ކޮވިޑް ދުނިޔެއަށް ފެތުރި އޭގެ ބިރުވެރިކަން ނިހާޔަތަށް ގޮސްފައިވަނީ އެކަމުން އެތައް ފިލާވަޅުތަކަކާއި އިބްރަތްތަކެއް އިންސާނާއަށް ފޯރުކޮށްދީފައެވެ. މިއީވެސް އެފަދަ އިބުރަތްތެރި ހަގީގީ ހާދިސާއެކެވެ. ފަލަސްތީނުގެ ޒުވާނެއްގެ ކިބައިގައި އޭނާގެ މަންމައަށް ދެވިފައިވާ ގަދަރާއި، އޭނާގެ ހިތުގައި އެ މަންމަދެކެ ވާ ލޯބީގެ ނިހާޔަތު ހާމަވާ ހާދިސާއެކެވެ.

މިއީ އުމުރުން 30 އަހަރުގެ ޒުވާން ފިރިހެނެކެވެ. ނަމަކީ ޖިހާދް އަލް ސުވައިތީ އެވެ. ފަލަސްތީނުގެ ވެސްޓް ބޭންކުގެ ބައިތް އަވާ އަށް ނިސްބަތްވާ މި ޒުވާމާގެ އާއިލާއާއި އެކު ދިރިއުޅެމުން ދަނިކޮށް، މި ޒުވާނާގެ މަންމައަށް ކޮވިޑުގެ ބަލިމަޑުކަމުގެ އަސަރު ފޯރިއެވެ. އެއާއި އެކު އެ މަންމަގެ ހާލު ދެރަވެ، އިތުރު ފަރުވާއަށް ހެބްރަން ސްޓޭޓް ހޮސްޕިޓަލަށް ބަދަލު ކުރެވުނެވެ. އަވަސް ފަރުވާއަށްފަހު ލަސްތަކެއް ނުވެ އެ މަންމަ އެނދުމަތި ކުރީ އައިސީޔޫގައެވެ.

މިކަން ވެގެންދިޔައީ މި ޒުވާނާގެ ހިތް ކުދިކުދިވެ ދިރިއުޅުމުގެ އުންމީދު ނެތި ދިޔަ ކަމަކަށެވެ. މި ދުނިޔޭގައި ހުރި އޭނާ އެންމެ ލޯބިވާ މީހާއާއި ދުރުގައި ހުންނަން ޖެހުމެވެ. އަދި އެ މަންމެގެ ހާލު ދެރަވުމެވެ. ކޮވިޑުގެ ހާލަތު ގޯސްވުމާއިއެކު ހޮސްޕިޓަލަށް ބަލިމީހުން ނޫން މީހުން ނުވައްދައެވެ. އަދި ހާއްސަކޮށް އެނދުމަތި ކުރެވިފައިވާ ބަލި މީހުންގެ އެހީތެރިންވެސް ނުވައްދައެވެ. އެއާއި އެކު މި ޒުވާނާއަށް އޭނާގެ މަންމަ ލޮލަށް ނުފެނި ހުންނަން މަޖުބޫރުވިއެވެ. މާޔޫސްކަމާއި މޮޅިިވެރިކަން ނޫން ކަމެއް އެ ޒުވާނާގެ މޫނުމަތިން ފެންނާކަށް ނެތެވެ.

އެ މަންމަ އައިސީޔޫގައި އެނދުމަތިކޮށްފައި ދެވަނައަށްވީ ދުވަހު، ގިނަބަޔަކަށް ހައިރާންކަން ލިބުނީ، ހޮސްޕިޓަލުގެ ބާރުން، އެ ހޮސްޕިޓަލުގެ ކުޑަދޮރެއްގެ އަސްކަނި ދަށަށް (3ވަނަ ބުރިއަށް) އަރާ އިންނަ މި ޒުވާނާ ފެނިފައެވެ. އޭގެ ފަހުން ކޮންމެ ރެއަކު މި ޒުވާނާ 3ވަނަ ބުރީގެ އެ ކުޑަދޮރުގެ އަސަކަނި ދަށަށް އަރައެވެ. ކީއްވެ ހެއްޔެވެ؟ އެ ޒުވާނާގެ މަންމަ ދެކިލާށެވެ. އެ ކުޑަދޮރުދޮށުން އެ ޒުވާނާގެ މަންމަ ފެންނާތީއެވެ.

