ޒަމާނަކީ ކިތަންމެ ތަހުޒީބު ޒަމާނެއްކަމުގައި ވީނަމަވެސް، ކިތަންމެ ދިރިއުޅުމުގެ ކަންކަން ބުރަ ޒަމާނެއްކަމުގައި ވިޔަސް، ދަރިންނާއި މައިންބަފައިންނާއި ދެމެދުގައި އޮންނަން ވާނީ ވަރަށްވެސް ގާތް ގުޅުމެކެވެ. މިއީ އިންސާނާ އުފަންވުމާއި އެކު ގުދުރަތީގޮތުން އުފެދޭ ވަރަށް ގާތް ގުޅުމެކެވެ. ނަމަވެސް ހިތާމައަކީ މިޒަމާނުގައި ދަރިންނާއި މައިންބަފައިންނާއި ދެމެދުގައި އޮންނަން ޖެހޭ މި ގުޅުން ވަރަށް ބޮޑަށް ހީނަރުވެ، ދުރުވެފައިވާ ކަމެވެ. މި ބަލާލަނީ ރާއްޖޭގައި ހިނގައިދިޔަ މިފަދަ ހަގީގީ ހާދިސާ އަކަށެވެ. 

ދިވެހިރާއްޖޭގެ އެންމެ ބޮޑު ހޮސްޕިޓާތަކުން ހޮސްޕިޓަލަށް ޑަކްޓަރަށް ދައްކަން ދިޔަ މީހެކެވެ. އުމުރުން ގާތްގަނޑަކަށް ފަންސާހުން މައްޗަށް ގޮސްފައިވާ އަންހެނެކެވެ. އޭނާގެ ފައިލުބޮނޑި ކިހިލި ޖަހައިގެން ހުރީ އޭނާގެ އަންހެން ދަރިފުޅެކެވެ. ޑަކްޓަރު ގެ ކޮޓަރީގެ ކުރިމަތީގައި ހުރި ގޮނޑިތަކުގައި މި ދެމައިން އިށީނދެލައިގެން ތިބީ އެމީހުންގެ ނަންބަރު ނުޖެހޭތީއެވެ. ނަންބަރުތައް އަރުވަމުންދާ ޓީވީ އާއި ދިމާލަށް ބަލަހައްޓައިގެން އެ މަންމަ އިނެވެ. ދަރިފުޅު އުނގުމަތީގައި ފައިލުތައް ބާއްވައިގެން ފޯނާ ކުޅެނީއެވެ. ނޭނގުމެއްގެ ތެރެއިން ފައިލެއް ހުޅުވި، އޭގެ ތެރެއިން ބޭސް ސިޓީއެއް ބިންމައްޗަށް ވެއްޓިފައި އޮތެވެ. އެމަންޒަރު ފެނުނީ މަންމައަށެވެ. އެ މަންމަގެ އިޝާރާތަކުން އެ ދަރިފުޅަށް އެ ބޭސްސިޓީ ފެނުނެވެ. ނަމަވެސް ބޯޖަހާލުމަށްފަހު އެ ދަރިފުޅު ފޯނުން އެކުރާ ކަމެއް ކޮށް ނިންމާލުމަށްފަހުގައި ނަގާނެ ކަމަށް ބުންޏެވެ. އެހެނަސް އެހެން ހުރަސްކޮށްލި މީހަކު އެ ބޭސްސިޓީ ނަގާ އެ މަންމަގެ އަތަށް ދިއްކޮށްލިއެވެ. މަންމަ ބަލިވެ ޑަކްޓަރަށް ދައްކަން ގޮސް، މަންމަގެ ކައިރީގައި ޖެހިގެން އިން އިރުވެސް މި ދަރިފުޅާއި މަންމަ އާއި ދެމެދުގައި ދުރުކަމެއް ހުރިކަން އިހުސާސް ކުރެވޭނެއެވެ.

ކޮންމެއަކަސް ނަންބަރުބޯޑަށް އެމީހުންހެ ނަންބަރު އަރައިފިއެވެ. އެއާއި އެކު އެދެމައިން ޑަކްޓަރުގެ ކޮޓަރިއަށް ވަނެވެ. ހުރީ ދިވެހި ޑަކްޓަރެކެވެ. އެހެންކަމުން ވާހަކަ ދެއްކުމުގައި މާ ބޮޑު އުނދަގޫކަމެއް ނެތެވެ. ނަމަވެސް ޑަކްޓަރު ގިނައިން ސުވާލު ކުރަނީ އިނގިރޭސިންނެވެ. އެހެންކަމުން ބައެއް ސުވާލުތަކުގެ ޖަވާބު ދެނީ ދަރިފުޅެވެ. އެގޮތަށް ޑަކްޓަރު ކުރި ސުވާލެކެވެ. އެއީ ދާއިމީ ބައްޔެއް ހުރޭތޯ ކުރި ސުވާލެކެވެ. އެސުވާލަށް އެދަރިފުޅަށް ފުރަތަމަ ދެވުނު ޖަވާބަކީ ނުހުންނަ ކަމަށެވެ. ނަމަވެސް ޑަކްޓަރު ތަކުރާރުކޮށް އެހުމުން އެދަރިފުޅު މަންމަގެ ގާތުގައި އެހިއެވެ. މަންމަ އަމުނާލީ ދިގު ލިސްޓެކެވެ. ހަކުރު ހުރެއެވެ. ބޭސް ކައެވެ. ލޭ މައްޗަށް ދެއެވެ. ބޭސް ކައެވެ. ކޮލެސްޓްރޯލު ހުރެއެވެ. ބޭސް ކައެވެ. ތައިރޮޑު ވެސް ހުރެއެވެ. ނަމަވެސް ބޭސްކާ ވަރެއް ނުވެއެވެ. މިއީ އެ މަންމަ ދިން ޖަވާބެވެ. 

އާދޭހެވެ! ބުނަން މިއުޅެނީ ދަރިންނާއި މައިންބަފައިން ދުރުވާ ވާހަކައެވެ. އެއީ މަންމަ އެވެ. އެ މަންމަގެ ހަށިގަނޑުގައި ބަލިތަކެއް ހުރިކަމާއި ބޭސްކަމުންދާކަން އެ ދަރިފުޅަކަށް ނޭނގުނެވެ. ވިސްނާލަ ބަލާށެވެ! އެއީ އެ ދަރިފުޅު ތަޅާލާ ކޮންމެ ކުހަކަށް އިޖާބަދިން މަންމައެވެ. ނަމަވެސް މިއަދު އެ މަންމަގެ ހަށިގަނޑުގައި ބަލިތަކެއް ހުރި އިރު، އެކަން އެ ދަރިފުޅަށް ނޭނގުނީއެވެ. ނުވަތަ ހަނދާން ނެތުނީއެވެ. މިއީ މައިންނާއި ނުވަތަ މައިންބަފައިިންނާއި ދަރިން ދުރުވެފައިވާ މިންވަރު ވަރަށް ސާފުކޮށް ދޭހަވާ ކަމެކެވެ. މިއީ އަދުގެ ޒުވާނުން ވިސްނަން ޖެހޭނޭ ބިރުވެރި މައްސަލައެކެވެ.