"މި އުޅެނީ ވަރަށް ބިޒީކޮށް!" މިއީ ކޮންމެ ދުވަހަކު ވަރަށް ގިނައިން އަޅުގަނޑުމެންނަށް އިވޭ ޖުމުލައެކެވެ. އެކުވެރިންނާއި އާއިލާ މީހުންގެ ފަރާތުންނެވެ. އެކުގައި މަސައްކަތްކުރާ މީހުންގެ ފަރާތުންނެވެ. ތެދެކެވެ. އަދުގެ ދުނިޔޭގައި އެންމެން ވެސް އުޅެނީ ވަރަށް "ބިޒީ"ކޮށެވެ. ވަރަށް އަވަދިނެތިއެވެ. އެންމެ ކުޑަ ކުއްޖާއިން ފެށިގެން ގޮސް އުމުރުން ދުވަސްވީ މީހާ ވެސް އަބަދު އުޅެނީ ވަގުތު ނެތިގެންނެވެ. އެއްދުވަހުން އަނެއް ދުވަހަށް ދިރިއުޅުމުގެ ކަންކަން ފަސޭހަވަމުންދާ ވަރަކަށް އެންމެން ވެސް އުޅެނީ އަވަދިނެތިއެވެ. މީގެ ތިރީހަކަށް އަހަރު ކުރިއަށް ވިސްނާލާށެވެ. އޭރު ގައިން ދާ އޮހޮރުވައިގެން، ދެ އަތުން ކުރި ގިނަ މަސައްކަތްތައް މިހާރު ކުރަނީ މެޝިންތަކުގެ އެހީގައެވެ. އެކަމަކު އޭރު ކުޑަކުދިން ގޮވައިގެން، އަވަށްޓެރިންނާ ވާހަކަދައްކާލަން ހޮޅުއަށިތަކުގައި ނުވަތަ ފިނި މައިޒާންތަކުގައި ތިބޭނެ ވަގުތު މާގިނައިން ލިބެއެވެ. އެކަކު އަނެކަކަށް އެހީވެދީ، ލުއިފަސޭހަކޮށްދޭނެ ވަގުތު ވެސް ލިބެ އެވެ. ބޮޑު ކަމެއް ކުރިޔަސް ހިލޭ ސާބަހަށް މަސައްކަތްކޮށްދޭނެ ކިތަންމެ ބަޔަކު ތިބެއެވެ. ނަމަވެސް މިހާރު އެހެން މީހަކަށް ކަމެއް ކޮށްދެވޭނެ މީހަކު ނޫޅެއެވެ. ގިނަ މީހުންނަކީ އަމިއްލަ ނަފުސަށްޓަކައި ވެސް ހުސް ވަގުތުކޮޅެއް ނުދެވޭ މީހުންނެވެ. ވަޒީފާ އަދާކުރާތީ އެވެ. ކުދިން ބަލަން ޖެހޭތީ އެވެ. ކުދިން ގޮވައިގެން ސްކޫލު ދޮށަށް ހިނގަންޖެހޭތީ އެވެ.

އަވަދިނެތިގެން އުޅެން ޖެހޭ ބައެއް ސަބަބުތައް:

ވަޒީފާ އަދާކުރުން.

ގިނަ މީހުން ދުވަހުގެ އެންމެ ގިނަ ވަގުތު ހޭދަކުރަނީ އާމްދަނީ ހޯދުމަށް މަސައްކަތްކުރުމުގައެވެ. އެންމެ މަދުން މަސައްކަތްކުރާ މީހުން ވެސް ދުވަހުގެ ހަ ގަޑިއިރު ނުވަތަ އަށް ގަޑިއިރު މަސައްކަތުގައި ހޭދަކުރެއެވެ. ސުވިޗަކަށް ފިއްތާލައިގެން ކަންކަން ކުރެވޭގޮތަށް ހުރުމުން ހަށްޓަށް ލުއިވާ މިންވަރަށް ނުވަތަ އެއަށްވުރެ އިތުރަށް ޖީބަށް ބަރުވެއެވެ. ދިރިއުޅުމުގެ ޚަރަދުތައް ބޮޑުވެ، ދެމަފިރިން ގިނަ ވަގުތު ވަޒީފާގައި އުޅެން ޖެހުމުން ކުރަން ހުންނަ އެހެން ކަންކަމަށް ވަގުތު ނުދެވި، ލަސްކުރެވޭ ގޮތް ދިމާވެއެވެ.

