ދިވެހިރާއްޖޭގައިވެސް މިހާރަކަށް އައިސް އާންމު އެއް ބައްޔަކީ ހެޕަޓައިޓިސް ބީ އެވެ. މިއީ އިންސާނާގެ ފުރަމެއަށް ޖެހޭ ބައްޔެކެވެ. ފުރަމޭގެ އިންފެކްޝަނެކެވެ. ހެޕަޓައިޓިސް ގެ އެކި ވައްތަރުތައް ހުރެއެވެ. އެއީ ހެޕަޓައިޓިސް އޭ، ބީ، ސީ އަދި ޑީ އެވެ. މި ލިޔުމުގައި މި ބަލާލަނީ ހެޕަޓައިޓިސް ބީ އާއި ގުޅޭ މައުލޫމާތު ކޮޅަކަށެވެ. ހެޕަޓައިޓިސް ބީ އަކީ ހެޕަޓައިޓިސް ބީ ވައިރަސް ނަމަކަށް ކިޔާ ވައިރަހަކުން ޖެހޭ ބައްޔެކެވެ. މި ބައްޔަށް ނަން ދީފައިމިވަނީ މި ވައިރަހުގެ ނަމުންނެވެ.
އެމެރިކާގެ ސެންޓަރފޯ ޑިޒީސް ކޮންޓްރޯލް އެންޑް ޕްރިވެންޝަނުން ހާމަ ކުރާގޮތުގައި އެގައުމުން ކޮންމެ އަހަރަކު ގާތްގަނޑަކަށް 3000 މީހުން މި ބަލީގައި މަރުވެއެވެ. އަދި އެމެރިކާގެ އާބާދީގެ ގާތްގަނޑަކަށް 1.4 މިލިއަން މީހުންނަށް މިބަލި ޖެހިފައި ހުންނާނެއެވެ. މިއީ އެމެރިކާގައި މި ބަލީގެ ހާލަތު ހުރިގޮތެވެ.
ހެޕަޓައިޓިސް ބީ އަކީ ކުއްލިއަކަށް އަދި ދިގުލާދެމިގެން ދާގޮތަށްވެސް ޖެހިދާނޭ ބައްޔެކެވެ. ކުއްލިގޮތުގައި ޖެހޭ ހެޕަޓައިޓިސް ބީ އަށް އެކިއުޓް ހެޕަޓައިޓިސް ބީ އޭ ކިޔައެވެ. މިއީ ކުއްލިގޮތަކަށް މި ބަލީގެ އަލާމާތްތައް ފެނުމުން ކިޔާ ނަމެކެވެ. ދިގުލާދެމިގެން ދާ ގޮތަށް ޖެހޭ ބައްޔަށް ކްރޮނިކް އޭ ކިޔައެވެ. މިއީ އާންމުގޮތެއްގައި މާބޮޑު އަލާމާތްތަކެއް ނުފެނި ހުރެ، ބޮޑުވަރުވާ ވުމެވެ. އާންމުގޮތެއްގައި ގިނަ މީހުން ތަހައްމަލު ކުރަމުން ދަނީ ފަހުން މި ދެންނެވި ދިގުލާދެމިގެންދާ ނުވަތަ ކްރޮނިކް ހެޕަޓައިޓިސް ބީ އެވެ.
މިއީ ވަރަށް ފަސޭހައިން ފެތުރިދާނޭ ބައްޔެކެވެ. މި ބަލި ޖެހިފައިވާ މީހާގެ ލޭ ނުވަތަ އެނޫންވެސް ހަށިގަނޑުގެ ދިޔަވަރުން ކުރެ ދިޔަވަރެއްގައި ބީހުމުން ނުވަތަ ޖެހުމުން ނުވަތަ ހުށަހެޅުމުން މި ބަލި ޖެހޭނެއެވެ. މައިގަނޑު އެއްޗަކީ ލެޔެވެ. އެހެނަސް ކުޅުގައިވެސް މި ވައިރަސް ހުންނަ ކަމަށް ވެއެވެ. ނަމަވެސް ކުޅުގައި ހުންނަ ވައިރަހަކީ އޭގެ ސަބަބުން އަނެކާއަށް މި ވައިރަސް ޖެހުމުގެ ފުރުސަތު ނެތް ވައިރަހެކެވެ. ވައިރަސް ހުންނަ މީހެއްގެ ލެއަށް ހުށަހެޅޭ މީހާ، ވައިރަސް ހުންނަ މީހާ ވިހާ ދަރިފުޅު، މަސްތުވާ ތަކެތި ބޭނުން ކުރުމުގައި އެއް ކައްޓެއް އެންމެނަށް ބޭނުން ކުރުން، ވައިރަސް ހުންނަ މީހަކާއި އެކު ޖިންސީ ގުޅުން ހިންގާ މީހުން، ވައިރަސް ހުންނަ މީހަކާއި ރޭޒަރު، ކަތުރުފަދަ ތޫނު އެއްޗެހި ހިއްސާކޮށް ހަދާ މީހުން، މިއީ ހައްތަހާވެސް މި ބަލި ޖެހިދާނޭ މީހުންނެވެ.
