ބަރަކް އޮބާމާ ނުވަތަ ބަރަކް ޙުސައިން އޮބާމާ ދުނިޔޭގެ އަލިކަން ދެކެވަޑައިގަތީ 4 އޮގަސްޓު 1961 ގައި، ހަވާއީގެ ހޮނޮލުލޫ ގައެވެ. ބައްޕަ ހުސައިން އޮނޔަންގޯ އޮބާމާ އަކީ ބަކަރިހުއިހައްޕަން އުޅުނު ކެންޔާ މީހެކެވެ. ކެންޔާ ދޫކޮށް އެމެރިކާއަށް ބަދަލުވީ ހަވާއީގެ ޔުނިވަރސިޓީއެއްގައި ކިޔެވުމަށް ސްކޯލަރޝިޕް ލިބުމާ ގުޅިގެންނެވެ. އޮބާމާގެ މަންމަ އޭން ދުންހަމް އަކީ އެމެރިކާގެ ރައްޔިތެކެވެ. އުފަންވީ ދެވަނަ ބޮޑު ހަނގުރާމައިގެ ދުވަސްވަރު އެމެރިކާގެ ކެންސަސް ސިޓީގެ އަސްކަރީ މަރުކަޒަކަށެވެ. އުމުރުފުޅުން 10 އަހަރުން ފެށިގެން އޮބާމާ އުޅުއްވީ މަންމަ ފަރާތުގެ މާމަ އާއި ކާފައާ އެކު ހަވާއީގައެވެ.

ބަރަކް އޮބާމާ އޭނާގެ އަނބިކަނބަލުން މިޝޭލް ރޮބިންސަންއާ ކައިވެނި ބައްލަވައިގަތީ، 3 އޮކްޓޫބަރު 1992 ގައެވެ. މި ދެމަފިރިކަނބަލުންނަށް ލިބިވަޑައިގަތީ ދެ އަންހެން ބޭފުޅުންނެވެ. އޭގެ ތެރެއިން ދޮށީ ދަރިކަނބަލުން މާލިއާ އޭން ލިބިވަޑައިގަތީ 1998 ވަނަ އަހަރެވެ. އަދި ހަގު ދަރިކަނބަލުން ނަތާޝާ މޭރިއަން ލިބިވަޑައިގަތީ 2001 ގައެވެ.

އޮބާމާ އެންމެ ފުރަތަމަ ތަޢުލީމު ހާސިލުކުރެއްވީ ލޮސްއެންޖަލްސްގެ އޮސިޑެންޓަލް ކޮލެޖުންނެވެ. އެއަށްފަހު ނިއުޔޯކުގެ ކޮލަމްބިއާ ޔުނިވަރސިޓީއަށް ބަދަލުވެ، އެ ތަނުގައި ޕޮލިޓިކަލް ސައިންސް އިން ޑިގްރީ ހާސިލުކުރެއްވިއެވެ. އަދި 1991 ގައި ވަރަށް މޮޅު ދަރިވަރެއްގެ ގޮތުގައި ހާވާޑް ޔުނިވަރސިޓީން ގްރެޖުއޭޓްވިއެވެ. އޭގެފަހުން އޮބާމާ ވަނީ ހާރވަޑް ލޯ ރިވިއުގެ ރައީސްކަން ކުރައްވާފައެވެ. އަދި ކޮމިޔުނިޓީ އޮގަނައިޒަރއެއްގެ ދައުރު ވެސް އަދާކުރައްވާފައެވެ. މީގެއިތުރުން މަދަނީ ޙައްޤުތަކާ ބެހޭ އެޓާނީއެއްގެ ގޮތުގައި ވެސް މަސައްކަތް ކުރެއްވިއެވެ.

