މިއަދު އޮފީހަށް ނުދެވުނީ ބޮލުގައި ރިހޭތީއޭ ބުނެފިނަމަ އެކަން ޤަބޫލުކުރާނެ މީހަކު ނުހުންނާނެއެވެ. ކޮންމެ މީހަކު ވެސް ބުނާނެއެވެ. "ބޮލުގައި ރިހުމަކީ ބަހަނާއެކެވެ." "ހަމަ ކަންނެތީއެވެ." "ކަންފަސޭހައީ އެވެ." "ވަޒީފާއަށް އިޚުލާސްތެރި ކަމެއް ނެތީއެވެ." ކުރަން ރާވާފައިވާ މުހިއްމު ކަމެއް ކެންސަލް ކުރީ ބޮލުގައި ރިހޭތީއޭ ބުނެފި ނަމަ އެމީހަކު ވާނީ ވަރަށް "ފަނި" މީހަކަށެވެ. ރޭވުންތައް ރޭވުމަށްފަހު އެންމެ ފަހު ވަގުތު ކަންކަން ކެންސަލް ކޮށްލާ މީހަކަށެއެވެ. މިއީ ގިނަ މީހުން ވަރަށް ފޫހިވާނެ ކަމެކެވެ. އެކަމަކު މައިގްރެއިންގެ ސަބަބުން ބޮލުގައި ރިހޭ ރިހުމަކީ އެއްވެސް ޙާލެއްގައި ބަހަނާއެއް ނޫނެވެ. ކަންކަން "ފަނި"ކުރުމުގެ މަޤުޞަދުގައި ހަދާ މަކަރެއް ނޫނެވެ. މައިގްރެއިންގެ ރިހުން ތަޖުރިބާ ކުރެވިފައި ނުވާ މީހަކަށް އެކަމުގެ ވޭން ހިތަކަށް ނުގެނެވޭނެއެވެ. މައިގްރެއިންގެ ވޭން ތަޙައްމުލުކުރާ މީހެއްގެ ކޮންމެ ދުވަހެއްގެ ދިރިއުޅުމުގައި ހުންނާނެ ދަތިތަކާއި، އުނދަގޫތަކަކީ ދުލާއި ގަލަމުން ބަޔާންކޮށްދެވޭ ވަރަށް ވުރެ މާ ގިނަ، މާ އުނދަގޫ އިހުސާސްތަކެކެވެ.

މައިގްރެއިން އަކީ ކޮބާ؟

ބޮލުގައި ރިހުމަކީ ވަރަށް އާންމު ކަމެކެވެ. ޙަޔާތުގެ ކޮންމެ ވެސް ހިސާބެއްގައި، ކޮންމެ ވެސް ސިފައެއްގައި ބޮލުގައި ރިހުން ތަޖުރިބާނުކުރާ އެއްވެސް މީހަކު ހުންނާނެ ކަމަކަށް ނުބެލެވެއެވެ. ނަމަވެސް މައިގްރެއިންގެ ސަބަބުން ބޮލުގައި ރިހުމަކީ އާންމު ގޮތެއްގައި ބޮލުގައި ރިހުމާއި ވަރަށް ތަފާތު ރިހުމެކެވެ. މިއީ ވަރަށް ގަދަ ރިހުމެކެވެ. އާންމުކޮށް މައިގްރެއިންގެ ރިހުން ހުންނާނީ ބޮލުގެ އެއް ފަޅީގައި ވިންދުޖަހާ ކަހަލަ ގޮތަކަށެވެ. ޞިއްޙީ މާހިރުން ވިދާޅުވާ ގޮތުގައި މިއީ ބޮލާއި ކަނދުރާގެ ނާރުތަކާ ގުޅިފައިވާ ރިހުމެކެވެ. މައިގްރެއިންގެ ސަބަބުން ބޮލުގައި ރިއްސާއިރު ރިހުން އަންނާނީ ވަރިވަރި(phases)  އަށެވެ. ބައެއް މީހުންނަށް ހަފުތާއަކު އެއްފަހަރު، އަނެއް ބަޔަކަށް ދެ ހަފުތާއިން އެއްފަހަރު ނުވަތަ މަހަކު އެއްފަހަރު ކަހަލަ ގޮތަކަށެވެ. މިގޮތަށް ވަރިވަރިއަށް އަންނަ ރިހުމަށް ކިޔަނީ "މައިގްރެއިން އެޓޭކް"އެވެ. އާންމުކޮށް މައިގްރެއިން އެޓޭކެއްގެ ރިހުން 4 ގަޑިއިރާއި 72 ގަޑިއިރަށް ދެމިގެން ދެއެވެ. އޭގެ ފަހުން އާންމު ޙާލަތަށް ރުޖޫޢަވެއެވެ.

