އަނގައާއި އަނގައިގައިވާ ގުނަވަންތަކަށް ޖެހޭ އެކިއެކި ބަލިތަކަކީ އޭގެ ސަބަބުން އިންސާނުންނަށް އެތައް އުނދަގުލެއް ކުރިމަތިވާ ކަންކަމެވެ. ޕެރިއޯޑޮންޓައިޓިސް އަކީ ހިރުގަނޑުގެ އިންފެކްޝަނެކެވެ. މިއީ ހިރުހަނޑުގައި ހުންނަ މަސްތައް ހަލާކު ކުރުވާ އިންފެކްޝަނެކެވެ. އަދި މިއީ ފަރުވާ ނުކުރެވިއްޖެނަމަ، އަނގައިގެ ކަށިތަކަށް އަސަރުކުރުވާ އަދި ދަތްތަކުގެ ބާރު ކުޑަވެ، ދަތްތައް ފައިބާގޮތް މެދުވެރިވާ ނުރައްކާތެރި އިންފެކްޝަނެކެވެ. މިއަށް ހިރުގަނޑު ގިރުމޭވެސް ކިޔާ އުޅެއެވެ. މިއީ މިކަމަށް އެކަށީގެންވާ ފަރުވާއެއް ކުރެވިއްޖެނަމަ، ފަސޭހަ ކުރެވޭ ބައްޔެކެވެ.
މި ބަލީގެ އަލާމާތްތަކުގެ ތެރޭގައި ހިރުގަނޑުގެ ކުލައަށް ބަދަލު އައުން ހިމެނެއެވެ. ހިރުގަނޑުގައި އާންމުކޮަށް ހުންނާނީ ރަތް-ފިޔާތޮށި ކުލައެކެވެ. ނަމަވެސް ޕެރިއޯޑޮންޓައިޓިސްގައި ހިރުގަނޑުގެ ކުލަ ގަދަ ރަތް ކުލައަކަށް ނުވަތަ ކަޑި ކުލައަކަށް ބަދަލުވެއެވެ. އަދި ބައެއްފަހަރަށް ދަނބުކުލައިގައިވެސް ހުރެއެވެ. މި ބަލީގައި ހިރުގަނޑު މަޑުވެ، ދުޅަވެފައި ހުރެއެވެ. އަދި އަތްލުމުން ނުވަތަ ހިރުގަނޑުގައި ދޫ ޖައްސާލުމުން ތަދު އިހުސާސް ކުރެވޭނެއެވެ. އަދި ދުޅަވެފައިވާ ހިރުގަނޑުން ފަސޭހަ ކަމާއި އެކު ލޭ އަންނާނެއެވެ. ހަމަ އެއާއި އެކު ދުޅަވެފައިވާ ހިރުގަނޑުގެ ކައިރީގައި އިންނަ ދަތާއި ހިރުގަނޑާއި ދޭތެރޭ ބާގަނޑެއް ނުވަތަ ޖާގައެއް އުފެދޭނެއެވެ. މިހެން ވަނީ ހިރުގަނޑުގެ މަސްތައް ހަލާކުވާން ފެށުމުންނެވެ. ތަދާއި ހިރުގަނޑާއި ދޭތެރޭ އުފެދޭ މި ޖާގައިގެ ސަބަބުން ދަތުގެ ބާރު ކުޑަވެ ހެލެން ފަށާނެއެވެ. އަދި ބައެއް ފަހަރަށް އެ ޖާގައިން ފާދިޔަ ފަދަ ދިޔައެއް އަތިވެދާނެއެވެ. އަދި އަނެއްބައި ފަހަރަށް ދޮސް އައުމަކީވެސް އެކަށީގެންވާ ކަމެކެވެ. ޕެރިއޯޑޮންޓައިޓިސް އަކީ އޭގެ ސަބަބުން އަނގައިން ނުބައި ވަސް ދުވާނޭ ބައްޔެކެވެ. އަދި މި އިންފެކްޝަން ހުންނަ ނަމަ ހަރު އެއްޗެހި ކެއުމުގައި ނުވަތަ ހެފުމުގައި ދަތްތަކަށް ތަދުވާނެއެވެ.
