ޝައުގުވެރިކަމަކީ ވަރަށް ތަފާތު ކަމެކެވެ. އެކި އިންސާނުން ޝައުގުވެރިވާނީ އެކި ކަންކަމަށެވެ. އެކަކު ވަރަށް ގަޔާވެގެން ކުރާ ކަމެއް، އަނެކާ ދުވަހަކުވެސް ކުރުމުގެ ޝައުގުވެރިކަން ނެތި ހިނގައިދާނެއެވެ. ހުނަރާއި ޝައުގުވެރިކަމަކީ އާއިލީގޮތުން ވާރުތަކުރާ ކަމެއް ނަމަވެސް، ޝައުގުވެރިކަމުގައި އެކަކު އަނެކަކާއި ތަފާތުތަކެއް ހުންނާނެއެވެ. އެއްބަނޑު އެއްބަފާ އަހުންނާއި އުހުތުންގެ ތެރޭގައްޔާއި މައިންބަފައިންނާއި ދަރިންގެ ތެރޭގައިވެސް ޝައުގުވެރިކަން ނުވަތަ ޝައުގުވެރިވާ ކަންކަން އެކި މީހުންގެ ތަފާތުވެދާނެއެވެ. މިއީ އިންސާނީ ޠަބީއަތެވެ.

ޝައުގުވެރިވުމުގެ މާނައަކީ ކަމަކަށް ނުވަތަ އެއްޗަކަށް ނުވަތަ އިންސާނަކާއި ދޭތެރޭ، އެ ކަމެއް ނުވަތަ އެއްޗެއް ނުވަތަ އެ އިންސާނަކު، ބޭނުންވެގެން ހިތުގައި އުފެދޭ ޝުއޫރު ނުވަތަ އިހުސާސެވެ. ކޮންމެ އިންސާނަކުވެސް، ބޮޑުވަމުން އަންނައިރު، އެ އިންސާނަކު ޝައުގުވެރިވާ ކަންކަމާއި އެ އިންސާނަކު ދޯޅަވާނެއެވެ. އެ ކަންކަމުގެ ތެރެއަށް މަޑު މަޑުން ވަދެވޭނެއެވެ. ނަމަވެސް އަދުގެ ތަހުޒީބު ވިސްނުމުގައި، ބޮޑެތިވަމުން އަންނަ ކުދިންނަކީ، ވަކި "މަންޖަހަކުން" ހިނގަން ޖެހޭ ކުދިން ކަމުގައި މި ވަނީ ވެފައެވެ. އެ ކުއްޖާގެ ޝައުގުވެރިކަމަށް ވުރެ، އެ ކުއްޖާ އިސްކަން ދޭން ޖެހެނީ މި ދެންނެވި "މަންހަޖުގެ" އޮނިގަނޑަށެވެ.

އާދޭހެވެ! ވަކި މަންހަޖެއް ގެންގުޅުމަކުން ގޯހެއް ނެތެވެ. މައިންބަފައިން، އެކުދިންނާއި މެދު ވަކި ވިސްނުމެއް ނުވަތަ ވަކި ތަސައްވުރެއް ގެންގުޅުމަކުންވެސް އެއްވެސް މައްސަލައެއް ނެތެވެ. އެހެނަސް މި ދަންނަވާ މަންހަޖާއި މައިންބަފައިންގެ ތަސައްވުރަކީ އެ ކުއްޖާގެ ހިޔާލާއި ފިކުރުގެ ތެރެއަށް ވަދެގަނެ، އެ ކުއްޖާގެ އަމިއްލަ ހިޔާލު އުފެއްދުން ހަނިކުރާ ކަމަކަށް ވެގެންނުވާނެއެވެ. ކަން މިހެން ވެއްޖެނަމަ، އެކަމަކި އެކުއްޖަކު ޝައުގުވެރިވާ ކަމެއް ދެކެވެސް ފޫހިވެ އެކުޖެއްގެ ހިތުގައި ނަފްރަތު އުފެދިދާނޭ ކަމެކެވެ. އެހިސާބުން އެ ކުއްޖާގެ ހަގީގީ ސިފަ ގެއްލުނީއެވެ. އަސްލު މަންޒަރު ބަދަލުވީއެވެ.

