ޒިހާނަކީ އުމުރުން 6 އަހަރުގެ ކުއްޖެކެވެ. އެސޮރު ތައުލީމު ހާސިލު ކުރަމުން ދަނީ އެރަަށު މަދަރުސާގެ ގުރޭޑު 1 ގައެވެ. ކިޔެވުމާއި އުގެނުމަށް ޝައުގުވެރިކަން ހުންނަ ޒިހާނަކީ މަޑުމައިތި އެހެން ނަމަވެސް ސަކަ މިޒާޖެއްގެ ވެރި ދަރިއެކެވެ.

މިއީ މަދަރުސާގެ އިމްތިހާނެއް އޮތް ދުވަހެކެވެ. ފެންވަރާ މޫނުގައި ބޯކޮށް ފުއްޖަހާފައި ޒިހާނުގެ މަންމަ، ޒިހާނު މަދަރުސާއަށް ފޮނުވިއެވެ. މަދަރުސާއަށް ޒިހާނު ވަނުމާއެކު ޒިހާނުގެ އެހެން އެކުވެރީންނާއި ބައްދަލުވެ، އާދައިގެ މަތިން އެދުވަހުވެސް ޒިހާނު އިމްތިހާނަށް ދިޔައީ ހެމުން ސަކަރާތް ޖަހަމުންނެވެ. ދުވަހަކީ ޒިހާނުމެންގެ ދިވެހި އިމްތިހާނެއް އޮތް ދުވަހެވެ. ޒިހާނުގެ މަންމަ ވަނީ މި އިމްތިހާނަށް ޒިހާނު ވަރަށް ތައްޔާރު ކޮށްފައެވެ.

ކޮންމެ ކުއްޖަކަށްވެސް ހާއްސަ ކުރެވިފައި އިން ގޮނޑިއެއްގައި އެ ކުއްޖަކު އިށީނދެއްޖެއެވެ. މުދައްރިސް އިމްތިހާނު ކަރުދާސް ބަހައިފިއެވެ. މުދަރިސްގެ އިރުޝާދާއި އެކު ވަގުތު ޖެހުމުން ހުރިހާ ކުދިންވެސް އިމްތިހާނު ހަދަން ފެށިއެވެ. ޒިހާނުވެސް އެހެންކުދިންނެކޭ އެއްފަދައިން އިމްތިހާނު ހަދަމުން ދިޔައެވެ. އިމްތިހާނު ކަރުދާހުގެ އެއް ސަފްހާގައި އޮތީ އަކުރުން ފެށޭ އެއްޗެހި ކުރަހާށެވެ.

އެ ސަފްހާގެ މަސައްކަތް ޒިހާނު ކުރަމުން ދަނިކޮށް، ކާފުން ފެށޭ އެއްޗެެއް ކުރަހަން އިނެވެ. އެސޮރުގެ ހިތާއި ސިކުނޑިއަށް ކާފުން ފެށޭ ލަފުޒެއް ނުވަތަ އެއްޗެއް ހިތަށް ހަމަ ނައީ ތޯއްޗެކެވެ. އެސޮރު ދަމާލީ ހިމަ ހިމަ ރޮނގެކެވެ. އޭގެ ފަހުގައި އެސޮރު އިމްތިހާނު ހަދާ ނިންމާލައިފިއެވެ.

އިމްތިހާނުގެ ނަތީޖާ ދެއްކި ދުވަހެވެ. ޒިހާނުގެ މަންމަވެސް އިމްތިހާނުގެ ނަތީޖާ ބަލަން އައިސް ހުއްޓެވެ. ޒިހާނުގެ ކަރުދާސް ޒިހާނާއި ހަވާލުކުރަމުން މުދައްރިސް ސުވާލެއް ކުރިއެވެ. އެއީ ޒިހާނުގެ ކަރުދާސް ހުޅުވާލުމަށްފަހު އަކުރުން ފެށޭ ތަސްވީރު ކުރަހާ ސަފްހާ ދައްކާލަމުންމެވެ. ކާފުން ފެށޭ ތަސްވީރެއްގެ ގޮތުގައި އިނީ ރޮނގެއް ދަމާފައި ކަމަށާއި އެތަން އެހެން ހަދާފައި އެ ހުރީ ކީއްވެތޯ ޒިހާނާވެސް ސުވާލުކުރިއެވެ. ޒިހާނު ސަކަ ރާގަކަށް ބުނީ މުދައްރިސަަށްވެސް ނޭނގޭ ހެއްޔޭ!؟، އެއީ ކާފުން ކޫރެކެވެ. ކޫރު އިންނާނީ އެހެންނެވެ. އެހިސާބުން މުދައްރިސަށާއި ޒިހާނުގެ މަންމަގެ ގާތަށް އައީ އަމަށަކު ފޯރިގަދަ ހިންޏެއް ނޫނެވެ.