ތަފާސްހިސާބުތަކުން ދައްކާގޮތުގައި މައިގްރެއިންގެ ވޭން ތަޙައްމުލުކުރާ ފިރިހެނުންނަށް ވުރެ އަންހެނުން މާ ބޮޑަށް ގިނައެވެ. އެގޮތުން މައިގްރެއިން ހުންނަ މީހުންގެ ތެރެއިން 85 އިންސައްތައަކީ އަންހެނުންނެވެ. ދުނިޔޭގެ ނިސްބަތުން ބަލާއިރު 3 ވަނަ އަށް އެންމެ ބޮޑު އާބާދީއެއް އޮންނަ އެމެރިކާގައި، މައިގްރެއިންގެ ވޭން ތަޙައްމުލުކުރާ 39 މިލިއަން މީހުން އުޅެއެވެ. މިއީ 18 އަހަރުން މަތީގެ ބޮޑެތި މީހުންގެ އަދަދެވެ. މީގެ ތެރެއިން 4 މިލިއަން މީހުންނަކީ ހަމަ ކޮންމެ ދުވަހަކު ވެސް މި ރިހުން ތަޙައްމުލުކުރަން ޖެހިފައިވާ މީހުންނެވެ. މައިގްރެއިންގެ ސަބަބުން ކޮންމެ ދުވަހެއްގެ ދިރިއުޅުމުގައި ކުރަން ހުންނަ އެތައް ކަމަކަށް ހުރަސް އެޅެއެވެ. ކިޔެވުމާއި، ވަޒީފާއާއި، ގޭތެރޭގެ މަސައްކަތްތަކާއި، ދަރިން ބެލުން ފަދަ ކޮންމެ ދުވަހެއްގެ ދިރިއުޅުމުގައި ކުރަން ހުންނަ ޒަރޫރީ ކަންކަން ނުކުރެވި، އާންމު ދިރިއުޅުމުގެ ކަންކަން ބޮއްސުންލައިގެން ދެއެވެ. މީގެ އިތުރުން އަބަދާއަބަދު މައިގްރެއިންގެ ރިހުން ތަޙައްމުލު ކުރަން ޖެހުމަކީ އެންޒައިޓީ، ޑިޕްރެޝަން އަދި ނިދަން އުނދަގޫވުން ފަދަ ބޮޑެތި ޞިއްޙީ މައްސަލަތަކަށް މީހާ ހުށަހެޅިގެންދާ ސަބެބެކެވެ.

