ޒަމާނަކީ ކަންކަމުގައި މީސްމީޑިޔާގެ ދައުރު ވަރަށްބޮޑު ޒަމާނެކެވެ. އެއާއިއެކު އެކި ކަހަލަ ވާހަކަތަކާއި ކަންކަން، މީސްމީޑިޔާގައި ހިއްސާކުރެވެއެވެ. ތަފާތު އެކި މައުލޫމާތުގެ ތަފްސީލީ ލިޔުންތައްވެސް މިޒަމާނުގައި ފެންނާން އޮންނަ އެއް ކުތުބުހާނާއަކީ މީސްމީޑިޔާއެވެ. އަދި މީސްމީޑިޔާގައި އެކި ޒާތްޒާތުގެ ކޮމެންޓުކޮށް ހަދާ އުޅޭ މީހުންނަކީވެސް މަދު ބައެއް ނޫނެވެ. މި ލިޔުމުގައި މި ބަލާލަނީ މިފަދައިން ކޮމެންޓުކޮށް އުޅުނު ޒުވާނަކަށް ދިމާވި ހިތާމަވެރި ހާދިސާއެއްގެ ވާހަކައެވެ.

އޭނާ އަކީ ވަރަށް ގިނަ މީހުން ފޮލޯކުރާ، މީސްމީޑިޔާގައި ގިނަބަޔަކު ދަންނަ މީހެކެވެ. އާންމުގޮތެއްގައި އޮންލައިން ނޫސްތަކާއި މަޖައްލާތަކުގެ ހަބަރުތަކަށް އެޒުވާނާ، ހެއްވާ މަޖާ ކޮމެންޓުކޮށް އުޅެއެވެ. މަލާމާތްކުރުމާއި ޖެއްސުން ކުރުމުގެ ރާގުގައެވެ. މި ކޮމެންޓުތަކަށް އެތައް ބަޔަކު ހީ ހަދައެވެ. އެކި ތަފާތު މަޖާ ރިއެކްޓްތައް ކުރެއެވެ. އެޒުވާނާގެ ގިނަ ވަގުތު ހޭދަކުރަނީ އެފަދައިން މީސްތަކުން ހެއްވާ މަޖާކުރުމުގައެވެ.

މި ޒުވާނާ ކޮމެންޓުކޮށް ހެދުމުގައި، ހަބަރެއް ނުވަތަ އާޓިކަލްއެއް ވިޔަސް، އެ ލިޔުމެއްގެ ދެލިގަނޑަކަށް ނުބަލައެވެ. ބަލަނީ ހަމަ އެކަނި ސުރުހީއަށެވެ. އެ ސުރުހީ ކިޔުމަށްފަހު ކޮންމެވެސް ޖޯކެއް ޖަހާލާ ބަޔަކު ހެއްވާލައެވެ. އެއީވެސް އެފަދަ ކޮމެންޓެކެވެ.

މަޝްހޫރު މަޖައްލާއަކުން ލިޔެފައިވާ ލިޔުމެކެވެ. އެލިޔުމުގެ ސުރުހީގައި ވަނީ ފަށުއި އިބާރާތަކުން މޮޅު ޖުމުލައެއް ލިޔެފައެވެ. އެ ލިޔުމުގެ ތަރުޖަމާގައި ވަނީ "އިހުސާސެއް ނެތަސް އެއީ އަންހެނެކެވެ" މިފަދައިންނެވެ. މި ސުރުހީއަށް މި ޒުވާނާ ވަނީ ޖިންސީ އެދުމެތް ނެތް މީހާ އަންހެނަކަށްވެސް އަދި އިންސާނަކަށްވެސް ނުކިޔާނޭ ކަމަށާއި، އެއީ ލަކުޑިބުރިއެއްފަދަ މީހެއް ކަމަށް ސިފަކޮށް ކޮމެންޓު ކޮށްފައެވެ. އެތައް ސަތޭކަ މީހުން އެ ކޮމެންޓަށް ރިއެކްޓްކޮށް ހެދިއެވެ.

