މާތް ﷲ އިންސާނުން ހައްދަވާފައި މި ވަނީ ޖޯޑު ހަމަކޮށެވެ. މާނައަކީ ދެ ޖިންސު ލައްވާފައެވެ. އަންހެނުންނާއި ފިރިހެނުންނެވެ. އިންސާނުން ލޯބީގެ ގޮތުން ގުޅެނީ އެ އިންސާނެއްގެ އިދިކޮޅު ޖިންސާއެވެ. މިއީ އިންސާނީ ޠަބީއަތެވެ. މިއީ ޤުދުރަތީ ގާނޫނެވެ. ނަމަވެސް އިންސާނުންނަކީ އޭނާގެ ވެރި ރަސްކަލާންގެއަށް ހަރާންކޯރުވުން ބޮޑު މީހެކެވެ. އެހެންކަމުން އަބަދުވެސް އިންސާނުންގެ ތެރޭގައި ބޮޑެތި ފާފަތަކާއި މުޑުދާރު ފާހިޝް އަމަލުތައް ކުރާ މީހުން އޭނެއެވެ.

މިއަދު މުޅި ދުނިޔޭގައި ފުޅާ ދާއިރާއެއްގައި ފަތުރަމުންދާ އެލް.ޖީ.ބީ.ޓީ ގެ ވިސްނުމާއި ފިކުރަކީ އެއްޖިންސުން ގުޅުން ހިނގުމުގެ މުޑުދާރު އަމަލު ފަތުރާ ވިސްނުމެކެވެ. ފިރިހެނުންނަށް ފިރިހެނުން ދެކެ ލޯބިވުމާއި ކައިވެނި ކުރުމާއި، އަންހެނުންނަށް އަންހެނުންދެކެ ލޯބިވުމާއި ކައިވެނި ކުރުމަކީ އިންސާނީ ހައްގެއްކަމުގައި މިއަދު ދުނިޔޭގެ ބައެއް ގައުމުތަކުން ދަނީ ބުނަމުންނެވެ. ނިމިދިޔަ "ވެލަންޓައިންސް ޑޭ" ގެ ނަމުން ނަން ދީފައިވާ "ލޯބިވެރިންގެ" ދުވަހޭ ކިޔާ ދުވަހުގައި ދުނިޔޭގެ އެކުވެރި ދައުލަތްތަކުގެ ޖަމުއިއްޔާ، އ.ދ އިންވެސް ވަނީ މި އެލް.ޖީ.ބީ.ޓީ ގެ ވިސްނުމާ ހިޔާލު ފަތުރާ އެކަން އެގޮތަށް އޮންނަން ވާނޭ ކަމަށް ބުނެ މީސްމީޑިޔާގައި ޕޯސްޓްތަކެއް ޖަހާފައެވެ.

އެއްޖިންސުން ގުޅުން ހިންގުމުގައި ހައްދުފަހަނަ އަޅާފައިވާ ލޫތުގެފާނުގެ ގައުމުގެ މީހުންގެ ވާހައަކީ ދުނިޔޭގެ ތާރީޚުގައި ގަދައަށް ދެކެވޭ ވާހަކައެކެވެ. މަޝްހޫރު ޕޮންޕޭގެ ވާހަކައެވެ. ލޫތުގެފާނުގެ ގައުމުގެ މީހުން އެއްޖިންސުން ގުޅުން ހިންގަމުން ދަނިކޮށް، އެބައިމީހުންގެ މައްޗަށް މާތް ﷲ ގަދަ ކޯފާއެއް ފޮނުއްވަވާ އެބައިމީހުން ނެތިކޮށްލެއްވިއެވެ. އާކިއޮލޮޖިސްޓުން ހޯދާފައިވާ ބައެއް ހޯދުން ތަކުގައި ލޫތުގެފާނުގެ ގައުމުގެ މީހުން، އެ މުޑުދާރު ފާހިޝް އަމަލުތަށް ކުރުމުގެ ތެރޭގައި މަރުވެފައިވާކަން ދޭހަކޮށްދޭ އެމީހުންގެ ކަށިތައް ވަނީފެނިފައެވެ. މިއީ މާތް ﷲ ހަރާމްކުރެއްވި މިފަދަ މުޑުދާރު އަމަލުތައް ކުރަމުން ގެންދިއުމުގެ ސަބަބުން އެކަލާނގެ ކޯފާ އެބައިމީހުންގެ މައްޗަށް ފޮނުއްވުނު ގޮތެވެ.