އޮބާމާގެ ސިޔާސީ ޙަޔާތް ފެށިގެން ދިޔައީ 1996 ވަނަ އަހަރު އިލިނޮއިސް ސްޓޭޓްގެ ސެނެޓަށް އިންތިޚާބުވުމާ ގުޅިގެންނެވެ. އެއީ ސެނެޓްގެ ގޮނޑިއެއް ފުރުއްވި ކަޅު ނަސްލުގެ 5 ވަނަ ބޭފުޅާ ވެސް މެއެވެ. އޭގެ ފަހުން 2004 ވަނަ އަހަރާ ހަމައަށް ވިދިވިދިގެން 3 ދައުރު އެ މަޤާމު ފުރުއްވިއެވެ. ސެނެޓްގެ މެންބަރެއްގެ ހައިސިއްޔަތުން އިޖްތިމާޢީ ކަންކަމާއި، ޞިއްޙީކަންކަމަށް އޮބާމާ ކުރެއްވި މުހިންމު ގިނަ މަސައްކަތްތަކުގެ ސަބަބުން ޑިމޮކްރެޓިކް ޕާޓީ އާއި ރިޕަބްލިކަން ޕާޓީގެ މެންބަރުންގެ މެދުގައި ވެސް އެއީ މަޤްބޫލު ބޭފުޅަކަށް ވެގެންދިޔައެވެ.

އޭގެ ފަހުން 2008 ވަނަ އަހަރު ޑިމޮކްރެޓިކް ޕާޓީގެ ޕްރައިމަރީގައި ހިލަރީ ކްލިންޓަންއާ ވަރަށް ގާތުން ވާދަކުރައްވައި، އެ ޕާރޓީގެ ރިޔާސީ ކެންޑިޑޭޓުކަން ހޯއްދެވިއެވެ. އެހެންކަމުން އޮބާމާ ވެގެން ދިޔައީ އެމެރިކާގެ ބޮޑު ޕާޓީއަކުން ރިޔާސީ ކެނޑިޑޭޓްކަން ލިބިވަޑައިގެންނެވި އެފްރިކާ ދަރިކޮޅުގެ ފުރަތަމަ ބޭފުޅާއަށެވެ. އަދި 2008 ވަނަ އަހަރުގެ ނޮވެމްބަރު މަހު އޮތް ރިޔާސީ އިންތިޚާބުގައި ޖޯން މެކެއިން ބަލިކުރެއްވިއެވެ. އާންމު ރައްޔިތުންގެ ވޯޓުގެ 53 އިންސައްތަ ތާޢީދާއެކު، އެމެރިކާގެ ރައީސްކަމަށް އިންތިޚާބުވެވަޑައިގަތެވެ.  ރައީސްކަމުގެ ހުވާކުރެއްވީ 15 ޖެނުއަރީ 2009 ގައެވެ. އޮބާމާ އަކީ އެމެރިކާގެ ރައީސްކަމުގެ މަޤާމު ފުރުއްވި ކަޅު ނަސްލުގެ ފުރަތަމަ ބޭފުޅާއެވެ.

ސިޔާސީ ދާއިރާގެ އިތުރުން އޮބާމާއަކީ އިޖްތިމާއީ ޚިދުމަތްތެރިއެކެވެ. ޤާނޫނީ ވަކީލެކެވެ. ޕްރޮފެސަރެކެވެ. ފޮތް ލިޔުއްވާ ބޭފުޅެކެވެ. އަދި ހަމަ އެހެންމެ ކުޅަދާނަ ވާހަކަދެއްކުންތެރިއެކެވެ.

"ބަރަކް އޮބާމާ"އޭ ބުނެފިނަމަ އެއީ އެމެރިކާގެ ރައީސްކަން ކުރެއްވި ބޭފުޅެއްކަން އެންމެ ތުއްތުކުއްޖާ ވެސް ދަންނާނެ ފަދައިން، އޮބާމާގެ ތަޤުރީރުތަކާއި، ކުޅަދާނަ ވާހަކަދެއްކުންތެރިކަމަކީ މުޅި ދުނިޔެ ދަންނަ ހަޤީޤަތެކެވެ.

އޮބާމާގެ ވާހަކަދެއްކުންތެރިކަން.

އެމެރިކާގެ ރައީސްކަމުގެ މަޤާމަށް ވާދަކުރައްވާނެކަން އޮބާމާ އިޢުލާންކުރެއްވީ 10 ފެބްރުއަރީ 2007ގައި ދެއްވި ތަޤުރީރުގައެވެ. އެ ތަޤުރީރުގައި އިރާޤުގެ މައްސަލަ ހުއްޓުވުމަށާއި ހަކަތައިގެ މައްސަލަތައް ހައްލުކުރެއްވުމަށާއި ޞިއްޙީކަންކަމާ ބެހޭ ގޮތުން ދެއްކެވި ވާހަކަފުޅުތަކުގެ ސަބަބުން ގިނަ ބައެއްގެ ހިތުގައި އެބޭފުޅައަށް އަށް ޚާއްޞަ މަޤާމެއް ދެވިގެންދިޔައެވެ.