އެ ކޮމެންޓު ކުރިތާ ގާތްގަނޑަކަށް ފަސްގަޑިއިރު ފަހެވެ. އެ ޒުވާނާގެ އެއްބަނޑު އެއްބަފާ ބޭބެ، އެ ޒުވާނާއަށް ގުޅިއެވެ. އަދި އެ ކޮމެންޓު ނެގުމަށް އެދުނެވެ. އެ ޒުވާނާ ހައިރާން ކަމާއި އެކީ ސުވާލު ކުރިއެވެ. އެހެނީ ދުވަހަކުވެސް އޭނާގެ ބޭބެ އެފަދައިން ބުނެފާ ނުވާތީއެވެ. އެ ސުވާލުގެ ޖަވާބުގައި ބޭބެ ބުނީ އެ ލިޔުން ކިޔުމަށެވެ. ދެން އެ ޒުވާނާ އެލިޔުން ހޯދާ ކިޔާލިއެވެ.

އެ ޒުވާނާގެ ދެލޯ ކަރުނުން ފޯވިއެވެ. އެ ލިޔުމުގެ އެއް ޕެރެގުރާފުގައި އޮތީ އު ޒުވާނާގެ މަންމަގެ ވާހަކައެވެ. މުޅި ލިޔުމުގައި އޮތީ، ކޮންމެވެސް ސަބަބުތަކަކާއި ހުރެ، ޖިންސީ އެދުންވެރިކަން ފިލާގޮސްފައިވާ އަންހެނުންތަކަކަށް ފިރިހެނުންނާއި މުޖުތަމައުގެ ފަރާތުން ލިބޭ މަލާމާއި ފުރައްސާރައިގެ މައްޗަށެވެ. އެ ލިޔުމުގައި 10 ވަރަކަށް އަންހެނުންގެ މައުލޫމާތު ހުއްޓެވެ. އެ ޒުވާނާގެ މަންމަގެ ވާހަކަވެސް އެ ލިޔުމުގައި އޮތީއެވެ. އަދި އެ މަންމަގެ އެ އިހުސާސްތައް ފިލާ ދިއުމަށް މެދުވެރިވީ އެ ޒުވާނާ ވިހެއުމުގައި ދިމާވިކަމަކާއި ގުޅިގެން ކަމަށްވެސް އެ ލިޔުން ކިއުމުން އެ ޒުވާނާއަށް އެނގުނެވެ.

އެ ޒުވާނާ އަވަސްވެގަތީ ކޮމެންޓު ޑިލިޓު ކުރާށެވެ. އޭރު އެ ކޮމެންޓަށް ހާހަކަށްވުރެ ގިނަ ރިއެކްޓް އޮތެވެ. އަދި "މީމްސް" ހަދާ ބަޔަކު އެ ކޮމެންޓުން "މީމްސް" އެއް ހަދާ އެހެން ޕޭޖުތަކުގައި ބޭނުން ކުރަން ފަށައިފިއެވެ. އެ މަންމައަަށްވެސް އެ ކޮމެންޓު ފެނި، ހިތްދަތިވެ ރޮވުނެވެ. އެ ޒުވާނާ ލަދުން ގޮތެއް ނެތެވެ. ދެރަވެގެން ހަދާނެ ގޮތް ހުސްވިއެވެ. 

އާދޭހެވެ! މިއީ މީސްމީޑިޔާގައި ސަމާސާއަށް، މަލާމާތުގެ ކޮމެންޓުކޮށް އުޅުނު ޒުވާނަކަށް ދިމައިވި ހިތާމަވެރި ހާދިސާއެކެވެ. މިއީ ހަމަ އެކަނި ސުރުހީ ކިޔުމަށްފަހު ކޮމެންޓުކުރުމުން ލިބުނު ހިތި ނަތީޖާއެވެ. މިއީ ގިނަ ޒުވާނުން މިއަދު ވިސްނާލުން މުހިންމު އިބުރަތްތެރި ހާދިސާއެކެވެ.