މި އިންފެކްޝަން އަށަގަތުމަށް ދިމައިވާ އެންމެ ބޮޑު އެއް ސަބަބަކީ އަނގައާއި ދަތްތަކުގެ ނުތާހިރުކަމެވެ. މިކަމުގެ ސަބަބުން ދަތުގައި ކޮބަޑި ޖަހައެވެ. މިފަދައިން ޖަހާފައި ހުންނަ ކޮބަޑި ގިނަ ދުވަސްވުމުން އޭގައި ނުވަތަ އެތަނެއްގައި ޖަރާސީމު އަށަގަނެއެވެ. މިއީ ޕެރިއޯޑޮންޓައިޓިސް އަށް މަގުފަހިވާ ކަމެކެވެ. މީގެ އިތުރުން ދަތްފަނި ކެއުމަކީވެސް މިކަން ދިމައިވެދާނޭ ސަބަބެކެވެ. ފަރުވާނުކުރެވި ދޫކޮށްލެވިފައިވާ، ހެލޭ ދަތެއްގެ ސަބަބުން ނުވަތަ ހިރުގަނޑުގެ ފާރުގަނޑެއްގެ ސަބަބުންވެސް މި އިންފެކްޝަން އުފެދިދާނެއެވެ. އަދި ހިރުގަނޑުގެ އެހެން މައްސަލަތައް ހުރުމާއި، ހިރުގަނޑުގެ ކުޑަކުޑަ އިންފެކްޝަނެއް ގިނަ ދުވަހަށް ދެމިގެން ދިއުމަކީވެސް މި ނުރައްކާތެރި އިންފެކްޝަން ޖެހެން މެދުވެރިވެދާނޭ ސަބަބެކެވެ.
ޕެރިއޯޑޮންޓައިޓިސް އަށް ފަރުވާ ނުކުރެވޭނަމަ މިއީ ނުރައްކާތެރި އެހެން ކަންތައްތަކެއްވެސް ކުރިމަތިވެދާނޭ އިންފެކްޝަނެކެވެ. އެހެނީ މި އިންފެކްޝަނުގައި އެކުލެވޭ ޖަރާސީމުތައް ލޭގެ ތެރޭގައި ދައުރު ވާނެތީއެވެ. އޭގެ ސަބަބުން ހަށިގަނޑުގެ އެހެން ގުނަވަންތަކަށްވެސް މި އިންފެކްޝަނުގެ އަސަރު ފޯރުމުގެ ފުރުސަތު އޮންނާނެއެވެ.
މި ބަލިން ރައްކާތެރިވުމަށް ކުރެވޭނެ އެންމެ ފަސޭހަ އަދި އެންމެ މުހިންމު ކަމަކީ އަނގައިގެ ސާފުތާހިރުކަމަށް އިސްކަން ދިނުމެވެ. އެގޮތުން ކޮންމެ ދުވަހަކު ނިދާން ހޭލުމަށްފަހުގައްޔާއި، ނިދަން އޮތުމުގެ ކުރިން ދަތް އުނގުޅަން ވާނެެއެވެ. އަދި ކުޅަދާނަވެގެން ވާނަމަ ކޮންމެ ނަމާދަކަށްވެސް ދަތް އުނގުޅުމަކީ އިސްލާމްދީންވެސް ބާރުއަޅާ މުހިންމު ނުކުތާއެކެވެ. މީގެ އިތުރުން މި ބަލީގެ އަލާމާތްތަކާއި ސަބަބުތަކަށް ރިއާޔަތް ކުރުމަށްފަހު، މި ބަލީގެ އަލަމާތެއް ފެންނަ ނަމަ ލަސްނުކޮށް ޑަކްޓަރެއްގެ އެހީތެރިކަން ހޯދަންވާނެއެވެ. އިސްވެ، އަވަހަށް ދެވޭ ފަރުވާގެ ސަބަބުން މި ބަލިން ރައްކާތެރިކޮށްދޭ މިންވަރާއި މި ބަލީގައި ބޮޑުވަރުވާ މިންވަރު ކުޑަކޮށްދޭނެއެވެ. ދުޅަހެޔޮ ދަތްޕިލައަކާއި ހިރުގަނޑަކަށް އަނގައިގެ ސާފުތަހިރުކަން ވަރަށްވެސް މުހިންމެވެ.