އިންޑިއާގެ މަޝްހޫރު ލަވަކިޔުންތެރިޔާ ލަތާ މަންގޭޝްކަރު މަރުވެއްޖެއެވެ.

އުމުރުން 92 އަހަރުގެ ލަތާ މިއަދު ހެނދުނު މަރުވީ މުމްބާއީގެ ބްރީޗް ކޭންޑީ ހޮސްޕިޓަލުގައެވެ.

މި ދިޔަ މަހު ލަތާ ހޮސްޕިޓަލުގައި އެޑްމިޓް ކުރީ ކޮވިޑަށް ފައްސިވެގެންނެވެ. ރިޕޯޓުތައް ބުނާ ގޮތުން އޭނާ ހޮސްޕިޓަލުގައި އެޑްމިޓް ކުރީ ޙާލު ސީރިއަސް ވެގެންނެއް ނޫނެވެ. ނަމަވެސް ހޮސްޕިޓަލުގައި އެޑްމިޓް ކުރިފަހުން ކޮވިޑްގެ ޙާލަތުގެ ގޯސްވެ، ވެންޓިލޭޓަރުގައި ވެސް ފަރުވާ ދޭން ޖެހުނެވެ. އޭނާގެ ޙާލު ކުޑަކޮށް ރަނގަޅުވުމުން ވެންޓިލޭޓަރު ނައްޓާލާފައި ވަނިކޮށް، އިތުރަށް ޙާލު ގޯސްވީ އިއްޔެގެ ވަގުތެއްގައެވެ.

"ކުއީން އޮފް މެލޮޑީ"ގެ ނަމުން މަޝްހޫރުވެފައިވާ ލަތާއަކީ އިންޑިޔާގެ އެކި ބަސްބަހުން 30،000 އަށް ވުރެ ގިނަ ލަވަ ކިޔާފައިވާ ފަންނާނެކެވެ. އަދި ހަމައެހެންމެ ވަރަށް ޝަރަފުވެރި އެވޯޑްތަކެއް ވެސް ހޯދާފައިވާ ފަރާތެކެވެ. އެގޮތުން ޤައުމީ ފިލްމު އެވޯޑު 3 ފަހަރު އަދި  ބެންގަލް ފިލްމު ޖާނަލިސްޓްސް އެސޯސިއޭޝަން އެވޯޑު 15 ފަހަރު ލިބިފައިވެއެވެ. މީގެ އިތުރުން ފިލްމު ފެއާ އެވޯޑާއި، ލައިފްޓައިމް އެޗީވްމެންޓް އެވޯޑާއި ފިލްމު ފެއާ ސްޕެޝަލް އެވޯޑް ވެސް ލިބިފައިވެއެވެ. އަދި 2001 ވަނަ އަހަރު ވަނީ  އިންޑިއާގެ އާންމު ރައްޔިތުންނަށް ދޭ އެންމެ މަތީ ޝަރަފު "ބާރަތު ރަތުނާ"ގެ ލަގަބު ވެސް ލިބިފައެވެ.

އުމުރުން 13 އަހަރުގައި ލަވަކިޔަން ފެށި ލަތާ، އޭނާގެ އެންމެ ފުރަތަމަ ލަވަ ރެކޯޑް ކޮށްފައި ވަނީ 1942 ވަނަ އަހަރެވެ. އޭނާ މެދުކެނޑުމެއް ނެތި، އިންޑިއާގެ ފިލްމްތަކަށް ލަވަކިޔައިދޭތާ 70 އަހަރު ވަނީ ވެފައެވެ.

ދުވަހަކުވެސް ކައިވެންޏެއް ކޮށްފައި ނުވާ ލަތާއަކީ މަޝްހޫރު ލަވަކިޔުންތެރިޔާ އާޝާ ބޯޝްލޭގެ ދައްތައެވެ.