މި މަހުގެ 5 ވަނަ ދުވަހު ސްރީލަންކާގެ ދެހިވަލަ އިން ގެއްލިގެން ހޯދަމުން ދަނިކޮށް މަރުވެފައި އޮއްވާ ފެނުނު، ދ. މީދޫ މާކޯނި އަފްހަމް ނަސީރުގެ އާއިލާގެ ބައެއް މެމްބަރުން ދާދި ދެންމެއަކު ސްރީލަންކާއަށް ގޮސްފިއެވެ. އާއިލާގެ ފަރާތުން މިރޭ ލަންކާއަށް ދިޔައީ، އަފްހަމްގެ މަންމަ، ބައްޕަ އަދި ދޮންބައްޕަގެ އިތުރުން އަފްހަމްގެ ބޭބެއެވެ.

އާއިލާއިން ލަންކާއަށް ދިއުމާއިއެކު އޮޓޮޕްސީގެ ތައްޔާރީތައް ވާން އޮތީ ހަމަ ޖައްސާފައެވެ. އެގޮތުން އާއިލާ އާއި އެމްބަސީގެ ފަރާތުން މާދަމާގެ 9 ޖަހާ އިރު ކަޅުބޯވިލަ ހޮސްޕިޓަލްގައި ބައްދަލުކޮށް އެކަން ކުރިއަށް ދާނެ ގޮތުގެ މަޝްވަރާ ކުރާނެއެވެ.  އަފްހަމްގެ މަރަކީ އަމިއްލައަށް ވި މަރެއްތޯ ނުވަތަ މީހަކު ނުވަތަ ބަޔަކު ގަސްތުގައި އަފްހަމް މަރާލިކަމަށް ދެކެވޭ ވާހަކައަށް އޮޓޮޕްސީއަށް ފަހު ޖަވާބެއް ލިބޭނެއެވެ.

އަފްހަމްގެ މަރާއި ގުޅިގެން މިހާތަނަށް 3 މީހަކާ ސުވާލުކޮށް ބަޔާންނަގާފައިވާ އިރު މި މައްސަލައާއި ގުޅިގެން އަދި އެއްވެސް މީހަކު ހައްޔަރު ކުރި ކަމެއް ރަސްމީ އިދާރާއަކުން ހާމަ ކޮށްފައެެއް ނުވެއެވެ.

އާއިލާގެ ފަރާތުން ވާހަކަ ދައްކަމުން އަފްހަމްގެ ބޭބެ އަފްރަހު ބުނީ، ދިވެހި ފުލުހުންނާއި ހައިކަމިޝަންގެ އެއްބާރުލުން ވަރަށް ފުރިހަމަ އަށް ލިބޭ ކަމަށާ، އަފްހަމްގެ މަރުގެ ހަގީގަތް ހޯދުމުގައި ހުރިހާ ފަރާތްތަކުން ވެސް ކުރަމުން އަންނަ މަސައްކަތާއި މެދު ހިތްހަމަ ޖެހޭ ކަމަށެވެ.