ދުނިޔޭގެ ގައުމުތަކުގައި ނުރައްކާތެރި ހާދިސާ ތަކާއި ކާރިސާތައް ހިނގައެވެ. މިފަދަ ކޮންމެ ހާދިސާ އަކީ ވެސް އެއިން ފިލާވަޅުތަކަކާއި އިބުރަތްތަކެއް އިންސާނުންނަށް ލިބޭނޭ ކަންކަމެވެ. މިއީ އަވަށްޓެރި ޕާކިސްތާނުގައި ހިނގައިދިޔަ ހާދިސާއެކެވެ. އަލިފާނުގެ ހާދިސާއެކެވެ.
އެގައުމުގެ އަވަށެއްގައި އުޅެމުން އަންނަ މުސްކުޅި އުމުރުގެ ދެމަފިރިންނެވެ. މާބޮޑު ތަނަވަސްކަމެއް ނެތްނަމަވެސް، ޒަމާނާއި ހާލަތާއި އެއްވަރަށް ތަހުޒީބު ވެވޭ ފެންވަރުގެ ދެމަފިރިންނެވެ. ދަރިން ދުނިޔޭގައި ތިބި ދެމަފިރިންނެވެ. ކައިރީގައި އެއްވެސް ދަރިއަކު ނެތްނަމަވެސް ހުރިހާ ދަރިންގެ ލޯބި އެ ދެމަފިރިންނަށް ލިބެއެވެ. ޗުއްޓީތަކުގައްޔާއި އަދި އެނޫންވެސް ވަގުތުތަކުގައި އެ ދެމަފިރިންގެ ދަރިން، އެ ދެމަފިރިންނާއި ބައްދަލުކުރަން އާދެއެވެ. އަވަށްޓެރިންނަށާއި އެކުވެރީންނަށް ހަދިޔާވެސް ހިފައިގެންނެވެ. ﷲ ގެ ވާގިފުޅާއި މިންވަރުފުޅުން، އެ ދެމަފިރިންނަކީ ދީނީ ކަންކަމަށް އަހުލުވެރި ދެމަފިރިންނެވެ. ހެޔޮލަފާ ދަރިންތަކެއް ބޮޑުކުރި ފަދައިން އަވަށްޓެރިންނަށްވެސް އެހާމެ ހެޔޮ ދެމަފިރިންނެވެ.
ކޮންމެ ނަމާދަކަށްފަހު މި ދެމަފިރިން އެކުގައި ޤުރުއާން ކިޔަވާނެއެވެ. ހޯމަ, ބުރާސްފަތީގައި ރޯދައަށް ހުންނާނެއެވެ. ވީވަރަކުން ޞަދަޤާތް ކޮށް އުޅޭނެއެވެ.
ހަމަ އެ އަވަށުގައި އުޅޭ ޒުވާނެކެވެ. ކުޑައިރު މައިންބަފައިންނާއި ޒުވާބުކޮށް، މައިންބަފައިންނާ ވަކިން ދިރިއުޅޭ ޒުވާނެކެވެ. މަސްތުވާތަކެތި ބޭނުން ކުރުމާއި އޭގެ ވިޔަފާރިތައް ކުރުމުގައި އެހާމެ ފުންނާބު އުސް "ޑީލަރެކެވެ". ނަމުން މުސްލިމެކެވެ. ނަމަވެސް ނަމާދެއް ނުކުރެއެވެ. ޤުރުއާނެއް ނުކިޔަވައެވެ. ރޯދަ ހިފުމެއް ޒަކާތްދިނުމެއް ނެތެވެ. އަޑުބާރުކޮށް ގޭތެރޭގައި ލަވަޖަހާ އުޅެއެވެ. ގޭތެރޭގެ ސާފުތާހިރުކަން ވަރަށްވެސް ކުޑައެވެ. މި ޒުވާނާ ދިރިއުޅެމުން ދަނީ އިސްވެ ދެންނެވުނު ދެމަފިރިންގެ ގޭގެ އެއް ފަރާތުން އެއް ގޭ ދޫކޮށްފައެވެ.