މައިންބަފައިންނާއި މުދައްރިސުންނަކީ ބޮޑުވަމުން އަންނަ ކުއްޖާ އާއި އެންމެ ގާތުން މަސައްކަތް ކުރެވޭނޭ މީހުންނެވެ. އެހެންކަމުން ކުއްޖާގެ މައިންބަފައިންނާއި، މުދައްރިސުން، އެ ކުއްޖާގެ ޝައުގުވެރިކަން ހުރި ދާއިރާއެއް ދެނެގަތުން މުހިންމެވެ. އަދި އެ ދާއިރާއަކުން އެ ކުއްޖާއަށް ކުރިއަށް ދިއުމުގެ ފުރުސަތު ފަހިވެފައި އޮންނަން ވާނެއެވެ. ނުވަތަ ފަހި ކޮށްދޭން ވާނެއެވެ.

އާދޭހެވެ! އިސްވެ ދެންނެވުނު ފަދައިން ޝައުގުވެރިކަމަކީ ވަރަށް ތަފާތު ކަމެކެވެ. އެހެނީ އިންސާނާގެ އަމިއްލަ ޝައުގުވެރިކަން އޭނަަގެ ނަފްސުގެ އެދުންތަކަށް ހުރަސް އަޅާނެއެވެ. ނަމަވެސް މިއީ އިންސާނާ ކުޑައިރު ނުވަތަ ބޮޑުވަމުން އަންނަ ދުވަސްވަރު ދެނެގަންނަން އުނދަގޫ ކަމެކެވެ. އެހެނަސް އިންސާނާ ބޮޑުވެ މުޖުތަމައުގެ ތެރެއަށް ނުކުންނަން ޖެހޭ ދުވަހަކީ އެ އިންސާނަކަށް މި ހުރަސްތައް ފެންނާނޭ ދުވަހެވެ. އެހެނީ މި ހުރަސްތައް އުފައްދާ ސަބަބުތަކަކީ އިންސާނާ ކުޑައިރު ނުވަތަ ބޮޑުވަމުން އަންނައިރު، ހާމަވާ ކަންކަމެއް ނޫނެވެ.

އެވެނި މިވެނި ކަމަކަށް ކުޑައިރުއްސުރެ ޝައުގުވެރިކަން ހުރި ނަމަވެސް، މުޖުތަމައަށް ލޯ ހުޅުވުމުން، އޭނާ ޝައިގުވެރިވާ އެހެން ކަންކަމުގެ ސަބަބުން ކުޑައިރުއްސުރެ ޝައުގުވެރިކަން މި ހުރި ކަމެއް ދޫކޮށްލަން އެބަޖެހެއެވެ. އެހެނީ ދުނިޔެއަށް އަމިއްލަ ލޯ ހުޅުވުމަކީ ވަރަށްގިނަ މަންޒަރުތައް ފެންނާނޭ ކަމެކެވެ. އެހެން މީހެއްގެ ދުލުން އިވުމަށްވުރެ، އަމިއްލަ ލޮލުން ފެނުމުން ހިތާއި ސިކުނޑިއަށް އެކަމުން ކުރާ އަސަރު ބޮޑުވާނެއެވެ. ކުޑައިރު ހިތުލައިގެން ހުންނަ ފަދަ މީހަކަށް، ބޮޑުވީމާ ނުވެވޭ މައިގަނޑު އެއް ސަބަބަކީ މިއީއެވެ.

ކޮންމެ ކުއްޖަކީވެސް އެކުއްޖާ ޝައުގުވެރިވާ ރޮނގަކުން ކުރިއަށް ދިއުމުގެ ފުރުސަތު އޮތް ކުއްޖެކެވެ. އަދި ކޮންމެ މީހަކީ އޭނާގެ އަމިއްލަ ވިސްނުމާއި ހިޔާލުގެ މައްޗަށް ބިނާކޮށް، ޝައުގުވެރިކަމުގައި ކުލަ ޖައްސާ މީހަކަށް ވާން ވާނެއެވެ. އެހެން މީހުންގެ ނުފޫޒުން އެއްކިބާވެ، ޝައުގުވެރިމަށް ހުރަސްއަޅާ، ޝައުގުވެރިކަން ހުންނަ އެހެން ކަންކަމަށް ރިއާޔަތްކޮށް، ޝައުގުވެރިވާންވީ ކަންކަމަކީ ކޮބައިކަން އަމިއްލަ އަށް ހޯދާ ދެނެގަންނަން ވާނެއެވެ. ޝަައުގުގެ މައްޗަށް ނުފޫޒެއް ނުވަތަ ބާރެއް ހިނގާނަމަ އެއީ ހަގީގީ ޝައުގުވެރިކަމެއް ނޫނެވެ.