ތަޢުލީމީ ނިޒާމު ބައްޓަންކުރެވިފައިވާ ގޮތް.

މި ފަހަކަށް އައިސް ވަރަށް ޅައުމުރުގައި ކުދިންގެ ތަޢުލީމީ ހަޔާތް ފަށައެވެ. ދެ އަހަރު ނުވަތަ ދެ އަހަރާއި ހަމަހުގައި ދަރިފުޅު ސްކޫލަށް ގެންދަންފަށައެވެ. ޤުރުއާން ކްލާހަށް ގެންދެއެވެ. ކުޑަކުއްޖަކު ބެލެހެއްޓުމުގެ ބުރަ މަސްއޫލިއްޔަތުގެ އިތުރުން އެ އުމުރުގެ ކުއްޖަކު ވަކި ގަޑިއަކަށް، ވަކި ގޮތަކަށް ތައްޔާރުކޮށްގެން ތަނަކަށް ގެންގޮސް، ގެނައުމަށް ހޭދަވާ ވަގުތާއި، އެކަމުގެ ބުރަ އިހުސާސްކުރެވޭނީ އެކަން ތަޖުރިބާކޮށްފައި ހުރި މީހަކަށް އެކަންޏެވެ. ކޮންމެ ދުވަހަކު ވެސް މަދުވެގެން ދެތިން ގަޑިއިރު އެކަމަށް ހޭދަވާނެ އެވެ.

ކުދި އާއިލާތައް ވަކިން ދިރިއުޅުން.

ކައިވެނިކޮށްގެން ދެމަފިރިން ވަކި ގެއެއްގައި ނުވަތަ އެޕާޓްމެންޓެއްގައި ދިރިއުޅުމަކީ މިހާރަކަށް އައިސް ވަރަށް އާންމު ކަމެކެވެ. މައިންބަފައިންނާ ނުވަތަ އެއްބަނޑުތިމާގެ މީހުންނާ ވަކިން ދިރިއުޅޭނަމަ ގޭތެރޭގެ ހުރިހާ މަސައްކަތެއް ވެސް ކުރަންޖެހޭނީ ތިމާ އަމިއްލައަށެވެ. އެޕާޓްމެންޓެއް ކުއްޔަށް ހިފައިގެން އުޅޭނަމަ ދެމަފިރިން ވަޒީފާ އަދާކުރަން މަޖުބޫރުވެ އެވެ. ދަރިން ލިބުމުން އެކުދިން ބަލެހެއްޓުމުގައި ވެސް އެހީތެރިވެދޭނެ އިތުރު މީހަކު ނުހުރެއެވެ. މިކަންކަމުގެ ސަބަބުން އެއްވެސް ވަރަކަށް ހުސްވަގުތު ނުލިބި، އަބަދު މަސައްކަތުގައި ހޭދަކުރަންޖެހެއެވެ.

ޓެކްނޮލޮޖީ.

ޒަމާން ބަދަލުވެ، ޓެކްނޮލޮޖީއަކީ މިހާރު އެއާނުލާ އަޅުގަނޑުމެންނަށް ނޫޅެވޭ ވަރުގެ މުހިއްމު އެއްޗެކެވެ. ޓެކްނޮލޮޖީގެ ސަބަބުން ވެސް އަވަދިނެތިކަން އިތުރުވެ، ހުސްވަގުތު ލިބޭ މިންވަރު މަދުވެއެވެ. ކޮންމެ ދުވަހަކު ޓީވީ ބެލުމުގައި އަޅުގަނޑުމެން ކިތައް ގަޑިއިރު ހޭދަކުރަން ހެއްޔެވެ؟ ހިންދީ ޑްރާމާ ބަލާ މީހެއް ނަމަ މަދުވެގެން ދޭއް ނުވަތަ ތިން ޑްރާމާ ބަލާނެއެވެ. ކޮންމެ ޑްރާމާއަކަށް ތިރީސް މިނެޓް ހޭދަކުރާނަމަ ކޮންމެ ދުވަހެއްގެ ދޮޅުގަޑިއިރު ހޭދަވެގެން އެދަނީ ޓީވީ ބެލުމުގައެވެ. ހަމަ އެގޮތަށް ފޯނާ ކުޅުމުގައި ކިތައް ގަޑިއިރު ހޭދަވޭ ހެއްޔެވެ؟ މި ސުވާލުގެ ޖަވާބު އަންދާޒާއަކަށް ބުނަން ވެސް ގިނަ މީހުންނަކަށް ނޭނގޭނެއެވެ. ހީނުކުރާހާ ގިނަ ވަގުތު ފޯނުގެ ސްކްރީނަށް ބަލަހައްޓައިގެން އަޅުގަނޑުމެން ތިބެމެވެ.