އެލް.ޖީ.ބީ.ޓީ ނުވަތަ އެއްޖިންސުން ގުޅުން ހިންގުމުގެ ފަލްސަފާ މި ކުޑަކުޑަ ދިވެހިރާއްޖޭގައިވެސް މިވަނީ ފެތުރިފައެވެ. މިކަމަށް އިޝާރާތްކުރައްވާ ވަރުގަދަ، އަސަރުން ފުރިގެންވާ، އިންޒާރީ ނަސޭހަތުގެ ޙުތުބާއެއްވެސް މުޅި ރާއްޖޭގައި ވަނީ އިއްވާފައެވެ. އާދޭހެވެ! މާތް ﷲ ކަމެއް ހަރާމް ކުރައްވާނީ ހަމަ ގައިމުވެސް އެކަމެއްގައި ބޮޑެތި އެތައް ގެއްލުންތަކެއް އިންސާނިއްޔަތަށް އޮތުމުންކަން ޔަގީނެވެ. މި ލިޔުމުގައި މި ބަލާލަނީ އެމެރިކާގެ ސަބްސްޓެންސް އެބިއުސް އެންޑް މެންޓަލް ހެލްތް ސާވިސަސް އެޑްމިނިސްޓްރޭޝަން (ސަމްޝާ) އިން 2012ވަނަ އަހަރު ނެރެ ޝާއިއުކޮށްފައިވާ "ހެލްތްއިޝޫސް ފޯ އެލް.ޖީ.ބީ.ޓީ ޕޮޕިއުލޭޝަން އެންޑް އިންފޮމޭޝަން" ނަމަކަށް ކިޔާ ފޮތުގައި ފާހަގަކޮށްފައިވާ އެއްޖިންސުން ގުޅުން ހިންގުމުގައި ހުރި ސިއްހީ މައްސަލަތަކަށެވެ. މިފޮތުގައި ވަނީ އެއްޖިންސުން ގުޅުން ހިންގާ އަންހެނުންނަށާއި ފިރިހެނުންނަށް ދިމައިވާ ސިއްހީ ބޮޑެތި މައްސަލަތަކެއްގެ ވާހަކަ ފާހަގަ ކޮށްފައެވެ. މިފަދަ މައުލޫމާތެއް ހިއްސާކުރުމުގެ ބޭނުމަކީ އިސްލާމްދީނުގައި ހަރާމްކުރައްވާފައިވާ މިފަދަ މުޑުދާރު އަމަލެއް ހަރާމްކުރެއްވި ހިކުމަތް، ސިއްހީ ނަޒަރަކުން ހާމަކޮށްދިނުމެވެ. އަދި މިއީ އުޅުމެއްގެ ގޮތުން ނަޖިސް އަދި މުޑުދާރު އުޅުމެއްކަން ބަޔާންކޮށްދިނުމެވެ.