މީގެ އިތުރުން އޮބާމާގެ ވާހަކަދެއްކުންތެރިކަން އެންމެ ބޮޑަށް މަޤުބޫލުވެގެން ދިޔައީ ޖޯން މެކޭންއާ ދެ ބޭފުޅުންގެ މެދުގައި 2008ގެ ސެޕްޓެމްބަރު އަދި އޮކްޓޯބަރު މަހު ބޭއްވުނު ރިޔާސީ ބަހުސްތަކުގެ ތެރެއިންނެވެ. މި އިން ކޮންމެ ބަހުސަކަށްފަހު ނެގުނު ޚިޔާލު ހޯދުމުގެ ވޯޓުގައި ފާހަގަކުރެވުނީ އޮބާމާއަށް އޮތް ތާޢީދު އިތުރުވެފައިވާކަމެވެ. އެހެންކަމުން ވައިޓް ހައުސްގެ އޯވަލް އޮފީސް، ފުރަތަމަ ފަހަރަށް ކަޅު ނަސްލުގެ ބޭފުޅަކަށް ލިބިދާނެކަމުގެ ހީތައް ޔަޤީނަށް ބަދަލުވާން ފެށިއެވެ. އެމެރިކާއަށް ބޮޑު ބަދަލެއް އައުމުގެ ވަގުތު ޖެހިއްޖެކަމަށް ދުނިޔޭގެ އެކި ކަންކޮޅުތަކުގައި ވާހަކަދެކެވެން ފެށިއެވެ.

ވާހަކަދެއްކުންތެރިކަމުގައި އޮބާމާ ގެންގުޅުއްވާ ބައެއް ޚާއްޞަ އުކުޅުތައް!

ތަޤުރީރުތަކުގައި އޯޑިއެންސަށް ވާހަކައެއް ވިދާޅުވެ ދެއްވުން.

އޮބާމާގެ ގިނަ ތަޤުރީރުތަކުގައި އޯޑިއެންސަށް ވާހަކައެއް ވިދާޅުވެދެއްވައެވެ. ގިނަ ފަހަރަށް ވާހަކަ ވިދާޅުވެދެއްވަނީ ތަޤުރީރު ފެށުމުގެ ގޮތުންނެވެ. މިފަދަ ވާހަކަތަކަކީ ޙާލަތު ރަނގަޅަށް ފަހުމުކޮށްދިނުމަށް އެހީވެދޭ ހަތިޔާރެކެވެ. ވާހަކަވިދާޅުވަމުން ގެންދަވާއިރު، ވާހަކައިގެ މައިގަނޑު ޝަޚްސިއްޔަތުގެ ރިހުން ނުވަތަ އުއްމީދު އޯޑިއެންސަށް އިހުސާސްކުރުވައެވެ. އާންމު ގޮތެއްގައި ވިދާޅުވެދެއްވަނީ އެ ބޭފުޅާގެ އަމިއްލަ ތަޖުރިބާތަކާ ގުޅިފައިވާ، އަމިއްލަ ވާހަކަތަކެވެ. އެގޮތުން 2004 ވަނަ އަހަރު ޑިމޮކްރެޓިކް ކޮންވެންޝަންގައި ވިދާޅުވެދެއްވީ އެބޭފުޅާގެ މައިންބަފައިންގެ ވާހަކައެވެ. އެބޭފުޅާގެ ”ޖެހިލުންކުޑަ އުއްމީދު“ގެ ވާހަކައެވެ. އެ ކޮންވެންޝަންގައި ވާހަކަފުޅުދެއްކެވި އިރު އޮބާމާއަކީ މާ ގިނަ މީހުން ދަންނަ، މަޝްހޫރު ބޭފުޅެއް ނޫނެވެ. ނަމަވެސް ތަޤުރީރު ނިންމަވާލެއްވި އިރު އެ ބޭފުޅާއަށް ތާޢީދުކުރާނެ އެތަކެއް ސަޕޯޓަރުން އުފެދިއްޖެއެވެ. ހަމަ އެހެންމެ ހިޖުރަކުރާ މީހުންގެ މައްސަލަތަކާ ގުޅިގެން ތަޤުރީރުކުރެއްވީ އެމެރިކާއަށް ހިޖުރަކުރި މީހަކު ކައިރީގައި ބަހައްޓަވައިގެންނެވެ. އޭނާގެ ވާހަކަ އޯޑިއެންސަށް ވިދާޅުވެ ދެއްވައިގެންނެވެ.