އަބަދު އަވަދިނެތި އުޅުމަކީ ޞިއްޙީ ގޮތުން ވެސް ވަރަށް ނޭދެވޭ އަސަރުތަކެއް ކުރާކަމެކެވެ. ނަފުސާނީ މައްސަލަތަކާއި، ލޭ މައްޗަށް ދިޔުމާއި، ހަމަ ނިދި ނުލިބިގެން ދިމާވާ ޞިއްޙީ މައްސަލަތައް ވެސް ކުރިމަތިވާނެ ކަމެކެވެ. ކޮންމެ ދުވަހެއްގެ ވެސް "ބިޒީ" ދިރިއުޅުމުން ވަގުތު ހުސްކޮށްގެން ނިދި ހަމަކުރެވޭތޯ މަސައްކަތްކުރާށެވެ. ދުވަހުގެ މަސައްކަތްތަކާއި، ސްކްރީންތަކާ ދުރުވެ ހަތެއް ނުވަތަ އަށް ގަޑިއިރު ނިދާށެވެ. އޭރުން "ބިޒީ"ވުމުން ހަށިގަނޑަށް އިހުސާސް ކުރެވޭ ވަރުބަލިކަމާއި، ސްޓްރެސް ވަރަށް ބޮޑަށް ކުޑަކުރެވޭނެއެވެ. އަދި ހަމައެހެންމެ ދުވަހުގެ ސައުވީސް ގަޑިއިރުގެ ތެރެއިން މަދުވެގެން ފަނަރަ ވަރަކަށް މިނެޓު އަމިއްލަ ނަފުސަށްޓަކައި ހުސްކޮށްލާށެވެ. އެ ފަނަރަ މިނެޓަކީ ދަރިން ބަލާ ވަގުތެއް ނޫނެވެ. އަދި ޓީވީ ނުވަތަ ފޯނުގެ ސްކްރީނަށް ބަލަހައްޓައިގެން އިންނަ ވަގުތެއް ވެސް ނޫނެވެ. އެއީ އަމިއްލަ ނަފުސާ ދޭތެރޭ ފިކުރުކޮށްލާ، ސާފު ވައިކޮޅެއް ހަށިގަނޑަށް ހޯދައިދޭ ވަގުތުކޮޅަކަށް ހަދާށެވެ.

އަވަދިނެތިކަމުން ސަލާމަތްވެ، ނަފުސަށް ހަމަޖެހުން ބޭނުންވާ ނަމަ އެންމެ އިސްކަމެއް ދޭންވީ ދުވަހުގެ ކަންކަން ވަކި ގޮތަކަށް ރާވައިގެން، ތާވަލުކޮށްގެން ކުރިއަށް ގެންދިޔުމަށެވެ. ކޮންމެ ދުވަހަކު ވެސް އެ ދުވަހަކު ކުރަންޖެހޭ ކަންކަން ލިސްޓުކުރާށެވެ. އެކަންކަން ކުރާނެ ވަގުތުތައް ވެސް ކަނޑައަޅާށެވެ. ބޭކާރު ގޮތުގައި ވަގުތު ހޭދަ ނުކޮށް، ނޯޓުކުރެވިފައިވާ ގަޑިއަށް އެކަމެއް ކުރެވޭތޯ މަސައްކަތްކުރާށެވެ. ވަގުތު އޮތްނަމަ އެއްވެސް ކަމެއް ފަހުން ކުރަން ނުބަހައްޓާށެވެ. ފަސޭހަކުރުމުގެ ގޮތުން، ކުރިން ކޮށްފައި ބެހެއްޓޭނެ ކަހަލަ ކަންކަން ވަގުތު ލިބޭ ވަރަކުން ކޮށްފައި ބެހެއްޓުމުން ހާސްކަން ކުޑަވާނެ އެވެ. ފަހުން ކުރަންޖެހޭ މަސައްކަތް ވެސް މަދުވާނެ އެވެ.