އިންސާނާއަށް ކުރެވޭ ބައެއް ކަންކަމަކީ އޭނާގެ ގަސްތަކާއި ނުލާ ކުރެވޭ ކަންކަމެވެ. އެގޮތުން އިސްރާފު ކުރުމުގައިވެސް އޭނާގެ ގަސްތަކާއި ނުލާވެސް އިސްރާފު ކުރެވިދާނެއެވެ. މިކަމަކީ ކޮންމެ މީހަކުވެސް ވިސްނާލުން މުހިންމު ކަމެކެވެ. އެހެނީ އޮއެ ދެމޭ ކޯރަކުން ވުޟޫ ކުރާނަމަވެސް އެ ކޯރުގައިވާ ފެނުން އިސްރާފު ނުކުރުމަށް އައިސްފައި އޮތުމުންނެވެ.

އަހަރެމެންގެ ދިރިއުޅުމުގައި އަހަރެމެންގެ ދަރީންނަށް، ނުވަތަ އެކަނި ނުކެވޭ ކުޑަކުދީންނަށް ކާންދެނީ އެކުދިންގެ މައިންބަފައިން ނުވަތަ ބެލެނިވެރިންނެވެ. ހަމަ ގައިމުވެސް އެ ކުދިންނަކީ ތަކުލީފު ލިބިގެންވާ މުކައްލަފުންނެއް ނޫނެވެ. އެހެންކަމުން އެ ކުދިންނަކީ ކުރެވޭ ގޯސްކަންތައްތަކުން އެކުދިންނަށް ހުކުމް ކުރެވޭނޭ ބައެއް ނޫނެވެ.

ކުޑަކުދިންނަށް ކާން ދިނުމުގައި ބައެއް މައިންބަފައިން އެކުދިންގެ ތައްޓަށް ގިނައިން ބަތް ނުވަތަ އެ ކާއެއްޗެއް އަޅައެވެ. އަދި އެކުދިން އެ އެއްޗެއް ކަމުން ގޮސް، ކޮންމެ ވެސް ސަބަބަކާއި ހުރެ ކެއުމުގެ ޝައުގު ގެއްލި، ނުކާން އުޅެއެވެ. ގިނަފަހަރަށް މިހެން ދިމައިވަނީ އެކުދިންގެ ބަނޑު ފުރުމުންނެވެ. އެހެންނަމަވެސް އެ ކުއްޖާގެ ތަށީގައި ބާކީ ބަތް ނުވަތަ އެ ކާންދޭ އެއްޗެއް ހުރުމާއި އެކު އެ އެއްޗެއް ހުސްކުރުމަށް އެކުދިންނަށް ބާރު އަޅުވައެވެ. ގިނަ ފަހަރަށް މިހެން ހެދެނީ އެ ކާ އެތިކޮޅު އިސްރާފު ނުކުރުމުގެ ނިޔަތުގައްޔާއި އަދި ބަތްތަށި ހުސްކުރުމުގެ ރީތި އާދަވެސް ދަސްކޮށް ދިނުމުގެ ނިޔަތުގައެވެ. އެހެންނަމަވެސް ފުދި އިތުރުވާ މިންވަރަށް ކެއުމަކީވެސް އިސްރާފެއްކަން އަހަރެމެން ހަނދާން ނެތެއެވެ. އެހެނީ އެބައި "ޑަސްބިނަށް" ނާޅާތީއެވެ. އެހެން ނަމަވެސް އެ ކުއްޖާގެ ބަނޑު ފުރި، ގަދަކަމުން އިތުރަށް ކާންދެވޭ ބަޔަކީ ވެވޭ ނުވަތަ ކުރެވޭ އިސްރާފެކެވެ. އެކަމުގެ ޒިންމާ ނަގަންޖެހޭނީ އެ ކުއްޖަކަށް ކާންދޭ މީހާއެވެ. މިއީ ކުޑަކުދިންނަށް ކާން ދިނުމުގައި ވިސްނަން ޖެހޭ މުހިންމު ކަމެކެވެ.

ކުއްޖާ ހަޑިކޮށްފައި ދާ ބަތްތަށި، ގިނަފަހަރަށް އުކާލެވެއެވެ. ހަޑިކޮށްފައި ހުރުމުން އިސްރާފު ކުރީ ދޯއޭ، ގިޔާމަތްދުވަހުން މި އެއްޗެހި ދަރިފުޅުގެ ފަހަތުން އަންނާނޭ ބުނެ އެ ކުއްޖާއަށް ވިސްނައިދޭން އުޅެވެއެވެ. އެހެނަސް އެއީ ތަކުލީފު ލިބިގެންވާ މުކައްލަފެއް ނޫނެވެ. އެފަދައިން އެ ކުއްޖާ ހަޑިކުރާ ކާ އެތިކޮޅު އުކާލުމުން އެ ކުރެވޭ އިސްރާފުގެ ޒިންމާވެސް ނަގަން ޖެހޭނީ އެ ކުއްޖާއަށް ކާން ދިން މީހާ ނުވަތަ އެ އެއްޗެއް އުކާލި މީހެކެވެ.

އެހެންކަމުން ކުޑަކުދިން ކައިފަ ބާކީ ހުންނަ ކާ އެތިކޮޅު އުކާލުމުގެ ބަދަލުގައި އެ އެތިކޮޅު ކާލާށެވެ. ނުވަތަ ފަހުން ކެއުމަށްޓަކައި ރައްކާ ކުރާށެވެ. އެހެނީ އެ ކާއެތިކޮޅު އުކާލުމަކީ ކުރެވޭ އިސްރާސެކެވެ. އަދި އެއީ ހަމަ ގައިނު ތަކުރާރު ކުރެވޭނޭ ވެސް ކަމެކެވެ.

ބައެއް ސައިކޭޓްރިސްޓުން ދެކިލައްވާ ގޮތުގައި، މައިންބަފައިންނާއި އެކީ އެއް މޭޒެއްގައި އެއްވަގުތެއްގައި އެކައްޗެއް ކާނަމަ އެއީ އާއިލީ ލޯބި އިތުރުކޮށްދޭ ކަމެކެވެ. އަދި ކެއުމުގައި އެކަކު އަނެކަކަށް އެހީތެރިވުމަކީ އެ އާއިލާއެއްގެ ގުޅުން ވަރުގަދަވެ ދެމިގެންދާނޭ ކަމެކެވެ. އެހެންކަމުން މިބައިމީހުންގެ މި ބަހުން އެނގޭ ގޮތުގައި ކުޑަކުއްޖާ އަށް ހުސްނުވެފައި ހުންނަ ކާ އެތިކޮޅު، ކުއްޖާގެ މައިންބަފައިން އެކުމަކީ އެ ކުއްޖާގެ ތަށި ހުސްކުރުމަށް އެ ކުއްޖާއަށް ވެވޭ އެހީތެރިކަމެކެވެ. އަދި އެއީ އޭގެ ސަބަބުން އެ ކުދިންނާއި އެކުދިންގެ މައިންބަފައިންނާއި ދެމެދު އޮޮންނަ ގުޅުން ހަރުދާނަމަ ގާތް ވެގެންދާނޭ ކަމެކެވެ.

ނަފްސާނީ ގޮތުން އަދި ދީނީ ގޮތުން ބެލިޔަސް މިއީ މަންފަކުރާނޭ ކަމެކެވެ. އެހެން ކަމުން ކުޑަކުދިންނަށް ކާން ދިނުމުގައިވެސް އިސްރާފު ނުކުރުމަށް ސަމާލުކަން ދޭށެވެ!