ދުވާލުގެ ވަގުތުގައި މަސައްކަތުގައި އުޅުމަށްފަހު، އަރާމު ކޮށްލާ ތަންމަށްޗަކަށް ވެފައިވަނީ އެ އަސްކަންޏެވެ. 3ވަނަ ބުރިއެވެ. ހަރުގަނޑެއްގެ އެހީއާއި ނުލާ، ފާރުގާ ބަނޑުއަޅަމުން އެ ޒުވާނާ ކޮންމެ ރެއަކު އެތަނަށް އަރައެވެ. އެ މަންމަގެ ހާލު ރަނގަޅުވާތީ އެ ޒުވާނާއަކަށް ނުފެނެއެވެ. އެހެނަސް އެ ޒުވާނާ ދުޢާ ކުރުމާއި އެކު އުންމީދުކަނޑައެއް ނުލައެވެ. ކޮންމެ ރެއަކުމެ އެތަނަށް އަރާ އެޒުވާނާގެ މަންމަ ދެކިލަން އިންނަނީ ވަގުތުކޮޅަކަށް ނޫނެވެ. އަނެއްދުވަހުގެ އިރު އަރަންދެނެވެ. އިރު އެރުމާއި އެކު ބައެއް ދުވަސް ދުވަހު ގެއަށް ގޮސް، ކުޑަ ވަގުތުކޮޅަކު ނިދާލައެވެ. އަނެއްބައި ދުވަސް ދުވަހު އެތަނުގައި އިނދެ ކޮންމެވެސް ވަރަކަށް ނިދާލައެވެ. ވިއްސާރަ ރޭތަކުގައިވެސް ހިޔާވެވޭނޭފަދަ އެއްޗެއް ހިފައިގެެންވެސް އެޒުވާނާ އެ ކުޑަދޮރު ދޮށަށް އަރައެވެ.

މި ހާލުގައި 23 ދުވަސް ވީފަހުން އެ މަންމަ މި ދުނިޔެއާއި ވަކިވިއެވެ. މި ފާއިތުވި ކޮންމެ ރެއަކީ އެ ޒުވާނާ އެތަނަށް އަރާ އިންނަ ރެއެކެވެ. ކޮން ބޭނުމަކު ހެއްޔެވެ؟ ބަލި ހާލުގައިވާ އެ ޒުވާނާގެ މަންމަ ދެކިލާށެވެ.

ޒުވާނުންނޭ! ވިސްނާށެވެ! މިފަދައިން އަމަލު ކުރާނީ އަހަރެމެންގެ ތެރެއިން ކާކު ހެއްޔެވެ؟ ދުނިޔޭގެ ލަދަށްވެސް މިފަދައިން އުޅޭކަށް ނުކެރޭނެެއެވެ! ހިތާމައިގެ މައްޗަށް ހިތާމައެވެ. ނަމަވެސް މި ހިނގައިދިޔަ ހާދިސާއިން ދަރިއަކާއި މަޔަކާއި ދޭތެރޭ ފަލަސްފެވައިވާ ލޯބި ވަރަށް ރަނގަޅަށްވެސް ހާމަވެއްޖެއެވެ. މިއީ އަހަރެމެން އަހަރެމެންގެ މަންމައިންނާއި ދޭތެރޭ އޮންނަ ލޯބި، ކުރިލާ ހެދެންޖެހޭނޭ މިންވަރެވެ. މިކަމުގައި އަދުގެ ޒުވާނުން ވިސްނާން ޖެހޭނެއެވެ. މައިންނަށް އެ އޮންނަ ލޯބި އިތުރުކޮށް ބަދަހިކުރަންވާނެއެވެ.