ދުނިޔޭގައި އިންސާނުން ތަރުތީބު ކުރާ ނިޒާމުތަކާއި އުސޫކުތައް ކިތަންމެހާވެސް ގިނައެވެ. އުފައްދާ ފައްކާ ކުރާ ވަޟުޢީ ގާނޫނު ތަކާއި ގަވާއިދުތައް އަމުދުން ގިނައެވެ. ބައެއްކަހަލަ ގަވައިދުތަކާއި އުސޫލު ތަކަކީ ވަކި ކަންކަމަށް ހާއްސަކޮށް ވަކި ބަޔަކު އުފަންކުރުވާ އެއްޗެއްސެވެ. އެއީ އެބައެއްގެ ތެރޭގައި، އެބަޔަކު ކިޔަމަންވެ ކަންކަން ތަރުތީބު ކުރަންޖެހޭ ގަވާއިދުތަކާއި އުސޫލުތަކެވެ. ހަމަ އެފަދައިން ދުނިޔޭގެ ހުރިހާ ގައުމަކަށް އާންމުވާނޭހެން ނުވަތަ ގައުމަކުން، އެ ގައުމެއްގެ ހުރިހާ ހިސާބަކަށް އާންމުވާނޭފަދަ ގަވައިދުތަކާއި އުސޫލުތައް ފަރުމާކޮށްފައި ހުރެއެވެ. މިއީ އިންސާނުން ދުނިޔޭގައި އުޅޭ އިރު، އޭނާގެ ވަށައިގެން އަބަދުވެސް ފެންނާން ހުންނާނޭ އުސޫލުތަކާއި ގަވައިދު ތަކެވެ.

އާދޭހެވެ! ބޭރު ކަރަ ކަރައިގެ ބޮޑެތި މަނަވަރުތަކާއި މުދާ އުފުލާ އޮޑެތި އާގުބޯޓު ފަހަރު، ރާއްްޖޭގެ ތިލަ ފަޅުތަކަށް އެންދަމަން ވަދެ އުޅުމަކީ ބުއްދި ހަމަޖެހޭ ނުވަތަ ދެކޮޅު ނުޖެހޭތާ މެދުވެސް ނުޖެހޭނޭ ވާހަކައެކެވެ. އެއީ އެ އުޅަނދުފަހަރަކީ މިފަދަ މާހައުލުތަކުގައި ގެންގުޅެން ނުވަތަ ބޭނުން ކުރަން އެކަށީގެންވާ އުޅަދުތައް ކަމުގައި ނުވުމުވެ. އަދި އެފަދަ ބޮޑެތި އުޅަނދުފަހަރަށް، ރާއްޖޭގެ ލިތަ ފަޅުތަކަށް ވަނުމަކީވެސް މުސްތަޙީލު ކަމެކެވެ. އެހެންކަމުން ރާއްޖޭގެ ތިލަ ފަޅުތަކުން އެންދަމަން ވަދެ އުޅެން ޖެހޭނީ ރާއްޖޭގެ ކުދި އޮޑި ފަހަރެވެ. ފެނަށް ލުއި، ތިލަ ދޯނި ތަކެވެ. އިސްވެ ބުނެވުނު ފަދައިން އެފަދަ ބޮޑު ބޯއްޓެއް، ރާއްޖޭގެ ފަޅަކުން އެންދަމަން އުޅޭނަމަ، އެކަމާ މީހުން ކުރާނީ މަލާމާތެވެ. އެ ކަމެއް ވާނީ ތާކުން ތާކުން ނުޖެހޭ ކޮސް ކަންކަމަށެވެ. އެކަމެއް ކުރާ ބަޔަކަށް މީހުން ކުރާނީ މަލާމާތެވެ. އެބަޔަކު އެއީ މޮޔައިން ކަމުގައިވެސް ބުނާނެއެވެ. މިއީ ދުނިޔެ ތަމްސީލު ކުރަމުންދާފަދަ ހަގީގަތް ތަކެވެ.

