ކަމެއް، މާ ގިނަވެ ނުވަތަ އާންމުވުމުން އެކަމެއްގެ ހާއްސަކަން ފިލާދެއެވެ. ދުނިޔެއަށް ކުރިމަތިވެފައިވާ ކޮވިޑުގެ އާލަމީ ވަބާވެސް މިފަދައިން މިއަދު ވެ ނިމިއްޖެއެވެ. ހާއްސަކަމެއް ދީގެން އުޅުނު ކޮވިޑަށް، އާންމު ރައްޔިތުން ދެމުން ގެންދިޔަ ހާއްސަކަން މިހާރު ކުޑަވެއްޖެއެވެ. ކަންބޮޑުވުމާއި ނުތަނަވަސްކަން ކުޑަވެއްޖެއެވެ. ސަލާމަތީ ފިޔަވަޅުތަކާއި ކަންކަމަށް މަލާމާތް ކުރެވިއްޖެއެވެ. ކަން މިހެން ދިމައިވަނީ އެ ބައްޔާއި މެދު ހާއްސަކޮށް ދެކެވިގެން އުޅޭނަމަ ދިރިއުޅުމުގެ ތަރުތީބާއި ހަމަ ގެއްލޭތީއެވެ. ކޮވިޑަކީ މިހާރު އާދައިގެ ރޯގާއެކޭ ނުވަތަ "ފޭކު" އެއްޗެކޭ ބުނާތީވެސް ވަރަށް ގިނައިން އަޑު އިވެއެވެ. އާދޭހެވެ! ކޮވިޑަކީ ނުރައްކާތެރި ރޯގާއެއް ހެއްޔެވެ؟ ނުވަތަ އާދައިގެ ރޯގާއެއް ހެއްޔެވެ؟

އިންސާނާގެ ހަށިގަނޑު އުފެދި، ހަށިގަނޑުގެ އެކި އެކި ނިޒާމުތައް ތަރުތީބުވެ ހިނގާ ގޮތުން ކޮންމެ އިންސާނަކީ ތަފާތު މީހެކެވެ. ހަށިގަނޑުގެ ގުނަންތަކާއި އެ ގުންނަންތަކުގެ މަސައްކަތުގެ ހަލުއިކަމާއި އެ މަސައްކަތުގެ ބާރުގަދަ ކަމުގައިވެސް ކޮންމެ އިންސާނަކީ ތަފާތު މީހެކެވެ. އިންސާނާގެ ހަށިގަނޑު ހުށަހެޅޭ ކަންކަމާއި ތަކެތީގެ ގޮތުން އެ ކަންކަމާއި ތަކެއްޗަށް އިންސާނާގެ ހަށިގަނޑު "ޖަވާބުދާރީ" ވުމުގައިވެސް ކޮންމެ އިންސާނަކީ ތަފާތު މީހެކެވެ. އެވެނި މިވެނި ކަމަކުން ތިމާއަށް އެވެނި މިވެނި ކަމެއް ވުމަކީ ނުވަތަ ނުވުމަކީ، އަނެކާއަށް އެގޮތަށް ކަންކަން ދިމައިވާނޭ ނުވަތަ ނުވާނޭ ކަމެއް ނޫނެވެ.

