ބިމުގައި ހެދޭ ގަސްގަހުގެ ތެރެއިން އޮނަކީ ވަރަށް ތަފާތު ގަހެއް. އަދި ކިއެއް އޮނަކީ ވިނައެއް. އޮނު ނިސްބަތްވަނީ "ޕޯކިޔާ" ނަމަކަަށް ކިޔާ ވިނައިގެ އާއިލާއަކަށް، އޮނުގެ އެތައް ސަތޭކަ ވައްތަރެއް ހުރޭ.

ދުނިޔޭގެ ބިމުގައިވާ އެންމެ އަވަހަށް ހެދޭ ގަހަކީ އޮނު. އެގޮތުން އޮނަކީ 24 ގަޑިއިރު ތެރޭގައި 46.7 އިންޗި ހެދުމުގެ ގާބިލުކަން ލިބިފައިވާ ގަހެއް. އަދި އޮނަކީ ގިނައިން އޮކްސިޖަންވެސް ބޭރު ކުރާ ގަހެއް. އެގޮތުން އެހެން ގަސްގަހުން އޮކްސިޖަން ބޭރުކުރާ މިންވަރަށް ވުރެ %35 އިތުރަށް އޮނުގަސްގަހުން އޮކްސިޖަން ބޭރުކުރޭ.

އޮނަކީ އޭގެ ލަކުޑި ވަރުގަދަ އެއްޗެއް. ދަރުގެ ގޮތުގައިވެސް އޮނު ބޭނުން ކުރޭ. އަދި ބައެއް ހިފާގެންގުޅޭ ސާމާނާއި ފަރުނީޗަރު ފަދަ ތަކެތި ހެދުމަށްވެސް އޮނަކީ ބޭނުން ކުރާ އެއްޗެއް. ދިވެހި ކާބަފައިންގެ މަސްވެރިކަމުގައި މުޅިންވެސް ބޭނުންކޮށް އުޅުނީ އޮނު ދޮށި. އޮނުގެ ޅަ ކުރި އަކީ ކެއުމަށްވެސް ބޭނުން ކުރެވިދާނޭ އެއްޗެއް.

އޮނަކީ އެހެން ގަސްގަހާއި ހިލާފަށް ތަފާތު އެކި މޫސުންތަކުގައިވެސް ހެދިބޮޑުވުމުގެ ގާބިލުކަން ލިބިފައިވާ ގަހެއް. ބުނެވޭ ގޮތުގައި 1945ގައި ހީރޯޝީމާ އަށް ދިން ނިއުކުލިއަރ ހަމަލާއަށްފަހު އެ ސަރަހައްދުން އެންމެ ފުރަތަމަ ކުރިލާ ހެދުނު ގަހަކީ އޮނު ގަހެއް. ބައެއް ސައިންސުވެރިން ބުނާގޮތުގައި މިއީ އޮނު، ހެދޭލެއް އަވަސްކަމުން ފާހަގަ ކުރެވުނު ކަމެއް.