ދުނިޔޭގައި އަބަދުވެސް ތަފާތު އެކި އެކި ވާހަކަތައް ދެކެވޭނެއެވެ. އެއިން އިންސާނުން އިބުރަތްތައް ލިބިގަންނަން ޖެހޭ ކިތަންމެ ވާހަކައެކެވެ. މިއީވެސް އެފަދަ ވާހަކައެވެ. މި ވާހައަކީވެސް މިއިން ވަރަށް މުހިންމު އިބުރަތެއް ލިއްބައިދޭ ވާހަކައެކެވެ. ވަރަށް ބޭނުންތެރި ފިލާވަޅެއް ކިޔައިދޭ ހާދިސާއެކެވެ.

ޔުނިވާސިޓީއެއްގައި ކިޔަވައިދޭ މުދައްރިސެކެވެ. އެތައް ކުދިންނެއްގެ ލޯތްބާއި އިހްތިރާމު ލިބިފައިވާ މުދައްރިސެކެވެ. އެއްދުވަހަކު ސަތޭކައެއްހާ ކުދިން އުޅެމުންދާ ކުލާހަކަށް އެ މުދައްރިސް ދިޔައެވެ. ފިލާވަޅު ނަގައިދޭން ފެށުމުގެ ކުރިން، ކުޑަ ކުޑަ ކުޅިވަރެއް ކުޅެލަން ބޭނުންވާ ކަމަށް މުދައްރިސް ބުންޏެވެ. އެއާއި އެކު ދުރިވަރުން އެކަމަށް ވަރަށް ޝައުގުވެރިއެވެ.

މުދައްރިސް ކުލާހަށް ދިޔައީ ކޮންމެ ކުއްޖަކަށް ފުއްޕާހަމެއް ހިފައިގެންނެވެ. ކޮންމެ ކުއްޖަކަށް ފުއްޕާހަމެއް ދިނުމަށްފަހު އެއިން ކޮންމެ ކުއްޖަކު، އެ ކުއްޖަކަށް ލިބުނު ހަމެއްގައި އެ ކުއްޖެއްގެ ނަން ލިޔުމަށް އެދުނެވެ. އެއާއި އެކު ކޮންމެ ކުއްޖަކު އެކުއްޖެއްގެ ނަން އެ ހަންތަކުގައި ލިޔުނެވެ. އެއީ އެއް ކުލައެއްގެ ހަންތަކެކެވެ.

ދެން އެ މުދައްރިސް އެކުދިން ކުރެ އެދުނީ ޖެހިގެން ހުރި ހުސް ކުލާސްރޫމުގެ ތެރެއަށް އެ ފުއްޕާހަންތައް ދޫކޮށްލާށެވެ. އެއާއިއެކު ކޮންމެ ކުއްޖެއްވެސް އެކުއްޖެއްގެ ފުއްޕާހަން، އެ ކުލާސްރޫމަށް ދޫކޮށްލިއެވެ. ދެން އެ މުދައްރިސް އެ ކުޅިވަރު ފެށެނީ ކަމަށް ބުންޏެވެ. ކުދިންތަށް ނިކަން ތައްޔާރުގައި ތިއްބެވެ.

މުދައްރިސް އެދުނީ ފަސް މިނެޓު ތެރޭގައި އެ ކުލާސް ރޫމަށް ދޫކޮށްލި ފުއްޕާހަންތަކުން ކުރެ ކޮންމެ ކުއްޖަކުވެސް އެކުއްޖެއްގެ ނަން ލިޔެފައިވާ ފުއްޕާހަން ހޯދާށެވެ. އެއާއި އެކު ކުދިންތައް އެ ކުލާސްރޫމުގެ ތެރެއަށް ވަދެގަތެވެ. ފަސްމިނެޓު ވުނުން މުދައްރިސް ރަނގަބީލެއް ޖަހާ އެކުދިން އެ ކުލާސްރޫމުން ނެރުނެވެ. އޭރު ދެތިން ކުއްޖެއްގެ އަތުގައި ނޫނީ ފުއްޕާހަމެއް ނެތެވެ. ދެން މުދައްރިސް އަނެއްކާ އެކުދިން އެ ކުލާސްރޫމަށް ވަނުމަށް އެދުނެވެ. ނަމަވެސް މިފަހަރު ދިން ވަގުތު މަދުވެފައި އިތުރު ޝަރުތެއް ކުރިއެވެ.

ކޮންމެ ކުއްޖަކުވެސް އެކުޖަކާ އެންމެ ކައިރިން ނުވަތަ އެކުއްޖަކަށް ނެގޭ ފުރަތަމަ ފުއްޕާހަން ނެގުމަށްފަހު، އެ ފުއްޕާހަމެއް ނިސްބަތްވާ ކުއްޖަކަށް ދޭން، މުދައްރިސް ޝަރުތު ކުރިއެވެ. އެއާއި އެކު ކުދިންތައް އެ ކުލާސްރޫމަށް ވަދެގަތެވެ. މުދައްރިސް ދިނީ ތިން މިނެޓު ނަމަވެސް، ދެ މިނެޓު ތެރޭގައި ކޮންމެ ކުއްޖަކުވެސް އެކުއްޖެއްގެ ފުއްޕާހަން ލިބިގެން މުދައްރިސްގެ ގާތަށް އަތުވެއްޖެއެވެ.

އެއާއި އެކު މުދައްރިސް ތެދުވެ އެކުދިންނަށް ދިނީ އިބުރަތުން ފުރިގެންވާ ނަސޭހަތެކެވެ. އެއިން ކޮންމެ ފުއްޕާހަމެއްގެ މިސާލަކީ އުވާފެރިކަމުގެ މިސާލެވެ. އެންމެންނަށް އުފާވެރިކަން ލިބިގެން އެ ދިޔައީ ކޮންމެ ކުއްޖަކުވެސް އަނެކުންގެ އުފާވެރިކަމަށް ވިސްނައިގެން އުޅުނީތީއެވެ. އެމީހަކު އަމިއްލައަށް އެމީހެއްގެ އުފާވެރިކަން ހޯދަން އުޅުމުން ފެނުނީ، އެ އުފާވެރިކަން ނުލިބި ދިޔަތަނެވެ.

އާދޭހެވެ! އަބަދުވެސް އަނެކުންގެ އިހުސާސްތަކަށް ވިސްނާށެވެ. އަނެކާ ހީކޮށްފާނޭ އެއްޗަކާއި ހީވެދާނޭ އެއްޗަކާއި މެދު ވިސްނާށެވެ. އަނެކުންގެ އުފާވެރިކަމާއި މިނިވަން ކަމަށް ވިސްނާށެވެ. އަނެކާ އުފަލުގައި އުޅުމުގެ ފުރުސަތު ތިބާ ދީފި ނަމަ، ތިބާ އުފަލުގައި އުޅުމުގެ ފުރުސަތު ތިބާއަށް ދޭނޭ މީހުންވެސް ތިބޭނެއެވެ. ފުއްޕާހަމުގެ މިސާލުންވެސް ލިބޭ އިބުރަތަކީ ހަމަ މިއީއެވެ.