ކޮވިޑުބަލީގައި މި ދުނިޔެ ދޫކުރި މީހުންގެ އަދަދަކީ މަދި އަދަދެއް ނޫނެވެ. މިއީ މި ބަލީގެ ސަބަބުން އެމީހުންގެ ފުރާނައަށް ނުރައްކާވެ، ހާލު ދެރަވި މީހުންނެވެ. މިފަދައިން ހާލު ދެރަވި ކިތަންމެ ބައެއްވަނީ މަރުގެ ތުންފަތްމަތިން ސަލާމަތްވެސް ވެފައެވެ. އެއްބަޔަކަށް ކޮވިޑުގައި މިހާވަރު ވެގެން ދިޔައިރު އަނެއްބަޔަކަށް ކޮވިޑު ޖެހި ކެއްސާވެސްނުލާ، ނޭފަތުގައި ރޯގާގެ އަސަރެއްނެތި، ގައިގައި ހުމުގެ ހޫނެއް ނެތިވެސް މިބަލިން ރަނގަޅުވެފައި އެބަހުއްޓެވެ. އާދޭހެވެ! ކޮވިޑު ޖެހި ކަމެއް ނުވާ މީހާ، އަނެކާއަށް ކަމެއް ނުވާނޭ ހީކޮށްގެން ނުވާނެއެވެ. އަދި ކޮވިޑު ޖެހި ބޮޑުވަރުވި މީހާ އަނެކާއަށް އެވަރު ވާނޭކަމަށްވެސް ހީކޮށްގެން ނުވާނެއެވެ. ކަން މިހެން ހުރިނަމަވެސް ކޮވިޑުޖެހި ބޮޑުވަރު ނުވާ ގިނަ މީހުން ދެކޭ ގޮތުގައި މިއީ އާދައިގެ ރޯގާއެކެވެ. އަދި މިއީ "ފޭކެކެވެ". ނަމަވެސް އެހެން ބުނެވިދާނެ ހެއްޔެވެ. މި ބަލީގައި ކިތައް މީހުންގެ ފުރާނަ ގޮސްފައިވޭހެއްޔެވެ! އާދޭހެވެ! މި ދުނިޔެ ދޫކުރި މީހެއްގެ ތަޖުރިބާ، ދިރިތިބީންނަށް، އޭނާއަކަށް ހިއްސާއެއް ނުކުރެވޭނެއެވެ.

ކޮވިޑުބަލީގައި ބޮޑުވަރުވެ، ރަނގަޅުވެފައިވާ މީހުން އެމީހުންގެ ތަޖުރިބާތައް ދަނީ އެކި ގޮތްގޮތުން އާންމުންނާއި ހިއްސާކުރަމުންނެވެ. ނަމަވެސް ހިތާމައަކީ ކޮވިޑުގައި ވަރުބޮޑުނުވާ މީހުން މި ވާހަކަތައް ގަބޫލު ނުކުރާކަމެވެ. ކޮވިޑުޖެހި އެބަލިން ރަނގަޅުވެފައިވާ މީހުންގެ ބައެއް ޝުއޫރުތައް މި ލިޔުމުގައި ހިއްސާކޮށްލާނަމެވެ.

އުމުރުން 35 އަހަރުގެ މީހަކު ބުނާގޮތުގައި، ކޮވިޑު ޖެހުމުން މާ ބޮޑުވަރެއް ނުވެއެވެ. ނަމަވެސް ރަނގަޅުވުމަށް ފަހު އެހެން އުނދަގޫތަކެއް ކުރިމަތިވެއެވެ. މިއީ ކުރިން އޭނާއަށް ނުވާ އުނދަގޫތަކެކެވެ. އޭނާ ބުނާގޮތުގައި މޭ އެންދުމުގެ އުނދަގޫ އޭނާއަށް މިހާރު ވަރަށް ބޮޑުކަމަށެވެ. ހަވާދުގެ އެއްވެސް ބާވަތެއް ކާން ނުކެރޭ ވާހަކަ އޭނާ ބުނެއެވެ.

މިއީ 27 އަހަރުގެ ޒުވާނެއްގެ ތަޖުރިބާއެވެ. ކޮވިޑުޖެހި އެ ބަލީގައި ވަރަށް ވަރުކޮށްލިއެވެ. ކޮވިޑު ޖެހި ރަނގަޅުވުމަށް ފަހު މިހާރު ފަސްވަރަކަށް މަސް ވެއްޖެއެވެ. އޭނާއަކީ މީގެ ކުރިން ވަރަށް ފުނަށް ފީނާ ހަދާ ޒުވާނެކެވެ. އެ ޒުވާނާ ބުނާގޮތުން ކުރިން އޭނާ ފީނާ އުޅުނު ފުންމިނަށް، ގާތްގަނޑަކަށްވެސް މިހާރު ނުދެވެއެވެ. ނޭވާކުރުވަނީއެވެ.