ކީއްވެ ކުރިމަތިވާ ޙާލަތެއް؟

މައިގްރެއިންގެ ޙާލަތު މެދުވެރިވާ އަސްލު ސަބަބު ޞިއްޙީ މާހިރުންނަށް ދެނެގަނެވިފައެއް ނުވެއެވެ. އެކަމަކު ކަމާބެހޭ ބައެއް މާހިރުން ވިދާޅުވާ ގޮތުގައި މައިގްރެއިންގެ ސަބަބުން ބޮލުގައި ރިހެން މެދުވެރިވަނީ ސިކުނޑީގައި ހުންނަ ސެލްތަކުގެ ގްރޫޕްތަކުން އާދަޔާޚިލާފަށް ބޮޑަށް ހަރަކާތްތެރިވާން ފެށުމުންނެވެ. މިކަމުގެ ސަބަބުން ސެރޮޓޯނިން (serotonin) ފަދަ ސިކުނޑީގައި ހުންނަ ކެމިކަލްތައް އިތުރުވެއެވެ. ސެރޮޓޯނިން އަކީ ނާރުތަކުގެ ސެލްތަކުން ކުރާ މުޢާމަލާތްތަކަށް ކޮންމެހެން ބޭނުންވާ ކެމިކަލްއެކެވެ. އެކަމަކު ހުންނަން ޖެހޭ މިންވަރަށް ވުރެ ސެރޮޓޯނިން އިތުރުވުމުން ލޭ ހޮޅިތައް ހިމަވެ، ލޭ ހިނގާ ޕްރެޝަރު މަތިވެއެވެ. ސިކުނޑިއާ ގުޅިފައިވާ ލޭ ހޮޅިތަކުގައި ލޭ ހިނގާ ޕްރެޝަރު މަތިވުމުން ބޮލުގައި ރިހުން އުފެދުމަށް މަގުފަހިވެއެވެ.

ސިކުނޑީގައި ހުންނަ ސެލްތަކުގެ ގްރޫޕްތަކުން އާދަޔާޚިލާފަށް ބޮޑަށް ހަރަކާތްތެރިވާން ފަށާ ނުވަތަ މައިގްރެއިން އެޓޭކް އައުމަށް މެދުވެރިވާ ބައެއް ކަންކަން ވެސް ޞިއްޙީ މާހިރުން ފާހަގަކުރައްވާފައިވެއެވެ. އޭގެ ތެރޭގައި ސިކުނޑީގެ ނާރުތަކާއި، ހޯމޯންތަކާ ގުޅޭ ކަންކަމުގެ އިތުރުން އަންނަނިވި ކަންކަން ހިމެނެއެވެ.

  • އުފެދުމުގައި ހުރި ކަމެއްގެ ސަބަބުން.
  • އާއިލީ ގޮތުން ބަލި ވާރުތަކުރުން.
  • މާ ބޮޑަށް ކަންކަމާ ވިސްނުން.
  • ހަމަނިދި ނުލިބުން.
  • ދިރިއުޅޭ މާޙައުލު.
  • މޫސުމީ ބަދަލުތައް.
  • ކެއުމުގައި ބޭނުންކުރެވޭ ބައެއް ކަހަލަ ބާވަތްތަކުގެ ސަބަބުން (ޗީޒް، ޗޮކްލެޓް، މާ ގިނައިން ލޮނު އެކުލެވޭ ބާވަތްތައް، ތައްޔާރީ ކާނާ).
  • ބަނގުރާ ބުއިން ފަދަ ޞިއްޙަތައް ގެއްލުން ހުރި އާދަތައް.

މީގެ އިތުރުން ވެސް މައިގްރެއިން އެޓޭކް އަންނަ ސަބަބުތައް ހުރެއެވެ. އަދި ހަމައެހެންމެ އެކި މީހުންނަށް އެޓޭކް އައުމަށް މެދުވެރިވާ ސަބަބުތައް ތަފާތުވެއެވެ. އަބަދު މައިގްރެއިން އެޓޭކް އަންނަ ނަމަ އެފަދަ ސަބަބުތައް އަމިއްލައަށް ދެނެގަތުމަކީ ވަރަށް މުހިއްމު ކަމެކެވެ.

