ބައެއްމީހުންނަކީ ވަކި ކަހަލަ ކަންކަމަށާއި ހުނަރުތަކަށް މޮޅު މީހުންނެވެ. އެއީ އެމީހުން އުފަންވުމުގައި އެފަދަ ހުނަރެއް އެމީހުންގެ ގައިގައި ހުރީތީއެވެ. ނުވަތަ އެމީހަކު ކުރި ބުރަ މަސައްކަތަކުން އެމީހަކު އެ ހުނަރެއް ހޯދީތީއެވެ. ކޮންމެއަކަސް އިންސާނުންގެ ތެރޭގައި މިފަދަ ހުނަރުވެރި އެތައް ބަޔަކު އުޅެމުން ދެއެވެ.

މީހަކު ކަމަކަށް ނުވަތަ ހުނަރަކަށް މޮޅުވުމީ އޭނާގެ ހިތް އެކަންކަމުގައި ތިރިވާން ޖެހޭނޭ ކަމެކެވެ. އާދޭހެވެ! ކާމިޔާބީގައި ހިތްތިރި ކުރާށޭ ބުނާ އުސޫލުންނެވެ. ނަމަވެސް މިފަދަ ހުނަރުވެރިން އެކަމުގެ ފަންނު ނުވަތަ ހުނަރު މަދު މީހުން ކައިރީގައި މޮޅު ދެއްކުމާއި ގަދަ ބަސްބުނާތީ ފެންނަނީ މަދެއްކޮށެއް ނޫނެވެ. މިފަދައިން ގަދަ ބަސް ބުނެ އުޅޭ އިރު އެ ބަހުގެ ކުރިއަށް ނުވަތަ ފަހަތަށް އިރާދައިގެ ލަފުޒެއް ބޭނުމެއް ނުކުރެވެއެވެ. ބައެއްފަހަރަށް ހީވާ ކަހަލައެވެ. ތިމާގެ މަށްޗަށް ހިނގަނީ ތިމާގެ އަމުރެވެ.

އިންސާނާއަކީ ކިތަންމެ ހުނަރުވެރި މޮޅު މީހެއް ކަމުގައި ވީ ނަމަވެސް، އޭނާ އަށް މޮޅު ނުވަތަ ތަފާތު ކަމެއް ކުރެވޭނީ މާތް ﷲ އެކަމަކަށް އިރާދަ ކުރެއްވީމާއެވެ. މޮޅު މީހާ، ގަދަވެފައި، "ލާހިކެއް ނޫނޭ"، "ހަމަ ޔަގީނޭ"، "ނިކަން ކެރެންޏާއޭ"، ނުވަތަ ކޮންމެވެސް ހުތުރު ބަހަކުން ބަހެއް ބުނެފައި "ގަދަ" ވާތީ ދެކެމެވެ. "ކުރާނަމޭ" "ހަދާނަމޭ" "ނިންމާނަމޭ" ނިކަން ޔަގީން ކަމާއި އެކުގައި ބުނަނީ ކުޅަދުންވަންތަ އިލާހުގެ އިރާދަ، ހަނދުމަ ނެތިއެވެ. މިއީ ހިތާމަ ހުރި ކަމެކެވެ. މިއީ އޭގެ ސަބަބުން އިންސާނާ އެ "ކަނޑަން އުޅޭ ފޮނި" ނުކެނޑި ބޭޒާރުވެ ފަލީހަތްވެސް ވެދާނޭ ކަމެކެވެ.