އެ ފޮތުގައި ލިޔެފައިވާގޮތުން އެއްޖިންސުން ގުޅުން ހިންގާ ނުވަތަ އެއްޖިންސުން ކައިވެނިކޮށްގެން އުޅޭ އަންހެނުންނަށް އުރަމަތީގެ ކެންސަރުޖެހުމުގެ ފުރުސަތު ބޮޑުތަނުން އިތުރުވެއެވެ. އެހެނީ އަންހެނާ މާބަނޑުވުމުން އަންހެނާގެ ހަށިގަނޑުގައި ހިނގާ ހޯމޯންތަކާއި އުރަމަތީގެ ގުނަންތަކަށް އަންނަ ބަދަލުތަކުން އެ އަންހެނާ މަހުރޫމުވާތީއެވެ. އެއްޖިންސުން ގުޅުން ހިންގާނަމަ ދަރިމައިވުމެއް، ދަރިފަސްކޮޅު ދެމިދިއުމެއް، ނަސްހު ހިފެހެއްޓުމެއް ނުވާނެއެވެ. މިފަދައިން އަންހެނާގެ ހަށިގަނޑުގައި ތަރުތީބުވެފައިވާ އެ ފުރިހަމަ ނިޒާމުގެ މަސައްކަތް ނުކުރާނަމަ އެއީ އުރަމަތީގެ ކެންސަރަށް މަގުފަހިވާ ވަރަށްބޮޑު މަގެކެވެ.

މީގެ އިތުރުން އަންހެނުންގެ ކުރިމަތިފަރާތަށް ހާއްސަކޮށް ޖެހޭ ބަލިތަކެއް ހުރެއެވެ. މިފަދައިން ގުޅުން ހިންގާފަރާތްތަކަށް މިފަދަ ބަލިތައް ޖެހުން ވަރަށްވެސް އާންމެވެ. މީގެ ތެރޭގައި ގާޑްނެއްލާ ވެޖިނޯސިސް، ޖެނިޓަލް ހާޕްސް ފަދަ ބަލިތައް ހިމެނެއެވެ. އަދި "ފަރުޖުމޮހޮރޭ" ކިޔާ ބައްޔަކީވެސް އެއްޖިންސުން ގުޅުންހިންގާ އަންހެނުންނަށް ޖެހޭ އާންމު ބައްޔެކެވެ.

މިފަދަ ފިރިހެނުންނަށްވެސް ހަމަ އެފަދައެވެ. ސިފިލިސް ނަމަކަށް ކިޔާ ފިރިހެނާގެ ކުރިމަތިފަރާތަށް ޖެހޭ ބައްޔަކީ އެއްޖިންސުން ގުޅުން ހިންގާ ފިރިހެނުންގެތެރޭގައި އާންމު ބައްޔެކެވެ. އަދި ޕްރޮސްޓޭޓް ކެންސަރާއި އުރަވަޅީގެ ކެންސަރުގެ އިތުރުން ބޮޑުގޮހޮރުގެ ކެންސަރަކީވެސް މިފަދަ މުޑުދާރު އަމަލު ހިންގާ ފިރިހެނުންނަށް ޖެހިދާނޭ ބަލިތަކެކެވެ.

މި ފޮތުގައި އިތުރަށް ލިޔެފައިވަނީ އެއްޖިންސުން ގުޅުންހިންގާ ނުވަތަ ކައިވެނިކޮށްގެން އުޅޭ މީހުންނަކީ ނަފްސާނީގޮތުން ހަމަޖެހޭ ދިރިއުޅުމެއް އުޅޭ ބައެއް ނޫނެވެ. އެބައިމީހުންގެ މުޅި ހަޔާތުގައި ވާނީ މާޔޫސްކަމަކާއި މޮޅިވެރިކަމެކެވެ. އެއާއި އެކު އެބައިމީހުންނީ މަސްތުވާތަކެއްޗާއި ރަލާއި އަދި ސިނގިރޭޓުފަދަ ތަކެއްޗަށް ދެވިހިފާފައިތިބޭ ބައެކެވެ. މިއާއި އެކު މި މީހުންގެ ތެރޭގައި މަސްތުގެހާލުގައި ހަޔާތުގެ ގިނަ ވަގުތުތައް ހޭދަކުރާ މީހުން ގިނައެވެ. އެޗް.އައި.ވީ ނުވަތަ އެއިޑްސް އާއި އެޗް.ޕީ.ވީ އަދި ހެޕަޓައިޓިސް ބީ ފަދަ ނުރައްކާތެރި ބަލިތަކަކީ މިބައިމީހުންގެ ތެރޭގައި އާންމު ބަލިތަކެކެވެ.