މައިގްރެއިން ދެނެގަންނާނީ ކިހިނެއް؟

ބޮލުގައި ރިހުމަކީ ވަރަށް އާންމު ކަމަކަށް ވާތީ މައިގްރެއިން ދެނެގަތުން ވެފައި އޮންނަނީ ވަރަށް އުނދަގޫ ކަމަކަށެވެ. އެގޮތުން މައިގްރެއިން ހުންނަ މީހުންގެ ތެރެއިން 50 އިންސައްތަ މީހުންނަކީ އެމީހުންގެ ބައްޔަކީ މައިގްރެއިން ކަން ނޭނގޭ މީހުންނެވެ. ކިތަންމެ ބޮޑަށް ބޮލުގައި ރިހުނަސް އެއްވެސް ވަރަކަށް ޑޮކްޓަރަށް ނުދައްކާ މީހުންނެވެ. ބައެއް މީހުން ކެތްނުވާވަރު ވުމުން ޕެރެސެޓްމޯލް ފަދަ ބޭހެއް ބޭނުންކޮށްލިޔަސް، އަނެއް ބަޔަކީ އެއްވެސް ބޭހެއް ބޭނުންނުކޮށް، މުޅި ދުވަސް އެވޭނުގައި ހޭދަކުރާ މީހުންނެވެ. "މިއީ އާދައިގެ ބޮލުގައި ރިހުމެކޭ" ނުވަތަ "މިއީ އަބަދު ވެސް ރިހޭ ބޮލެކޭ" ބުނެ، މާ ބޮޑަށް އަޅާނުލާ ތިބެވެނީއެވެ. އެކަމަކު މިއީ އެއަށް ވުރެ މާ ސީރިއަސް މައްސަލައެވެ. އަބަދު ބޮލުގައި ރިހޭ ނަމަ ބަލި ދެނެގަންނަން ޖެހޭނެއެވެ. ރަނގަޅު ވަގުތުގައި އެކަށީގެންވާ ރަނގަޅު ފަރުވާ ހޯދަން ވާނެއެވެ.

މައިގްރެއިން ދެނެގަނެވޭނެ ބައެއް އަލާމާތްތައް:

  • ބޮލުގެ އެއް ފަޅީގައި ރިހުން.
  • ވިންދުޖަހާ ގޮތަށް ރިހުން ހުރުން.
  • ރިހުން ހުންނަ ފަރާތުގެ ލޮލުގައި ރިހޭ ހެން ހީވުން.
  • ބޮލުގައި ރިހޭ އިރު މޭ ނުބައިކޮށް، ހޮޑުލެވުން.
  • ގަދަ އަލި، ގަދަ އަޑު އަދި ގަދަ ވަސްތަކުގެ ސަބަބުން އުނދަގޫވެ، ރިހުން އިތުރުވުން.
  • ހަށިގަނޑު ވަރުބަލިވާ ކަހަލަ މަސައްކަތް ކުރުމުން ރިހުން ގަދަވުން.
  • ރިހުން 4-3 ދުވަހަށް ދެމިގެން ދިޔުން.

ބޮލުތެރެއިން ވިންދުޖަހާ ގޮތަށް ރިހުން ހުންނަ އިރު އާންމު ގޮތެއްގައި ރިހެނީ ބޮލުގެ އެއްފަޅީގައެވެ. އެގޮތުން ބޮލުގެ ކަނާއަތް ފަޅި، ބޮލުގެ ވައަތް ފަޅި، ފުއްކިބަ އަދި ދެ ބުމައާ އެކު ނިތްކުރީގައި ވެސް ރިހުން ހުރެއެވެ. އަދި ބައެއް ފަހަރު ރިހުން ހުންނަ ފަޅި ބަދަލު ވެސް ވެއެވެ. އެގޮތުން އެންމެ ފުރަތަމަ ކަނާއަތް ފަޅީގައި ހުރި ރިހުން، ފަހުން އެހެން ފަޅިއަކަށް ބަދަލުވާ ފަހަރު ވެސް އާދެއެވެ. އާންމުކޮށް ބޮލުގައި ރިހޭއިރު ނިންޖަކީ އަރާމެއް ނަމަވެސް، މި ގޮތަށް ރިހޭއިރު ވަރަށް ބޮޑަށް ނިދަން އުނދަގޫވެއެވެ. ނިދިފައި ހޭލެވޭ އިރު ވެސް އެއްވެސް ވަރެއްގެ އަރާމެއް، ލުއިކަމެއް ނުލިބެއެވެ.