ދައްކަން މިއުޅެނީ އާގު ބޯޓެއް އަދި މަނަވަރެއްގެ ވާހަކައެއްވެސް ނޫނެވެ. މި ލިޔުމުގެ ފެށުމުގައި ދެންނެވުނު ގަވައިދުތަކާއި އުސޫލު ތަކުގެ ވާހަކައެވެ. ދުނިޔޭގެ ބޮޑެތި ގައުމުތަކުގައި ނުވަތަ ދުނިޔޭގެ ހުރިހާ ގައުމަކަށް އާންމުވާނޭހެން، ހުރިހާ ގައުމުތަކަކުން އަމަލުކުރަންޖެހޭ ގޮތަށް ހެދިފައި ހުންނަ އުސޫލު ތަކާއި ގަވާއިދުތައް ހުރެއެވެ. މިފަދަ ގަވާއިދު ނުވަގަ އުސޫލުތައް، ކުދި ކުދި އާބާދީތައް ދިރިއުޅޭ ރާއްޖެފަދަ މީސްކޮޅު މަދު މުޖުތަމައުތަކަށް ތަންފީޒުކުރުމުން ނުވަތަ ތަންފީޒު ކުރަން އުޅުމުން އެކަންކަން އުސޫލާ އެއްގޮތަށް ހިނގުމަށްވުރެ ގާތީ ނުހިނގުމެވެ. އުސޫލުތަކުގެ ތަރުތީބު ގެއްލި ހަމަ އާއި ހަނަމަ އޮޅި، ވާނުވާ ނޭނގި ހަދާނޭ ނުވަތަ ހެދޭނޭ ގޮތް ނޭނގޭ ހިސާބަށް ހިނގައިދާނެއެވެ. މިހެން ކަން އޮތް ކަމުގައި ވީނަމަވެސް ހަރުދަނާ ކަމާއި އެކު ތަންފީޒުވަމުންދާ އުސޫލުތައް ވެސް ހުންނާނެއެވެ. އިސްވެ ދެންނެވުނު ފަދައިން އޭގެ ހަމައިން ތަންފީޒު ނުވާ ކަންކަން ތަންފީޒު ކުރުމަށް އުޅޭނަމަ އެ ކުރެވެނީ ބޮޑެތި އާގުބޯޓުފަހަރު ރާއްޖޭގެ ތިލަފަޅު ތަކުން އެންދަމަށް އުޅުން ފަދަ ކަންކަމެވެ.

އާދޭހެވެ! ދިވެހިންގެ ތެރޭގައިވެސް ހުނަރުވެރި ފަންނުވެރި މީހުން އެބަ އުޅެއެވެ. ހަރުދަނާ ޝަހުސިއްޔަތުން އެބަ އުޅެއެވެ. އިލްމީ ގާބީލު މުޢާޠިނުން އެބަ އުޅެއެވެ. އެހެންކަމުން މިކަމުގައި އޮތް ގޮތަކީ މިފަދަ ކަންކަމަށަ އަހަރެމެންގެ މުޖުތަމައުތަކަށް ފެތޭނޭހެން، އެފަދަ އުސޫލުތައް އަހަރެމެން އަމިއްލަ އަށް ހެދުމެވެ. އެފަދަ ގާބިލުކަން އަހަރެމެންގެ ތެރޭގައި ހުންނާނެއެވެ. ނުވަތަ އެބަހުއްޓެވެ. ވެފައި ދެން ވާހާވެސް ގޮތަކީ ދިވެހިންގެ ކަންނެތްކަމާއި އެކު މިފަދަ އަމިއްލަ މިނިވަން މުސްތަގިއްލު އުސޫލެއް ހަދާނުލެވެނީއެވެ. ބަޔަކު އެއްޗެއް ހަދާފާ އޮތީތީވެ، އެ އެއްޗެއްގައި ހިފައިގެން ދުވަނީއެވެ. 

އާދޭހެވެ! ދިވެހި ތިލަ ފަޅުތަކަށް ވަދެވޭ ވަރުގެ އޮޑި އޮޑިއަށް ދިވެހިން އަރަން ވެއްޖެއެވެ. އެފަދަ އޮޑިއެއް ނެތްނަމަ، ބަނދެގެންވެސް މެއެވެ. ބޮޑެތި އާގު ބޯޓު ފަހަރުގައި ދިވެހިން އައިސް، ދިވެހި ތިލަ ފަޅުތަކުން އެންދަމަން އުޅުމުން ދިވެހިން ކުރާނީ މަލާމާތެވެ. ޖަހާނީ ޖޯކެވެ. ކުރާނީ ފުރައްސާރައެވެ. އެހެންކަމުން ދިވެހިން ތަހުޒީބު ވާން އެބަޖެހެއެވެ. ދިވެހި ގައުމަށް ފެތޭ އުސޫލުތަކާއި ގަވާއިދުތައް ދިވެހިން އަމިއްލައަށް އުފަން ކުރަން އެބަޖެހެއެވެ. ގަވައިދާ އުސޫލާއި އެއްގޮތަ ކަންކަން ހިނގާނީ އޭރުންނެވެ.