ވާހަކައަކީ ބީހުމުގެ އިހުސާސަކާ ނުލައި، އެހުންތެރިންގެ ޖަޒުބާތުތަކާ ކުޅެލާ އެއްޗެކެވެ. މިއީ އެހުންތެރިންގެ ޝައުޤުވެރިކަން އިތުރުކޮށްދީ، ދެކެވުނު ވާހަކަތައް ގިނަ ދުވަހަށް ހަނދާނުގައި ހުންނާނެ ގޮތެކެވެ.

ވާހަކަދައްކަވާ އިރު އޯޑިއެންސާ އޮންނަ ގާތް ގުޅުން.

އޮބާމާގެ ވާހަކަދެއްކުންތެރިކަން މަޤުބޫލުވެގެންދާ އަނެއް ސަބަބަކީ ވާހަކަދައްކަވާ އިރު އޯޑިއެންސާ އޮންނަ ގާތް ގުޅުމެވެ. އެގޮތުން ކޮންމެ ތަޤުރީރެއްގައި ވެސް އޮބާމާ ވާހަކަދައްކަވަނީ އޯޑިއެންސަކީ ގާތް ރަހުމަތްތެރިން ކަމަށް ދެކިގެންނެވެ. ވާހަކަދައްކަވާ އިރު ލޯ  އަމާޒުކުރައްވަނީ ސީދާ އޯޑިއެންސަށެވެ. އޯޑިއެންސްގައި ތިބި ކޮންމެ މީހަކާ ވަކިވަކިން ވާހަކަދައްކަވާ ގޮތަށް ލޮލުގެ ހަރަކާތް ގެންގުޅުއްވައެވެ. ޓީވީ މެދުވެރިކޮށް ވާހަކަދައްކަވާ އިރު ވެސް އޯޑިއެންސާ ގާތް ގުޅުމެއް ޤާއިމްކުރައްވައެވެ. މީގެ އިތުރުން އޮބާމާގެ ވާހަކަދެއްކެވުމުގައި އަޑު ހަރުކަމެއް ނުވަތަ ބޮޑާކަމެއް ނުގެންގުޅުއްވައެވެ. ދެ ލޮލުން ހާމަކޮށްދެނީ އަޑުއަހަން ތިބި މީހުންނަށް އިޚުތިރާމުކުރާ މިންވަރެވެ. ގިނަ ބަޔަކު ތިބޭ މަޖިލިސްތަކުގައި ވާހަކަދައްކަވާ އިރު، އަޑުއަހަން ތިބި މީހުންގެ ތެރެއިން ވަކި މީހަކަށް ބަލަމުން، އެއީ ގާތް އެކުވެރިއެއް ކަމަށް ދެކިގެން ވާހަކަފުޅު ކުރިއަށް ގެންދަވައެވެ.

މިއީ ވާހަކަދައްކާއިރު އޯޑިއެންސާ ގުޅިގެން ކުރިއަށް ގެންދިޔުމަށާއި، ސްޓޭޖްމަތީގެ ބިރު ފިލުވާލުމަށް ވަރަށް މޮޅު އުކުޅެކެވެ.  މިގޮތަށް ވާހަކަ ކުރިއަށް ގެންދާއިރު، ލޯ އަމާޒުކުރާ މީހާ ބަދަލުކުރަމުން ގެންދެވިދާނެއެވެ.

ޤުދުރަތީކޮށް ވާހަކަދެއްކެވުން.

ބަރަކް އޮބާމާއަކީ ވަރަށް ޤުދުރަތީކޮށް ވާހަކަދައްކަވާ ބޭފުޅެކެވެ. ވާހަކަދައްކަވާއިރު އަޑާއި ރާގު ގެންގުޅުއްވަނީ ވަރަށް ޤުދުރަތީ ގޮތަކަށެވެ. އަޑުއަހަން ތިބޭ މީހުން ވަރަށް ބޮޑަށް ވިސްނާނެ ގޮތަށް، އަޑަށް ބާރުލައްވައެވެ. މުހިއްމު ނުކުތާތައް ފާހަގަކުރައްވާ އިރު ކުޑަކޮށް މަޑުކޮށްލައްވައި އޯޑިއެންސްގެ ސަމާލުކަން ހޯއްދަވައެވެ.