އުމުރުން 51 އަހުރުވީ އިރު މިއީ ވަރަށް ގަދަޔަށް ދުފާ އުޅުނު މީހެކެވެ. ދަތްތައް ވަރުގަދަ މީހެކެވެ. ދަތުން ފޯއްކިބަ ހަފާލާ އުޅުނެވެ. ނަމަވެސް ކޮވިޑުގެ ފަހުގައި އޭނާ އަށް ދުފާލާކަށް ނުކެރެއެވެ. ދަތްތަކުގައި ބާރު ނުހުންނަަކަމަށް އޭނާ ބުނެއެވެ. ނަމަވެސް އޭނާ އަކީ ކޮވިޑުޖެހި އެއްވެސް އަލާމާތެއް ފެނުނު މީހެއް ނޫނެވެ.

65 އަހަރުގެން ދިޔައީ ގޭތެރޭގެ ހުރިހާކަމެއް ކުރަމުންނެވެ. ހުރިހާކަމެއްހެން ބަލަހައްޓަމުންނެވެ. ނަވެސް ކޮވިޑުޖެހި ރަނގަޅުވިފަހުން، ވަރަށްބޮޑަށް ވަރުބަލިވާކަމަށް ބުނެއެވެ. އަދި ކޮވިޑުބަލީގައިވެސް އޭނާއަށް ވަރަށް ބޮޑުވަރުވިއެވެ. ގޭތެރޭގައި ކުރިން އުޅުނުގޮތަށް، ގެވެށި އުޅުމެއް މިހާރަކު ނޫޅެވެއެވެ. ކަމެއް ނުވަތަ މަސައްކަތެއް ކޮށްލާއިރަށް ވަރުބަލިވެ ނޭވާގައި އަޑު ހިފަނީއެވެ.

ކޮވިޑު ޖެހުނުއިރު އުމުރުން 31 އަހަރެވެ. އެއްވެސް އަލާމަތެއް ނެތެވެ. ގަފަފަދައެވެ. ނަތީޖާ ކުށެއްކަމަށްދެކި އަލުން ނަތީޖާ ތަކުރާރުވެސް ކުރިއެވެ. މިފަހަރުވެސް ފައްސިވީއެވެ. އޭނާއާއި ގާތުން ބައްދަލުވި މީހުންވެސް ފައްސިވިއެވެ. ކޮވިޑުގައި އެއްވެސް އަލާމާތެއް ނެތްތާ ރަނގަޅުވިފަހުންވެސް އެއްވެސް އުނދަގުލެއް ނެތެވެ.

މިއީ މިފަދަ ބައެއް މީހުންގެ ވާހަކަތަކާއި އިހުސާސްތަކެވެ. މިފަދަ ކިތަންމެ ވާހަކަތަކެއް އަދިވެސް ހުންނާނެއެވެ. ކޮންމެ މީހަކަށް ކުރެވުނީ ތަފާތު ތަޖުރިބާ ތަކެކެވެ. އެއީ ކޮންމެ މީހެއްގެ ހަށިގަނޑުގައި ތަފާތުތަކެއް ހުންނާތީއެވެ. އަދި އެމީހަކަށް އެ ވައިރަހުން ކުރި އަސަރުގެވެސް ތަފާތުތަކެއް ހުންނާތީއެވެ.

އެހެންކަމުން ކޮވިޑަކީ އެއްބައި މީހުންނަށް އާދައިގެ ރޯގާ އަކަށް ވެދާނެއެވެ. އަނެއްބަޔަކަށް އެއީ މަރުގެ އެތިފަހަރަކަށް ވެދާނެއެވެ. އެހެންކަމުން ކޮވިޑަކީ އޭގައި ނުރައްކަލާ ބިރުވެރިކަންވެސް އެކުލެވިގެންވާ ބައްޔެކެވެ. އެހެންކަމުން ކޮވިޑުޖެހި ބޮޑުވަރު ނުވާ ނުވަތަ ކަމެއް ދިމައިނުވާ މީހާ، މިއީ އާދައިގެ ރޯގާއެއް ކަމަށް ދެކިގެން، މިކަމަށް އޮތް ހާއްސަކަން ގެއްލުވާލުމަކީ މުޅިއަކުން ރަގަޅުކަމެއް ނޫނެވެ. އަދި ގޯހެއްވެސް މެއެވެ. ހުރިހާއެންމެންގެ އިހުސާސްތަކަށް އިހްތިރާމްކުރަންވާނެއެވެ. އެންމެން އެއްގޮތެއް ނުވާނެއެވެ.