރިއުޅުން ތަރުތީބު ކުރަމުން ދިޔައީ މިއީ އުފާވެރި ހަޔާތެއްކަން އިހުސާސް ކުރަމުންނެވެ. ނަމަވެސް މި އިހުސާސްތަކަށް ހިތާމައިގެ ތޫފާނެއް އެރީ އެ ދަރިފުޅު ސުކޫލުގައި ކުރެހި ކުރެހުމެއްގެ ސަބަބުންނެވެ. ގާތްގަނޑަކަށް ގުރޭޑު 2 ނުވަތަ 3 ގައި ކިޔަވަމުންދާ މި ދަރިފުޅު ސުކޫލުގައި ކުރެހީ އެކުއްޖާގެ އާއިލާއެވެ. އެ ކުރެހުމުގައި އެކުއްޖާގެ މަންމައާއި އެކުއްޖާގެ ކޮއްކޮއާއި އެކުއްޖާ ހުއްޓެވެ. ނަމަވެސް އު ކުއްޖާގެ ބައްޕައެއް ނެތެވެ. އެކަމާ މުދައްރިސް ސުވާލު ކުރުމުން އެ ދަރިފުޅު ދެއްކީ އެހެން ގަނޑެއްގައި ކުރަހާފައި އިން ކުރެހުމެކެވެ. އެއީ އެކުއްޖާގެ ބައްޕަ ކަމުގައި ބުންޏެވެ. އަދި ބައްޕަ އެއީ "ފެމެލީ" ކުއްޖެއް ކަމަށާއި އެކަމު ބައްޕަ އަކީ "ފެމިލީ" އާއި އެކުގައި އުޅޭ ކުއްޖެއް ނޫން ކަމަށް އެދަރިފުޅު ބުންޏެވެ. އެހެންވެ އެ ދަރިފުޅުގެ ބައްޕަ އެހެން ގަނޑެއްގައި ކުރެހީ ކަމަށް އެދަރިފުޅު ބުންޏެވެ.

މުދައްރިސް މި ވާހަކަ އެ ދަރިފުޅުގެ މަންމަ އާއި ހިއްސާކުރުމުން އެ މަންމަގެ ގާތަށް އެވަގުތު އައީ ހިންޏެވެ. އެކަން މަޖާ ކަމަކަށް ވެގެންނެވެ. ސަމާސާކޮށްލުމަށެވެ. ނަމަވެސް ހަމަ އެވަގުތު އެ މަންމަގެ ކައިރީގައި ހުރި އެ ދަރިފުޅު އަޑުން އަޑުނަގާ ރޯން ފެށިއެވެ. އެހެން ބެލެނިވެރިންނާއި ދަރިވަރުންގެ ތެރޭގައެވެ. އަދި ބައްޕަ އެ ދަރިފުޅާއި އެކުގައި ނޫޅޭ ވާހަކަ ބާރަށް ރޮމުން ކިޔަމުން ގެންދިޔައެވެ. އެ މަންމަ ލަދުން ހަލާކުވިއެވެ.

އެވާހަކަ އެ ދަރިފުޅުގެ ބައްޕަގެ ގާތުގައިވެސް އެ މަންމަ ހިއްސާ ކުރިއެވެ. ނަމަވެސް އެއީ އެ ދެމަފިރިން އުޅެން ގަސްތުކޮށްފައި އޮތް ދިރިއުޅުމެވެ. ކުރެވޭނޭ މާ ބޮޑު ކަމެއް ނެތެވެ. ހިތާމައަކީ އަދިވެސް އެ ދަރިފުޅު އެ ޝަކުވާ އެގޮތަށް ކުރާކަމެވެ. އެހިތާމައާއި ހިތްދަތިކަން އިހުސާސް ކުރާކަމެވެ. އެ މައުސޫމު ދަރިފުޅު ބައްޕަގެ ލޯތްބަށް އެދި ރޯކަމެވެ. އާދޭހެވެ! އެ ބައްޕަ އެ ދަރިފުޅު ދެކެ ލޯބި ނުވަނީއެއް ނޫނެވެ. ތަގުދީރު ނިޔާކުރި ގޮތެވެ. އުޅެން ޖެހިފައިވާ ދިރިއުޅުމެވެ.

މިއީ ގިނަ ދިވެހި އާއިލާ ތަކުގެ ހާލެވެ. ނަވެސް މިއީ އާންމު ހާލަތެކެވެ. ޖުމުލަކޮށް ހުރިހާ މަންމަ އަކާއި ދަރިންނެއް މި ދިރިއުޅުމަށް ރުހި ގަބޫލެވެ. ނަވެސް މިފަދަ ހިތާމަވެރި ހާދިސާތަށް މަދުމަދުން ނަމަވެސް ހިނގާ ކަމީ ހިތާމަ ހުރި ކަންކަމެވެ. މިއީ މައިންބަފައިން ސަމާލުވެ ވިސްނަން ޖެހޭނޭވެސް ކަމެކެވެ.