ނަފްސާނީގޮތުން ހިތްހަމަ ޖެހުމެއް އުފަލެއް ނުލިބޭ މުޑުދާރު މި ދިރިއުޅުމުގެ ސަބަބުން މިފަދަ އެތައްބަޔަކު އަމިއްލައަށް މަރުވެފައިވާ ކަމަށްވެސް އެ ފޮތުގައިވެއެވެ. މިފަދައިން މަރުވެފައިވާ ގިނަ މީހުންނަކީ އޯވަޑޯޒްވެގެން މަރުވެފައިވާ މީހުންނެވެ.

ހިތްހަމަޖެހުމާ އުފާ، އަދި އަރާމާ ލައްޒަތަކީ ދެ ޖިންސުގެ ދެމެދުގައި މާތް ﷲ ލައްވާފައިވާ ވަރަށްފުރިހަމަ އަދި އެހާމެ އަޖައިބުކުރަނިވި ނިއުމަތެކެވެ. ނަމަވެސް ދުނިޔޭގެ ހަމައާއި ކާއިނާތުގެ ގަވާއިދާ ހިލާފަށް އެއްޖިންސުގެ ދެމީހުންގެ ދެމެދުން މިދެންނެވި ހިތްހަމަޖެހުމާއި ލައްޒަތު ހޯދުމަށް ބަޔަކު ކުރާ މުޑުދާރު އަލަމުތަކުގެ ނަތީޖާއަކަށްވެގެންދަނީ އަމާންކަމެއް ސުލްހައެއް ނެތް މުޖުތަމައުތައް އުފެދުމެވެ. ދަރިފަސްކޮޅު ދެމިއޮތުމުގެ އުސޫލު ކިލަނބުވުމެވެ. މުޑުދާރު ނަޖިސްކަންބޮޑު، އޭގެ ވޭނާއި އަނިޔާ ބޮޑު ބަލިތައް ފެތުރުމެވެ. މާތް ﷲ ގެ ކޯފާ އެބައެއްގެ މައްޗަށް އާންމުވެގެން ދިއުމެވެ.

މާތް ﷲ މި ނުބައި މުޑުދާރު އަމަލު ހަރާމް ކުރައްވާފައި ވުމުގައިވާ ސިއްހީ ހިކުމަތްތަކަކީ މިއީއެވެ. އަދި މިނޫނަސް ކިތަންމެ ހިކުމަތެއްވާނެއެވެ. އެމެރިކާގެ ސަމްޝާ އިން ޝާއިއުކުރި މި ފޮތުގައިވެސް މިފަދަ ނުރައްކާތެރިބަލިތައް އެބައިމީހުންގެ ތެރޭގައި އާންމުކަމާއި އެ ބަލިތަކުގެ ބިރު ބޮޑުކަން އެ ވަނީ ފާހަގަ ކޮށްފައެވެ. އެއީ އެކަންކަމަށް ތާއީދުކޮށް ވާހަކަ ދައްކާ ގައުމުތަކުގެ އިދާރާތަކުން ލިޔެ ޝާއިއުކުރާ ތަކެއްޗެވެ. އިސްލާމްދީނުގައި އެ ނުބައި މުޑުދާރު، ނަޖިސް ފާފަ ވަނީ އެތައް އެތައް އަހަރުތަކެއް ކުރިން ހަރާމްކުރައްވާފައެވެ. މިފަދަ މުޑުދާރު ގުޅުންތަކާއި އަމަލުތައް ފަތުރާ ފަރާތްތަކަށް އެ މަސައްކަތް ނާކާމިޔާބުކުރައްވާށިއެވެ!