އިންސާނުންގެ ހަށިގަނޑުގައި، އިންސާނާގެ އިހްތިޔާރުން ބޭރުން، ތަރުތީބުވެ ހިނގަމުންދާ ހަރަކާތްތަކެއް ހުރޭ. އޭގެ ތެރެއިން އާފުރުމަކީވެސް އެފަދަ ހަރަކާތެއް. އާފުރުމުގެ މާނާގައި ދިވެހި ރަދީފުގައި ވަނީ އެއީ ސިކުނޑިއަށް ލިބޭ ވަރުބަލި ކަމެއްގެ ސަބަބުން އަނގަހުޅުވުމާއި އެކު ދިގު ނޭވާއެއް ލުން، މިފަދައިން.

ޖުމުލަކޮއް ހުރިހާ އިންސީންނާއި ޖަނަވާރުން އާފުރޭނެ. މިއީ އިސްވެ ބުނެވުނު ދިވެހި ރަދީފުގައި އެވާ މާނާގައި އެ ބުނާ ސިކުނޑިއަށް ލިބޭ ވަރުބަލިކަމެއްގެ ސަބަބުން ހިނގާ ހަރަކާތެއް. މި ވަރުބަލިކަން ސިކުނޑިއަަށް ލިބުމުގައި އެކި އެކި ކަންކަން ދިމައިވޭ. އެގޮތުން ސިކުނޑިއަށް ބޭނުންވާ އޮކްސިޖަންގެ މިންވަރު، އޭގެ ޠަބީއަތުގައި މަދުވާނަމަ ނުވަތަ މަދުވަމުން ދާނަމަ، އާފުރުމަކީ އެކަށީގެންވާ ކަމެއް. އަދި އިންސާނާ ގަޔާ ނުވާ ކަމެއް، ނުވަތަ ޝައުގުވެރިނުވާ ކަމެއް ކުރަން ޖެހުމުން ނުވަތަ ކުރަމުން ގެންދިއުމުން، ސިކުނޑިއަށް އުފާވެރިކަން ގެނެސްދޭ ހޯމޯންތައް އެފެދުން މަދުވެ ނުވަތަ ހުއްޓިދޭ. މިކަމުގެ ސަބަބުން ސިކުނޑިއަށް ބުރަކަން އިހުސާސް ކުރެވެން ފަށާ. އެހެންކަމުން މިހާލަތުގައިވެސް އާފުރުމަކީ އެކަށީގެންވާ ކަމެއް.

އާފުރިދާނޭ އަނެއް ސަބަބަކީ ނިދި އައުމުގެ ސަބަބުން ނުވަތަ ވަރުބަލިކަމުގެ ސަބަބުން ހަށިގަނޑުގެ ގުނަންތައް އަރާމަކަށް ނުވަތަ އަރާމު ކުރުމަކަށް އެދެމުންދާއިރު، އިންސާނާ ހޭލާ ހުންނަން ހިތްވަރު ކުރާނަމަ، ސިކުނޑިއަށް ބުރަކަން އިހުސާސް ކުރެވޭނެ. އެހެން ކަމުން މި ވަރުބަލިކަމުގައިވެސް އާފުރިދާނެ.

އާފުރުމާއި އެކު އަނގަ އާއި މޫނުމައްޗާއި އަދި ކަރުގެ މަސްތަކަށް ވާން ވެގެންދޭ. އެއާއި އެކު ފުން ނޭވާއެއް ލެވުމުން، ހަށިގަނޑަށް ވަންނަ ވައި ނުވަތަ އޮކްސިޖަނުގެ މިންވަރު ކުއްލިގޮތަކަށް އިތުރުކޮށްލާ. އަދި ހަށިގަނޑުން ބޭރުވާ ކާބަންޑައިއޮކްސައިޑް ގެ މިންވަރުވެސް އިތުރުކޮށްދޭ. އެއާއި އެކު ހަށިގަނޑުގައި ހުންނަ ލޭތަކުގައި އޮކްސިޖަންގެ މިންވަރު ކުއްލިގޮތަކަށަ އިތުރުކޮށްލާ. މިގޮތަށަ އޮކްސިޖަނުގެ މިންވަރު އިތުރު ކޮށްލުމުން ނުވަތަ ވުމުން، ސިކުނޑީގެ މި ދަންނަވާ ވަރުބަލިކަމަށް ކުޑަނަމަވެސް ލުޔެއް ލިބިގެންދޭ.

މިކަމުގެ މައްޗަށް ދިރާސާ ކުރާ ބައެއް ދިރާސާވެރިން ދެކިލައްވާ ގޮތުވައި އާފުރުމުން ސިކުނޑިއާއި މަައިބަދާގައި ހުންނަ ދިޔަވަރު، ސެރިބްރޯ ސްޕައިނަލް ފްލުއިޑް (ސީ.އެސް.އެފް) ގެ ޕުރެސަރަށް ބަދަލު އާދެ. އަދި ހަމައެއާއި އެކު އެ ދިޔަވަރުގެ ހަރަކާތްތަކެއް ހިނގާ. މިއީވެސް ސިކުނޑިއަށް މި ލިބޭ ވަރުބަލިކަން ލުއިކޮށްދޭނޭ ކަމެއްކަމަށްވޭ.

އިންސާނާ އަބަދުވެސް އާފުރޭނެ. އެހެނީ އެންމެ ފުރަތަމަ އިންސާނާ އާފުރެން ފަށަނީ އޭނާގެ މަންމަގެ ބަނޑުގައި އޮވެ. އާފުރުމަކީ އާދަވެ އިންސާނާގެ ހަޔާތުގައި، އިހްތިޔާރުން ބޭރުން އަބަދުވެސް ތަރުތީބުވަމުން ހިނގަނޭ ކަމެއް.