ކީރިތި މާތް ނަބިއްޔާގެ ހަޔާތްޕުޅުގައި މި ފިލާވަޅު ވަނީ މުޅި އިންސާނިއްޔަތަށްޓަކައި ދެއްވާފައެވެ. މައްކާގެ މުޝްރިކުން އެކަލޭގެފާނުގެ އަރިހަށް ސުވާލަކައިގެން އައި ހިނދު، މާދަމާ ޖަވާބު އަރުވާނޭ ކަމަށް ރަސޫލާ ހަދީޘް ކުރެއްވީ އިރާދައިގެ ބަސް ބޭނުންފުޅު ނުކުރައްވަވައެވެ. މިކަމުގެ ފިލާވަޅެއްގެ ގޮތުގައި މާތް ﷲ ގެ ވަޙީ، އިތުރު އެކަލޭގެފާނަށް ބާވާ ނުލައްވާތާ 15 ދުވަސް ފާއިތުވިއެވެ. މާތް ނަބިއްޔާ އެކަމާއި މާޔޫސްވެ ހިތާމަފުޅު ކުރައްވަމުން ގެންދަވަނިކޮށް 15 ދުވަސް ފަހުން ސޫރަތުލް ކަހްފުގެ އާޔަތްތަކެއް ބާވައިލެއްވިއެވެ. އެ އާޔަތްތަކުގައި ވަނީ އެކަމުގެ ތަފްސީލުތަކެވެ. ﴿23﴾ وَلَا تَقُولَنَّ لِشَيْءٍ إِنِّي فَاعِلٌ ذَٰلِكَ غَدًا. ﴿24﴾ إِلَّا أَن يَشَاءَ اللَّهُ ۚ وَاذْكُر رَّبَّكَ إِذَا نَسِيتَ وَقُلْ عَسَىٰ أَن يَهْدِيَنِ رَبِّي لِأَقْرَبَ مِنْ هَٰذَا رَشَدًا . "އަދި ކަލޭގެފާނު އެއްވެސްކަމަކާ ދޭތެރޭގައި، ހަމަކަށަވަރުން، ތިމަންކަލޭގެފާނު މާދަމާ އެކަމެއް ކުރައްވާނަމޭ ވިދާޅުނުވާހުށިކަމެވެ! (23)

اللَّه އިރާދަކުރެއްވިއްޔާއޭ ވިދާޅުވެފައި މެނުވީއެވެ. އަދި ކަލޭގެފާނު ހަނދުމަފުޅުނެތިއްޖެ ހިނދެއްގައި، ކަލޭގެފާނުގެ ވެރިރަސްކަލާނގެ ހަނދުމަ ކުރައްވާށެވެ! އަދި ކަލޭގެފާނު ވިދާޅުވާށެވެ! އަޅުގެ ވެރިރަސްކަލާނގެ މިއަށްވުރެ ކައިރި ތެދުމަގަކަށް މިއަޅާއަށް މަގުދައްކަވައިފާށިއެވެ! (24)."

މިއީ އިސްވެ ގޮސްފައިވާ ފާފަތަކާއި ދެންއަންނާން އޮތް ފާފަތައް ފުއްސަވާފައިވާ މި ބިންމަތީގަައި ހުރި އެންމެ މާތް އިންސާނާ، އަދި ނަބީކަމާއި ރަސޫލުކަން ޙަތިމް ކުރެއްވި، އެންމެފަހުގެ ރަސޫލާއެވެ. އެ ރަސޫލާގެ ހަޔާތްޕުޅުގައި މިފަދަ ހާދިސާއެއް ހިނގާފައިވުމީ އަދުގެ ޒުވާނުން ވިސްނަން ޖެހޭނޭ ކަމެކެވެ. އެހެނީ އެއީ ރަސޫލާއެވެ. އަހަރެމެންނީ ލެއްވިއްޔާ ލެއްވިހާ ފާފައެއް ކުރެވޭ، އީމާން ތެރިކަން ކުޑަ، މާތް ﷲ އަށް ޝުކުރުވެރިނުވާ އިންސާނުން ތަކެކެވެ. ވީ ހިނދު، އެފަދަ "ގަދަ" ބަސްބަހުގައި އިރާދަ ނުލާ ބުނެވޭނަމަ، އެކަންކަން ނުވެ މި އިންސާނާ ހުންނަން ޖެހޭނީ ކިހާ ދުވަހަކުކަން މި ނިކަމެތި އިންސާނާ އެއްފަހަރުވެސް ވިސްނާލިން ތޯއެވެ؟ އާދޭހެވެ! ކުރާން އެދޭ ކޮންމެ ކަމެއްގައި މާތް ﷲ ގެ އިރާދައަށް އެދޭށެވެ. އެކަލާންގެ އިރާދަފުޅުން ނޫނީ ހަމަ އެއްކަމެއްވެސް މި ކާއިނާތުގައި ނުހިނގާނެއެވެ.