މައިގްރެއިން އަށް އޮތް ފަރުވާއަކީ ކޮބާ؟

މައިގްރެއިން އަކީ އެއްވެސް ބާވަތެއްގެ ޓެސްޓަކުން ނުވަތަ ސްކޭނަކުން ފެންނަން ހުންނަ ބައްޔެއް ނޫނެވެ. އަބަދު ބޮލުގައި ރިހޭތީ ޑޮކްޓަރަށް ދައްކާއިރު މައިގްރެއިން ހުރިކަމަށް ބެލެވޭނީ އިސްވެ ދެންނެވުނު އަލާމާތްތަކުގެ ތެރެއިން 2 ނުވަތަ އެއަށް ވުރެ ގިނަ އަލާމާތް ހުރި ނަމައެވެ. މައިގްރެއިން އަކީ މިހާތަނަށް ވަކި ޚާއްޞަ ފަރުވާއެއް ހޯދިފައި ނުވާ ބައްޔެކެވެ. އެހެންކަމުން އާންމު ގޮތެއްގައި މައިގްރެއިން އަށް ދޭ ބޭހަކީ ބޮލުގައި ރިހޭ ރިހުން ކުޑަކުރުމަށް ނުވަތަ ތަދު ކެނޑުވުމަށް ދޭ ބޭހެވެ. މިގޮތަށް ބޭސް ދޭއިރު މީހާގެ އުމުރާއި، އެޓޭކް އަންނަ މިންވަރާއި، ބަލީގެ ސީރިއަސް ކަމަށް ބަލާނެއެވެ.

މައިގްރެއިން އަކީ އާދަޔާޚިލާފަށް ގަދަ، ގިނަ ވަގުތަށް ދެމިގެންދާ ރިހުމަކަށް ވާތީ ކޮންމެ މީހަކު ވެސް ބޭނުން ވާނީ ވީ އެންމެ އަވަހަކަށް އެ އުނދަގޫ ޙާލަތުން މިންޖުވެވޭނެ ގޮތެއް ހޯދާށެވެ. އެގޮތުން ތަދު ކެނޑުވުމަށް ހުންނަ ބާރުގަދަ ބޭސްތައް ބޭނުންކުރެވޭ ފަހަރު ވެސް ވަރަށް ގިނައިން އާދެއެވެ. އެކަމަކު ތަދު ކަނޑުވާ ބޭސްތަކާއި އިންޖެކްޝަންތަކަކީ އޭގައި ވަރަށް ގިނަ "ސައިޑް އިފެކްޓްސް" ހުންނަ އެއްޗެއްސެވެ. ތަދު ކަނޑުވާ ބޭސް އާންމު ގޮތެއްގައި ބޭނުންކުރާ ނަމަ ކިޑްނީ ފެއިލްވުން، ހާޓް އެޓޭކް ޖެހުން، ލޭ ހިނގުމުގައި މައްސަލަތައް ދިމާވެ ސްޓްރޯކް ޖެހުން ފަދަ ބޮޑެތި ޞިއްޙީ މައްސަލަތައް މެދުވެރިވެއެވެ. އެހެންކަމުން މައިގްރެއިން ހުންނަ މީހެއް ނަމަ އެންމެ ޚާއްޞަ ސަމާލުކަމެއް ދޭންވީ މައިގްރެއިން އެޓޭކް އަންނަ ކަންކަން އަމިއްލައަށް ފާހަގަކޮށް، އެކަންކަމާ ދުރުވުމަށެވެ. ކެއުން ބުއިމާއި ދިރިއުޅުމުގެ ވައްޓަފާޅީގައި ހުރި ޞިއްޙަތަށް ގެއްލުންދޭ އާދަތަކުން އެއްކިބާވުމަށެވެ. އޭރުން މައިގްރެއިންގެ ސަބަބުން ބޮލުގައި ރިހޭ މިންވަރު ވަރަށް ބޮޑަށް މަދު ކުރެވޭނެއެވެ.