އެކި ހާލަތްތަކާއި ގުޅިގެން، އިންސާނާގެ ގައިން ލޭ ނަގާ، އެ ލޭ ޓެސްޓުކުރުމަށްފަހު، އެއިން އިންސާނާގެ ހާލު ބުނެދެއެވެ. އެފަދައިން ހަދާ ބައެއް ލޭގެ ޓެސްޓުތަކަކީ އެ ޓެސްޓުތަކެއް ހެދުމުގެ ކުރިން ނުކައި ހުންނަންޖެހޭ ޓެސްޓުތަކެވެ. އާންމުކޮށް މިހާލަތުގައި ޑަކްޓަރު އެކަމަށް އިރުޝާދު ދޭނެއެވެ. ނުކައި ހުންނަނީ ޓެސްޓު ހެދުމުގެ ކިތައް ގަޑިއިރު ކުރިންތޯ އާއި، ކަރު ހިއްކާނަމަ ފެން ބޮވޭނެތޯ ނުވަތަ ނޫންތޯވެސް ޑަކްޓަރު އިރުޝާދު ދެއްވާނެއެވެ. މިފަދަ އާންމު ހާލަތްތަކުގައި ނުކައި ހުންނަ އިރު ފެން ބުއިމަކުން ގޯހެއް ނުވާނެކަމަށް ގިނަ ޑަކްޓަރުން ފާހަގަ ކުރައްވައެވެ.
ބައެއްކަހަލަ ލޭގެ ޓެސްޓުތައް ހެދުމުގެ ކުރިން ނުކައި ހުރުމަކީ އެ ޓެސްޓުތަކުގެ ނަތީޖާ އެންމެ ސައްހަގޮތުގައި ލިބުމަށް ވަރަށްވެސް މުހިންމު ކަމެކެވެ. އިންސާނާ ކެއުމުން، ހަށިގަނޑަށް ލިބޭ ވިޓަމިނާ، މިނަރަލާއި، ކާބޯހައިޑްރޭޓްސް އަދި ޕްރޮޓީން ފަދަ، މިފަދަ މާއްދާ ތަކަކީ އެފަދަ ލޭގެ ޓެސްޓުތަކަށް އަސަރު ކުރުވާނޭ މާއްދާ ތަކެކެވެ.
ލެއިން ނުވަތަ ލޭ ނަގައިގެން ހަދާ ހުރިހާ ޓެސްޓުތަކަކީ ނުކައި ހުރެ ހަދަން ޖެހޭ ޓެސްޓުތަކެއް ނޫނެވެ. އެންމެ އާންމުކޮށް ހަދާ ލޭގެ ޓެސްޓުތަކުގެ ތެރެއިން ނުކައި ހުރެ ހަދަން ޖެހޭ ޓެސްޓުތަކުގެ ލިސްޓެއް މި ލިޔުމުގައި ހިމަނާލާނަމެވެ. އޭގެ ތެރޭގައި:
. ބްލަޑް ގުލްކޯޒް ޓެސްޓް (ހަކުރު ޓެސްޓެއް)
. ލިވަރ ފަންކްޝަން ޓެސްޓް (ފުރަމޭގެ ޓެސްޓެއް)
. ކޮލެސްޓްރޯލް ޓެސްޓް
. ޓްރިގްލައިސެރިޑް ޓެސްޓް (ސަރުބީގެ ޓެސްޓެއް)
. އެޗް.ޑީ.އެލް ލެވެލް ޓެސްޓް (ކޮލެސްޓްރޯލް ޓެސްޓެއް)
. އެލް.ޑީ.އެލް ލެވެލް ޓެސްޓް (ކޮލެސްޓްރޯލް ޓެސްޓެއް)
. ބޭސިކް މެޓަބޮލިކް ޕެނަލް
. ރީނަލް ފަންކްޝަން ޕެނަލް (ގުރުދާގެ ޓެސްޓެއް)
. ލިޕޯޕްރޮޓީން ޕެނަލް
ބައެއް ޑަކްޓަރުން، ލޭގެ ޓެސްޓްތައް ލިޔުމަށްފަހު، އެ ޓެސްޓް ތަކުގައި ނުކައި ހުރުން ނުވަތަ ނުހުރުމާއި ބެހޭ އެއްވެސް މައުލޫމާތެއް ނުދީ ހުރެފާނެއެވެ. ކަން އެހެން މެދުވެރިވެއްޖެ ނަމަ، އެ ސުވާލު ޑަކްޓަރާއި ކުރުން ބުއްދިވެރިއެވެ. އަދި ނުކައި ހުންނަން ޖެހޭތޯ އާއި ނުކައި ހުންނަން ވީ ކިތައް ގަޑިއިރުތޯއެވެ. އާންމުގޮތެއްގައި މިފަދަ ޓެސްޓުތަކުގައި ބޭނުން ވާނީ 8 ގަޑިއިރު ނުވަތަ 12 ގަޑިއިރު ނުކައި ހުރުމެވެ. ނަމަވެސް އެންމެ ބުއްދިވެރިގޮތީ ޑަކްޓަރު ދޭ އިރުޝާދާއި އެއްގޮތަށް ކުރިއަށް ދިއުމެވެ.