އޮބާމާގެ ވާހަކަފުޅުތަކުގައި މި ހުނަރުތައް ފަސޭހަކަމާއިއެކު ފުރިހަމަކޮށް ގެންގުޅުއްވައެވެ. ނަމަވެސް ގިނަ މީހުންނަށް މި ހުނަރުތައް ތަރައްޤީކުރުމަށްޓަކައި އެތަކެއް ދުވަހެއްގެ މަސައްކަތާއި، ފަރިތަކުރުން ބޭނުންވެއެވެ.

ބުއްދިއަށް ޤަބޫލުކުރެވޭ ގޮތަށް ވާހަކަދެއްކެވުން

އޮބާމާ އަކީ އަޑު އަހާ މީހުންގެ ބުއްދިއަށް ޤަބޫލުކުރެވޭ ގޮތަށް ވާހަކަދައްވާ ބޭފުޅެކެވެ. އެގޮތުން ތަޤުރީރުތަކުގައި ވަރަށް ޒާތީ ކަންކަން ހިއްސާކުރައްވައެވެ. އަމިއްލަފުޅު ކަންކަން ތެދުވެރިކަމާއެކު ވިދާޅުވެދެއްވާ ގޮތުން އެއީ ތެދުކަން އިހުސާސްކުރުވައެވެ. ވާހަކަފުޅުދައްކަވާ އިރު ފާޅުކުރަން ބޭނުންވާ އިހުސާސްތަކާއި، ޖޯޝާއި، ސަމާސާ މޫނުމަތިންނާއި، ހަށިގަނޑަށް ގެންނަ ބަދަލުތަކުން ދައްކުވައިދެއެވެ. ޕަބްލިކް ސްޕީކިންގެ އެންމެ މުހިއްމު އެއްބައި ޕޭތޯސް (އިންސާނިއްޔަ ޝުޢޫރު) ބޭނުންކުރައްވައެވެ. ބައެއްފަހަރު ޙާލަތާގުޅޭ ގޮތުން ޖަޒުބާތާއި ހަމްދަރުދީ ފާޅުކުރައްވައެވެ. ބައެއް ފަހަރު ކީރިތި ވެސް ކުރެއްވިއެވެ. ނަތީޖާއެއްގެ ގޮތުން އެވާހަކަތައް ޤަބޫލުކުރަން އޯޑިއެންސަށް ފަސޭހަވެގެންދެއެވެ.

އޮބާމާގެ ތަޤުރީރުތަކުގައި ބޭނުންކުރައްވަނީ އާންމު މީހުން ދަންނަ އާދައިގެ ބަސްމަގެވެ. އެހެންކަމުން އަޑު އަހާ މީހުންނަށް ދޭން ބޭނުންވާ މެސެޖު ރަނގަޅަށް ފޯރުކޮށްދެވެއެވެ. އަދި ހަމައެހެންމެ ދެއްވަން ބޭނުންވާ ސިޔާސީ މެސެޖު ވާހަކައިން ނެރުއްވައެވެ. އަދި އެއަށް ޤައުމީވަންތަކަން ގެނުވައެވެ.

އިޚްތިރާމް ލިބޭ ޝަޚްސެއްކަން އަންގައިދޭ!

