ލަހުޖާގަ ވީ ފޮނި މީރުކަން، ޢަމަލުން އެކަން ފެންނަން ނެތަސް

ވަހުމާ ކުރާ ޝައްކުގެ މަތީ، ތާ އުމުރު އެގޮތަށް ހޭދަ ކޮށް

 

އޮޅުވާލުމާ މަކަރުގެ ނިޔާ، އަބަދާ އަބަދު އިއްވާނެޔޭ

ފޮޅުވާ މަލުން ވިހަގަދަ އަރާ، ގަދަ އާވިތައް ޖައްވުގެ ތެރަށް

 

ފައްތާ ކަނޑަށް ދޮގުތައް ހަދާ، އަޅައޭ ފުރާ ވިސްނާ ނުލާ

ހައްދާލުމާ ދަޅަ ދެއްކުމާ، ރަން ރިހި ވިދާ ބަބުޅާ ގޮތަށް

 

އެދުމެއް އޮވެން ކުރެވޭ ވެދުން، އެދުމުގެ ދުވަސް ހަމަ ގާތް ވުމުން

ވެދުމަށް އެދޭ ކަންކަންތަކާ، ކުރެވޭ "ޝުކުރު"ތައް ގިނަ އެކޮށް

 

އަދުގާ ލިބުން ފައިދާތަކެއް، މިގޮތަށް އުޅޭ އުޅުމުން ވެޔޭ

ތަދުވާނެ އައުމުން ފަހު ދުވަސް، މިގޮތަށް އުޅޭ ހަމަ އެންމެނަށް

 

ވިސްނާ ތިބޭ އަހުލުން މިތާ، މިގޮތަށް އިވޭ އަޑުއަޑު އަހަން

ގިސްލާ ރޮވުން މަދުވާނެއޭ، ހޭލާ ތިބިއްޔާ ކަންކަމަށް