ސެމްސަން ގެލެކްސީ އަންޕެކްޑް އިވެންޓް އަންނަ ފެބުރުއަރީ މަހުގެ 9 ވަނަ ދުވަހު ބާއްވަން ނިންމައިފިއެވެ.
މިއަހަރުގެ ފުރަތަމަ އަންޕެކްޑް އިވެންޓްގެ ނަމަކަށް "ދި އެޕިކް ސްޓޭންޑަޑް" ދީފައިވާއިރު، ސެމްސަންގެ ރަސްމީ ޓުވިޓާ އެކައުންޓްގައި ބުނެފައިވާ ގޮތުން މިފަހަރުގެ އިވެންޓް ވެސް ބޭއްވުމަށް ނިންމާފައިވަނީ ވާޗުއަލްކޮށެވެ.
އަދި މިދިޔަ އަހަރެކޭ އެއްފަދައިން މިފަހަރުގެ އިވެންޓްވެސް ސެމްސަންގެ ރަސްމީ ވެބްސައިޓުން ލައިވް ސްޓްރީމްކުރާނެ އެވެ.
މިފަހަރުގެ އިވެންޓްގައި ދައްކާލުމަށް ހަމަޖެހިފައިވާ ޑިވައިސްތަކުގެ ތެރޭގައި، ސެމްސަން ގެލެކްސީ ޓެބް 8، ސެމްސަން ގެލެކްސީ އެސް22 ގެ އިތުރުން މިހާތަނަށް އެ ކުންފުނިން ނެރޭ އެންމެ ފާހަގަކޮށްލެވޭ ނޯޓް ސީރީޒްގެ ޑިވައިސް ވެސް ތައާރަފްކުރާނެ އެވެ.
މި އިވެންޓްގައި ނެރޭނެ ކަމަށް ބެލެވޭ ޑިވައިސްތަކާ ބެހޭގޮތުން ބައެއް މަޢުލޫމާތުތައް މިހާރު ލީކްވެފައިވާއިރު، މީގެކުރީން ނެރުނު ގެލެކްސީ އެސް21 ގެ ޑިސްޕްލޭ އަށް ވުރެ މިފަހަރުގެ ފްލެގްޝިޕް ފޯނުގެ ޑިސްޕްލޭ ކުޑަތަންކޮޅެއް ކުޑަވާނެ އެވެ. އެގޮތުން، ކުރީގެ ފޯނުގައި 6.2 އިންޗީގެ ޑިސްޕްލޭއެއް ހިމެނުނުއިރު، މިފަހަރުގެ ގެލެކްސީ އެސް22 ގެ ޑިސްޕްލޭގައި ހުންނާނެ ކަމަށް ބެލެވެނީ 6.1 އިންޗިއެވެ.
މީގެއިތުރުން، މިފަހަރުގެ ފޯންގައި ކުރީގެ ފޯނާއި އަޅާބަލާއިރު މުޅިން އައު ފީޗާސްތައް ހިމެނޭނެ ކަމަށް ވެސް ހަބަރުތައް ބުނެއެވެ.
ސެމްސަންގެ މިއަހަރުގެ ފުރަތަމަ އަންޕެކްޑް އިވެންޓް ފެށުމަށް ހަމަޖެހިފައިވަނީ އަންނަ ފެބުރުއަރީ މަހުގެ 9 ވަނަ ދުވަހު ރާއްޖެގަޑިން 20:00 ގައެވެ.