އަދި ބައެއްކަހަަލަ ޓެސްޓް ތަކަކީ ވަކި ކަހަލަ ބާވަތެއްގެ ކާނާ ނުކައި ހުރެ ވެސް ހަދަން ޖެހޭ ޓެސްޓް ތަކެވެ. އާންމު ގޮތެއްގައި މިފަދަ އިރުޝާދުތައް ޑަކްޓަރުން ދޭނެއެވެ. ނަމަވެސް ނުދޭހާލަތެއްނަމަ، ބަލި މީހާ، ޑަކްޓަރު ކުރެން އަހާ އޮޅުން ފިލުވުންވެސް ވަރަށް މުހިންމެވެ.
ނުކައިހުރެ ހަދާ ޓެސްޓްތަކަށް ތައްޔާރު ވުމުގައި އެންމެ ބުއްދިވެރިގޮތީ، ނުކައި ހުންނަ ވަގުތަކީ ރޭގަނޑު ނުވަތަ ތިބާ ނިދާފައި ވަގުތުކަމުގައި ހެދުމެވެ. އެހެނީ އޭރުން އެވަގުތުގައި ހައިކަން އިހުސާސްވުން ކުޑަވުމާއި ހެލިފެލިވެ ވުމުން އެވާ ވަރުބަލި ކުޑަވުމެވެ. އަދި އެއީ އެ ވަގުތުކޮޅު ކުރުވެގެން ދާ ކަމުގެ އިހުސާސްވެސް ކުރެވޭނޭ ވަގުތެވެ. މިފަދައިން ރޭގަނޑު އިރާކޮޅު ވަގުތެއްގައި ކެއުމަށްފަހު ދެން ނުކައި ހުނާށެވެ. ޖެހިގެން އަންނަދުވަހު ހެނދުނާ ދެތުވެ ވަގުތު ފާއިތުވުމުގެ ކުރިން ޓެސްޓް ކުރަން ލޭ ދޭންވާނެއެވެ. އާންމުގޮތެއްގައި 8 ގަޑިއިރު ނުކައި ހުރެ ހަދާ ޓެސްޓް ތަކުގައި ގިނަވެގެން ބަލައިގަންނާނީ 10 ގަޑިއިރެވެ. އެއަށްވުރެ އިތުރުވާނަމަ ބަލައެއް ނުގަންނާނެއެވެ. މިއީ އާންމު ހާލަތެވެ. ނަމަވެސް އެކި ލެބޯޓްރީ ތަކާއި އެކި އެކި ޑަކްޓަރުންގެ އިރުޝާދާ ލަފާ ތަފާތުވެދާނެއެވެ. އެހެންކަމުން މިކަމުގައި އެންމެ ބުއްދިވެރި ގޮތީ ޑަކްޓަރުގެ އިރުޝާދު ހޯދުމެވެ.
ބައެއް މީހުން އެންމެ އާދައިގެ ލޭގެ ޓެސްޓެއް (ކޮމްޕްލީޓް ބްލަޑް ކައުންޓް) ފަދަ ޓެސްޓެއް ހެދުމަށްވެސް 8 ގަޑިއިރު ނުކައި އެބަ ހުރެއެވެ. މިއީ ހަގީގަތުގައި ޑަކްޓަރުން ނުވަތަ ސިއްހީ ހިދުމަތްތެރިން، ބަލި މީހުންނަށް އެކަށީގެންވާ މައުލޫމާތު ފޯރުކޮށް ނުދެވުމުން ދިމައިވާ ކަންކަމެވެ. އާންމުންގެ މެދުގައި ސިއްހީ ހޭލުންތެރިކަން ކުޑަވުމުން ދިމައިވާ ކަމެކެވެ. އެހެންކަމުން މި ލިޔުމުގައި އިސްވެ ހިމަނާލި ޓެސްޓް ތަކަކީ އާންމު ހާލަތްތަކުގައި، އާންމުކޮށް ނުކައި ހުރެ ހަދާ ޓެސްޓް ތަކެވެ. އެހެންކަމުން އަހަރެމެންނީ އެ ޓެސްޓް ތަކަށް އަހުލުވެރި ހޭލުންތެރި ބަޔަކަށް ވަމާ ހިނގާށެވެ. އޭގެ އިތުރަށް އެންމެ ބުއްދިވެރި މީހާއީ، ޓެސްޓުތައް ލިޔެދޭ ޑަކްޓަރު ކުރެން އެ ސުވާލުތަައްކޮށް މައުލޫމާތު އޮޅުންފިލުވާ މީހާއެވެ.
ހަވާލާ: ކޮރޭ ވެލަން (2018). ހެލްތް ލައިން.