އެއްދުވަހެއްގެ މެންދުރު ވަގުތެވެ. ޒުވާނާ އުޅެމުން ދިޔަ ގެއާއި ދެމަފިރިން އުޅެމުން ދިޔަ ގޭގެ ދެމެދުގައި ހުރި ގޭގައި އަލިފާނުގެ ހާދިސާއެއް ހިނގިއެވެ. އަލިފާން ހިފީ ބަދިގޭގައި ކަމުން، ގޭސް ފުޅި ގޮވިއެވެ. އެ ގޭސްފުޅި ވިއްސައިގެން ގޮސް ޖެހުނީ ދެމަފިރިން އުޅެމުން އައި ގެއަށެވެ. ގޭސްފުޅިން ހުޅުގަނޑު ހުރީ ބޮޑުކޮށް ނުކުމެފައެވެ. ނަމަވެސް އެއްފަހަރު ގޮވާފައި ހުރި ގޭސްފުޅިއެއް ދެވަނަ ފަހަރަށްވެސް އެ ގޮވީ ދެމަފިރިންގެ ގެވަޅުތެރޭ އަނދައަނދާ އޮވެފައެވެ. އެއާއި އެކު އެ ގޭސްފުޅި އަނެއްކާވެސް ވިއްސައިގެން ދިޔައެވެ. އިހުނަށްވުރެ ދުރަށެވެ. އެއްކަލަ ޒުވާނާގެ ގެއަށެވެ. އެ ގޭގެ ގެވަޅުތެރޭގައި ހުރި ގަސްތަކެއްގެ ތެެރެއަށެވެ. އިސާހިތަކު އެ ގަސްތަކުގައި ހުޅުގަނޑު ރޯވިއެވެ. އަދި އެ ޒުވާނާ އުޅެމުން ދިޔަ ގޭގެ ތެރެއަށްވެސް ހުޅުގަނޑު ވަނެވެ. ބޮޑުބައެއްގައި ރޯވެ އެނދިއެވެ. ދިރިނޫޅެވޭވަރަށް ހަލާކުވިއެވެ. އެ ޒުވާނާ މުޅިން މާޔޫސްވިއެވެ. ގޮތް ހުސްވިއެވެ. އެއާއި އެކު ޒުވާނާއަށް އެހީތެރިކަން އެންމެ ފުރަތަމަ ދިން ބަޔަކީ އެއްކަލަ ދެމަފިރިންނެވެ.
މިއަދު އެ ޒުވާނާއަކީ ހަރުދަނާ ޒުވާނެކެވެ. މަސްތުވާ ތަކެއްޗަށް ނަފްރަތު ކުރާ ޒުވާނެކެވެ. އެ ޒުވާނާ ބުނާގޮތުން އޭނާގެ ހަޔާތް ބަދަލުވީ، އެ ދެމަފިރިންގެ އުޅުން ފެނިފައެވެ. އެ ޒުވާނާ ބުނާގޮތުގައި، އެ ޒުވާނާ ބޮޑުވަމުން އައި އިރު، އެފަދަ އެއްވެސް މަންޒަރެއް ނުފެނެއެވެ. ނަވެސް އެ ދެމަފިރިންގެ ފަރާތުން އެ ފެނުނު ދީނީ ޝުއޫރުތަކާއި ދީނަށް ޝައުގުވެރިވާ މިންވަރު ފެނި، އެ ޒުވާނާގެ ހިތަށް އީމާންތެރިކަން ވަނީއެވެ. އެ ޒުވާނާ އެންމެހާ މުސްލިމު ޒުވާނުންނަށް ދޭ ވަރަށް އަގުހުރި ނަސޭހަތެއް އެބައޮތެވެ. އެއީ އިސްލާމް ދީނާއި ދުރަށް ދެވޭނަމަ، ނުވަތަ ދީނީ ކަންކަމާއި މެދި ފަރުވާ ކުޑަކުރެވޭނަމަ، އެއީ ނުބައި ކަންކަމުގެ ބިންގާ އެތުރުމެވެ. އެފަދައިން އެތުރޭ ބިންގަލެއްގެ މަތީގައި އިމާރާތެއް ކޮށްފިނަމަ، އެ އިމާރާތެއް އިމާރާތްކުރި މީހަކަށް އެ އިމާރާތް ނެތިކޮށްލުމަކީ ވަރަށްވެސް އުނދަގޫކަމެކެވެ. އެފަދަ އިމާރާތްތައް ނެތިކޮށްލާ ނުބައި އުޅުންތަކުން އިސްލާހުގެ މަގަށް ރުޖޫއަ ވެވޭނީ މުޖުތަމައުގައި އުޅޭ، މި ދެމަފިރިން ފަދަ، މީސްމީހުންގެ އެހީއާއި މަދަދާއި އެކުގައެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން