ބައެއް މީހުންނަކީ އެމީހުން ކުރާ ހިދުމަތްތަކުގެ ސަބަބުން މުޅި ދުނިޔޭގައި ނުވަތަ އެ މުޖުތަމައެއްގައި އެ މީހެއްގެ ނަން ވިދާ ބަބުޅާ މީހުންނެވެ. އެ މުޖުތަމައެއް އެމީހަކަށްޓަކައި ފަހުރުވެރިވެ، ޝުކުރާ އެތައް ސަނާއެއް ކިޔާ މީހުންނެވެ. އެފަދަ މީހުންނީ ގިނަ ފަހަރަށް އިންސާނިއްޔަތައް ހިދުމަތްކުރުމުގައި ނަމޫނާ ބައެކެވެ. އާދޭހެވެ! އެފަދަ އަގުހުރި ކޮންމެ ހިދުމަތްތެެރިއަކަަށް ޝުކުރު ހައްގެވެ.

ކަން އޮތީ އެހެން ކަމުގައި ވީނަމަވެސް، ވިސްނާލާށެވެ! "އިންސާނަކަަށް" ހިދުމަތް ނުކޮށް "އިންސާނިއްޔަތަށް" ހިދުމަތް ކުރުމެއް ނުވެނެ. ނުވަތަ ނުވެސް ކުރެވޭނެއެވެ. އެ އިންސާނާކީ ކާކުހެއްޔެވެ؟ ހަމަ ޔަގީނުންވެސް އެއީ ތިބާގެ މަންމައެވެ.

ބައެއް މީހުންނީ އެމީހުންގެ ދިރިއުޅުމުގައި މަތީ ފާސްތަކާއި މޮޅެތި އެތައް ވަނައެއް ހޯދާ މީހުންނެވެ. އެމީހުންގެ ވެސް ތައުލީމީ ހަޔާތުގެ ބިންގާ އެޅުނު މަދަރުސާއަކަށް ހަމަ ގައިމުވެސް ވާނީ އެމީހުންގެ މަންމަގެ އުނގެވެ. އެ އުނގުން އަޅައިދިން ހަރުދަނާ ބިންގަލުގެ މަތީގާ އޭނާ ބޮޑުވެ، ތައުލީމީ ގޮތުން ގާބިލު މީހަކަށް އޭނާ ވެއެވެ. ތަފާތު މޮޅު ހުނަރެއްގެ ވެރި ހުނަރުވެރިއަކަށް ވެއެވެ. މި ހުނަރާއި އިލްމީ ގާބިލުކަމުގައި ތިބާއީ މަޝްހޫރު މީހަކަށް ވުމުގެ ޝުއޫރު ހިތުގައި އުފެދެއެވެ. އާދޭހެވެ! ތިބާއަށް ލިބޭ ކޮންމެ ކާމިޔާބީއަކާއި ކުރިއެރުމަކީ އެކަމަކަށް ތިބާގެ މަންމަވެސް އުފާވެ ހިނިތުންވާނޭ ކަމެކެވެ. ނަމަވެސް ދަންނާށެވެ. އެ ކާމިޔާބީއާއި ޝަރަފު ހޯދުމަށް ތިބާ ކުރާ ދަތުރުގައި، ތިބާގެ މަންމައަށް ކުޑަ ނަމަވެސް އިހުމާލެއް ނުވާށެވެ. އެއީ ތިބާ ހޯދާ ކާމިޔާބީގެ ނިމުން ހިތިވާނޭ ކަމެކެވެ.

އެމީހަކަށް ލިބި ހުރި ހުނަރަކާއި އިލްމެއްގެ ބޭނުން ކޮށް ގައުމަށްޓަކައި އެތައް ހިދުމަތްތަކެއް ކުރާތީ ފެނެއެވެ. ރެއާއި ދުވާލު، ނިންޖާއި އަރާމު ދޫކޮށްލާ ގައުމީ ހިދުމަތުގައި ތިބޭތީ ދެކެމެވެ. އެފަދަ ކޮންމެ މީހަކު ވިސްނާން ޖެހޭނޭ މުހިންމު އެއް ކަމަކީ އެމީހުންގެ މަންމަގެ ހައްގެވެ. އެ ހައްގު ފުރިހަމައަށް އަދާ ކުރެވޭ ތޯއެވެ. އެ ހައްގުގައި އުނިކަމެއް ވާނަމަ، ގުރުބާންވެގެން ތިޔަ ވެވޭ ގައުމީ ހިދުމަތުގައި ލާނޭ އެއްވެސް ފޮނި ރަހައެއް ނޯންނާނެއެވެ.

