ދުނިޔޭގެ ހަޔާތަަކީ ވަގުތީ ތަނެކެވެ. ވަގުތީ ދިރިއުޅުމެކެވެ. މިއީ ކޮންމެ އިންސާނަކުވެސް ގަބޫލުކުރާނޭ ކަމެކެވެ. އާދޭހެވެ! ޣައިރުމުސްލިމުންވެސް، މި ދުނިޔޭގައި އަބަދަކު ނޫޅެވޭނޭކަން ގަބޫލު ކުރާނެއެވެ. މަރު އައިސް ތިމާއާއި ބައްދަލު ކުރާނޭކަން ގަބޫލު ކުރެއެވެ. ނަމަވެސް ޣައިރުމުސްލިމަކަށް ވިޔަސް، އަދި މުސްލިމަކަށް ވިޔަސް، އޭނާ މަރުވާނީ ކޮންތާކު، ކިހިނެއް އަދި ކޮން އިރަކު ކަމެއް ނޭނގޭނެއެވެ. ދަންނަވަންތޯއެވެ! އެއީ ތިބާގެ ހަޔާތާއިމެދު ފޮރުވިފައިވާ ބޮޑު ސިއްރެކެވެ.

އަހަރެމެންގެ ގިނަ ބަޔަކަށް ހީކުރެވިފައި އޮންނަނީ، ނުވަތަ ގަބޫލުކުރެވެނީ، މަރުވާނީ މުސްކުޅިވެ ގައިގެ ބާރު ދެރަވެ، ތަފާތު އެކިއެކި މައްސަލަތައް ކުރިމަތިވާ ހިސާބުންނެވެ. މިފަދައިން ގަބޫލުކުރެވޭ ނުވަތަ ހީކުރެވެނީ، އާންމުގޮތެއްގައި ކަންވަނީ އެހެން ކަމުގައި ވުމުންނެވެ. ނަމަވެސް ވިސްނާލާށެވެ. އުމުރުން ދުވަސްވުމުގެ މާ ކުރިން، މި ދުނިޔެ ދޫކޮށްފައިވަނީ ކިތައް ކިތައް މީހުން ތޯއެވެ! އޭގެ ތެރެއިން ތިބާ ދަންނަ، އަދި ތިބާ އާއި އެކުގައި އުޅިފައިވާ މީހަކު ނުވަތަ މީހުންތަކެއް ވެސް ވާނޭ ކަން ހަމަ ޔަގީނެވެ. ދަންނާށެވެ! މަރަކީ މީހާގެ އުމުރަކަށް އަދި މީހާގެ ސިއްހީ ހާލަތަކަށް ބަލާނޭ އެއްޗެއް ނޫނެވެ.

އުމުރުން ދުވަސް ނުވަނީސް ނުވަތަ ޒުވާންކަމުގެ ދުވަސްވަރުގައި މި ދުނިޔެ ދޫކޮށްފައިވާ މީހުން، ދުނިޔެ ދޫކޮށްފައިވަނީ އެކި އެކި ގޮތްގޮތަށެވެ. އެގޮތުން އެއްބަޔަކު ރޭގަނޑުގެ އަރާމު ނިދީގައި ނިދާފައިވަނިކޮށެވެ. އަނެއްބަޔަކު ދުނިޔޭގެ ޒީނަތްތެރިކަމުގައި ޒީނަތްތެރިވަނިކޮށެވެ. ކުޅިވަރާ މަޖަލުގައި އުޅެނިކޮށެވެ. އަދާކުރާ ވަޒީފާތަކުގައި ވަޒީފާ އަދާކުރަނިކޮށެވެ. ވިޔަފާރިވެރިން އެމީހުންގެ ވިޔަފާރި ކުރިއެރުވުމަށް، ކޮންމެވެސް ބުރަ މަސައްކަތެއްގައި އުޅެނިކޮށެވެ. ކިޔަވާކުދިންނާއި ކޯސްތައް ހަދަމުންދާ ކުދިން، މުސްތަގުބަލަށް ފޮނި އުންމީދުތަކެއް ކުރަމުން ދަނިކޮށެވެ. މިހެން ގޮސް ކިތަންމެ ކިތަންމެ ހާލަތްތަކެއް ކިޔައިދެވިދާނެއެވެ. ނަމަވެސް ހިތާމަ އަކީ މިއިން އެއްވެސް ހާލަތަކަށް އިންސާނާ ތައްޔާރު ނުވާ ކަމެކެވެ. އެހެނީ އިސްވެ ދެންނެވުނު ފަދައިން އިންސާނާ އަށް ހީވެފައި އޮންނަނީ މަރަކީ އުމުރުން ދުވަސްވުމާއި ގައިބާރު ދެރަވުމުގެ މިތުރެއް ކަމަށެވެ.

ދިރިތިބީންނޭވެ! އަބަދުވެސް މަރަށް ތައްޔާރުވެ ތިބޭށެވެ! މި ހިނދު، މި ވަގުތު މަރުވިޔަސް އެންމެ ރަނގަޅޭ ބުނެވޭނޭ ހާލަތުގައި ހުންނާށެވެ. ތިބާ މަރުވާނީ ކޮން އިރަކު، ކިހިނެތްކަމެއް ނޭނގޭނެއެވެ. މަރަކީ އިންސާނާގެ ކަރުގެ މައިނާރަށްވުރެ (ޖުގުލާވެއިން އަށްވުރެ) އިންސާނާއާއި ކައިރީގައިވާ އެއްޗެކެވެ.