ވާހަކަދައްކަވާއިރު އޮބާމާއަކީ މީހުންގެ އިޚްތިރާމް ލިބޭ، ވަރަށް ވަރުގަދަ ޝަޚްސެއްކަން ދޭހަކޮށްދެއެވެ.  އެހުންތެރިންގެ ހިތްތައް ލެނބިގެންދާފަދަ ގޮތަކަށް ވާހަކަ ބައްޓަންކުރައްވައެވެ. ހަމަހިމޭންކަމާއެކު، މޫނުމަތީގެ އިހުސާސްތަކުން ޝުޢޫރު ފާޅުކުރައްވައެވެ. ގިނަ ވާހަކަދެއްކުންތެރިންނާ ޚިލާފަށް ވާހަކަދެއްކެވުމުގައި މާ ކަރުކަށި ގޮތެއް ނުގެންގުޅުއްވައެވެ. އަޑު ބާރުވެގެން ގޮސް އެހުންތެރިންގެ ބޮލަށް އުނދަގޫވާ ކަހަލަ ގޮތަކަށް ވެސް ވާހަކައެއް ނުދައްކަވައެވެ. އެއްވެސް އަންހެނަކަށް ނުވަތަ އަންހެން ރިޕޯޓަރަކަށް ބަދުބަސް ބުނެއެއް ނުހައްދަވައެވެ. ހަމައެކަނި ހިއްސާކުރައްވަނީ އެބޭފުޅާގެ ކަމަކާ ގުޅޭ އަމިއްލަ ވާހަކަތަކެވެ. ވާހަކަ ނިންމާލަނީ އެކަށީގެންވާ ސަބަބުތަކަށް ރިޢާޔަތްކޮށް، މަޑުމައިތިކަމާ އެކު، އެހެން މީހުންގެ އިޙްތިރާމް ލިބޭގޮތަށެވެ.

ނިންމުން.

އެއްވެސް ޝައްކެއް ނެތް ގޮތުގައި ބަރަކް އޮބާމާއަކީ ދުނިޔެ ދުށް އެންމެ މަޤުބޫލު ވާހަކަދެއްކުންތެރިންގެ ތެރޭގައި ހިމެނޭނެ ޝަޚްސިއްޔަތެކެވެ. ތަޤުރީރުތަކުގައި ދައްކާވާހަކައިގެ މަޤުޞަދު ހާސިލްކުރުމަށް އަޑުއަހާ މީހާގެ ސިކުނޑިއާއި ހިތް ދަމައިގަންނަ ކުޅަދާނަ ބޭފުޅެކެވެ. ވާހަކަދައްކާއިރު އެބޭފުޅާ ބޭނުން ތަނަކަށް އަޑުއަހާމީހުން ގޮވައިގެން ދިޔުމުގެ ކުޅަދާނަކަން ހުރި ބޭފުޅެކެވެ. ޕަބްލިކް ސްޕީކިންގެ މައިގަނޑު 3 ބައި ކަމުގައިވާ ލޯގޯސް (ހަޤީޤީ ސަބަބުތައް)، އިތޯސް (އިންސާނާގެ ޝަޚްސިއްޔަތު)، ޕޭތޯސް (އިންސާނިއްޔަ ޝުޢޫރު) ތަޤުރީރުތަކުގައި ވަރަށް ފުރިހަމައަށް ބޭނުންކުރައްވައެވެ. އޮބާމާގެ މުޅި ސިޔާސީ ޙަޔާތުގެ ކާމިޔާބު ގުޅިފައިވަނީ އެ ބޭފުޅާގެ ވާހަކަދެއްކުންތެރިކަމުގެ ހުނަރާއޭ ދެންނެވުން ކުށަކަށް ނުވާނެއެވެ. މޮޅު ވާހަކަދެއްކުންތެރިއަކަށް ވެވޭނީ މި ފަދަ ކުޅަދާނަ ވާހަކަދެއްކުންތެރިންގެ ސްޕީޗްތައް ގިނަގިނައިން އަޑުއަހައިގެންނެވެ. އެގޮތަށް ވާހަކަދައްކަން ފަރިތަކޮށްގެންނެވެ. ނުގުޑާ ފަދަ ޢަޒުމެއްގައި ހުރެ، އަމިއްލަ ނަފުސަށް އިތުބާރުކޮށްގެންނެވެ. ބަރަކް އޮބާމާ ވިދާޅުވެފައިވެއެވެ.

"އަބަދުވެސް އިތުރަށް ހޯދާ ބަލާށެވެ. ހުވަފެންތައް ދެކޭށެވެ. ސުވާލުކުރާށެވެ. ކުރިން އެނގިފައިވާ މިންވަރާ މެދު ހިތްހަމަޖެހިގެން ނުހުންނާށެވެ. ތިބާގެ އަމިއްލަ ވިސްނުމާއި، ޚިޔާލުތަކާއި، ބުރަ މަސައްކަތުގެ އެހީގައި ދުނިޔެ ބަދަލުކޮށްލެވިދާނެ ކަމަށް އަބަދުވެސް ޤަބޫލުކުރާށެވެ."