ދަންނާށެވެ! އެއްދުވަހަކު މުސްލިމުންގެ ލަޝްކަރެއް ހަނގުރާމައަކަށް ތައްޔާރުވަމުން ދަނިކޮށް، ޒުވާނަކު އައިސް ރަސޫލާގެ އަރިހުގައި ދެންނެވީ އެ ޒުވާނާ ހަނގުރާމައިގެ ލަޝްކަރާއި އެކު ހަނގުރާމައަށް ދާން ބޭނުންވާ ކަމަށެވެ. އެ ޒުވާނާއަކީ ހަށިގަނޑު ވަރުގަދަ، ހެވިކަމުގައިވެސް މޮޅު ޒުވާނެކެވެ. އަދި އެ ޒުވާނާ އެދުނީ އިސްލާމް ދީނާއި ގައުމުވެ ހައްގުގައި، އަދި މާތް ރަސޫލާގެ ދިފާއުގައި ހަނގުރާމަ ކުރުމުގެ ޝަރަފު ދެއްވުމަށެވެ. އެ ހަނގުރާމައިގައި އެ ޒުވާނާ ބައިވެރިވެއްޖެ ނަމަ އެއީ ޒަމާންތަކަށް އެ ޒުވާނާގެ ވާހަކަ ދައްކާ، އިސްލާމީ އުންމަތް އެ ޒުވާނާއަށް ފަހުރުވެރިވާނޭ ޒުވާނަކަށް ވެދާނެއެވެ. ކަން އޮތީ އެހެން ކަމުގައި ވީނަމަވެސް، މާތް ރަސޫލާ އެ ޒުވާނާއަށް ހަދީޘް ކުރެއްވީ އޭނާގެ މަންމަ ދުނިޔޭގައި ހުރިތޯއެވެ. ދެން އެ ޒުވާނާ އާނއެކޭ ބުނުމުން، ރަސޫލާ އެ ޒުވާނާއަށް ހަދީޘް ކުރެއްވީ، އެހެންވިއްޔާ ތިބާއަށް ހެޔޮކަން ބޮޑީ އެ މަންމައަށް ހިދުމަތް ކުރުމަށް މަޑުކުރުމެވެ.

އާދޭހެވެ! އިސްލާމީ ތާރީޚުގައި ހިނގާފައިވާ މި ހާދިސާއިން އަހަރެމެންނަށް އެނދި ޔަގީން ވަނީ، "އިންސާނަކަށް" (އެބަހީ މަންމައަށް) ހިދުމަތް ނުކޮށް "އިންސާނިއްޔަތަށް" (ގައުމަށް، ގައުމުގެ ރައްޔިތުންނަށް، މުޖުތަމައެއްގެ އަފުރާދުންނަށް) ހިދުމަތް ކުރުން ނުވާކަމެވެ. އެ މަންމަގެ ހައްގުތައް އަދާކުރުމާއި އެ މަންމައަށްޓަކައި ފުރިހަމަ ކުރަން ޖެހޭ ވާޖިބުތައް ފުރިހަމަ ކުރުން، ގައުމީ ހިދުމަތައްވުރެ ހެޔޮކަން ބޮޑުކަމެވެ. ކޮންމެ މީހަކުވެސް ބަލަންވީ ގައުމު ތިބާކެތި ވާ ފަހުރަކަށް ނޫނެވެ. ނަމަވެސް ތިބާގެ މަންމަ ތިބާދެކި ވާ ފަހުރަށެވެ. ގައުމު ފަހުރުވެރިވާ ޒުވާނަކަށް ވުމަށްވުރެ، ތިބާގެ މަންމަ ފަހުރުވެރިވާ ދަރިއަކަށް ވުން ތިބާއަށް މާ ހެޔޮކަން ބޮޑެވެ. މުޅި ގައުމު ތިބާއަށް ރުހުނަސް، ތިބާގެ މަންމަގެ ރުހުން ނުލިބޭނަމަ، ތިބާ ސުވަރުގެ ވަނުން މަނާވެދެއެވެ. ރަސޫލާގެ ސުންނަތުން އެނގޭ ގޮތުގައި، ސުވަރުގެ ވަނީ މަންމަގެ ފައިތިލަ ދަށުގައެވެ.