ހެޕަޓައިޓިސް ބީ ގެ އަލާމާތްތައް އެކި މީހުންނަށް ތަފާތުވެދާނެއެވެ. އަދި މި ވައިރަހުގެ އަސަރުކޮށް އަލާމާތް ނުފެނިވެސް ހުރެދާނެއެވެ. އެހެން ނަމަވެސް އާންމުގޮތެއްގައި މި ބަލީގައި ފެންނަ އަލާމާތްތަކުގެ ތެރޭގައި ދޭތެރެ ދޭތެރެއިން ހުން އައުމާއި، ގައިގެ އެކި ތަންތަން ދުޅަވެފައި ހުރުމާއި ކުޑަކަމުދާ ތަކެތީގެ ކުލަ ގަދަ ވުމާއި، ހުޅުހުޅާއި ގައިގެ އެކި ހިސާބުތަކުގައި ރިހުމާއި، ގައިގައި ވަރު ނެތުން ނުވަތަ ވަރުބަލިވުމާއި، ދަށްބަނޑަށް އުނދަގޫ ވެފައި ހުރުމާއި އަދި ހަންގަނޑާއި ލޮލުގެ ހުދުބައި ރީނދޫވެފައި ހުރުން ހިމެނެއެވެ. އަދި މިނޫނަސް އެކި އެކި އަލާމާތްތައް ފެނުމަކީ އެކަށީގެންވާ ކަމެކެވެ. މިފަދަ އަލާމާތެއް ފެންނަ ނަމަ ލަސްނުކޮށް ޑަކްޓަރެއްގެ އެހީތެރިކަން ހޯދަން ވާނެއެވެ.
މި ބައްޔަށް އެކަށީގެންވާ ފަރުވާ ނުދެވުމަކީ އޭގެ ސަބަބުން ނުރައްކާތެރި އެތައް ކަމެއް ހިނގާފާނޭ ކަމެކެވެ. އެގޮތުން ފުރަމޭ ގިރުމާއި، ފުރަމޭގެ މަސަައްކަތް ހުއްޓުމާއި، ފުރަމާގެ ކެންސަރުފަދަ ބަލިތައް ޖެހުމަށް މަގުފަހިވެއެވެ.
ހެޕަޓައިޓިސް ބީ އިން ރައްކާތެރިވުމަށް އޮތް ހައްލަކީ ވެކްސިން ޖެހުމެވެ. ދެން އޮތް ރައްކާތެރިކަމަކީ ބަލި ޖެހިފައިވާ މީހާ އާއި ކައިރިން ބައްދަލުވާ ހިނދު ސަލާމަތީ ގޮތުން ސަމާލުކަން ދިނުމެވެ. މި ބައްޔަށް ހާއްސަ ފަރުވާއެއް ނެތް ނަމަވެސް މިބަލީގެ އަލާމާތްތަކަށް ފަރުވާ ކުރެއެވެ. އެއާއި އެކު އެންޓިވައިރަލް ބޭހެއް ދެއެވެ.
މި ބަލައިލެވުނީ ހެޕަޓައިޓިސް ބީ އާއި ބެހޭ ކުރު ހުލާސާ މައުލޫމާތުކޮޅަކަށެވެ. މިއީ މި ބަލި ތަހައްމަލު ކުރާ ނުވަތަ މި ބަލި ޖެހުމުގެ ބިރު އޮތް ފަރާތްތަކަށާއި އަދި އެންމެނަށްވެސް ހިސާބަކަށް ފައިދާކުރަނިވި ލިޔުމެއް ކަމުގައި އުންމީދުކުރަމެވެ.