އިންސާނުންނާއި ދުނިޔޭގެ މާހައުލާއި ވަނީ ވަރަށްބޮޑަށް ގުޅިފައެވެ. ޤުދުރަތީ ހިތްގައިމު ކަމާއި ކާއިނާތުގެ ދިރުންތަކަކީ އެތަކެތިން އިންސާނާ އެތައް ބައިވަރު ނިޢުމަތެއް ލިބިގަންނަ ތަކެއްޗެވެ. އެގޮތުން، ޤުދުރަތީ ހިތްގައިމުކަމުގެ ތެރެއިން، ކޮށާ ސާފުކޮށް އިންސާނުން މިވަނީ އެތަންތަނުގައި ގެދޮރު ބިނާކޮށްފައެވެ. ނަމަވެސް އިންސާނާގެ ހިތުން ޤުދުރަތްތެރިކަން ފުހެލެވޭނެ ހާލަތެއް ނާދެއެވެ. އެއާއި އެކު ގޭތެރޭގައި އޮޅު ޖަނަވާރު ގެންގުޅުމަކީ ގިނަ ބައެއްގެ އާދައެކެވެ. މިގޮތުން ގޭގައި މަސްފެންގަނޑު ހަދައިގެންނާއި ކުދި ބިއްލޫރި ޓޭންކު ތަކުގައި މަސް ގެންގުޅުމަކީ ވަރަށްވެސް އާންމު ކަމެކެވެ.
މި ލިޔުމުގައި މި ބަލާލަނީ "ހުފްޕޯސްޓް" ބްލޮގުގައި 2012ވަނަ އަހަރު ޑރ. ކަރެން ބެކަރ ލިޔެފައިވާ "މަސް، ހިތްހަމަޖެހުމަކަށް ފުދޭ ސަބަބުތައް" މި ލިޔުމުގައި ހިމަނާފައިވާ ބައެއް ސަބަބުތަކަށެވެ. މަސްމަހާމެއްސަކީ އޭގައި ހިމޭންކަމާއި އަމާންކަމުގެ އަސަރު ލައްވާފައިވާ ކާއިނާތުގެ ފުރިހަމަ މަހުލޫގެކެވެ. މަސްމަހާމެހި ފެނުގެ ތެރޭގައި ހެލިފެލިވެ ފިރުކި އުޅޭ ހިތްގައިމު މަންޒަކީ އޭގައި އިންސާނުންގެ ހިތްތަކަށް އުފާވެރިކަމާއި ހަމަޖެހުން ވެރިކުރަނިވި ހިމޭން މަންޒަރެކެވެ. ގޭތެރޭގައި ގެންގުޅޭ އެހެން ބައެއް އޮޅު ޖަނަވާރުތަކާއި ހިލާފަށް މަހަކީ އޭގެ ސަބަބުން އިތުރު އުނދަގުލެއް ތުރާލެއް އަދި ކިއެއް އަޑެއްވެސް އެކުލެވިގެން ނުވާ އެއްޗެކެވެ.
މަސްމަހާމެހީގެ ސަބަބުން އަވަށްޓެރިންނަށާއި ގޭގައި އުޅޭ އެހެންމީހުންނަށް އެއްވެސް އުނދަގުލެއް ނުވާނެއެވެ. ހިތްހަމަޖެހުމުގައި އެހެން މީހުންގެ އިހުސާސްތައް ދެނެގެން އުޅުމަކީ މުހިންމު ކަމެކެވެ. އެހެންކަމުން ހިތްހަމަޖެހުމަށް ގޭތެރޭގައި ގެންގުޅެން މަސްމަހާމެއްސަކީ ހަމަ "އެއްވަނައެވެ". ހަމައެއާއި އެކު މަސްމަހާމެއްސަކީ ވަރަށް ސާފުތާހިރު އެއްޗެކެވެ. އެހެނީ އެ އެސްޗެހީގެ ސަބަބުން އެ ނުބައި ވަސް ދުވުމެއް އަދި އިތުރު ތަނެއް ހަޑިވުމެއް ނުވާނެއެވެ. އަދި އޭގައި ނިޔަފަތި ކެނޑުމެއް، ފުނާ އެޅުވުމެއް ފެންވެރުވުމެއް ނުވާނެއެވެ.
އެކިވައްތަރުގެ މަސްމަހާމެހި އުޅޭހެން އެކި ކުލަކުލައިގެ ތަފާތު ރީތި މަސްމަހާމެހިވެސް އުޅެއެވެ. މިފަދަ ތަފާތު ކުލަތަކާއި ސިފަތަކުގެ މަސްމަހާމެއްސަކީ ވަރަށްވެސް ހިތްގައިމު ތަކެއްޗެވެ. މިއީ ހިތްހަމަޖެހުމާއި އުފާވެރިކަމަށް މަސްމަހާމެހި ކަމުދާ ސަބަބެކެވެ. ބައެއް މަސްމަހަކީ އޭގެ ވެރިމީހާއާއި އެކު ސަކަރާތްޖަހާ ކުޅެ ހަދާ އެއްޗެއްސެވެ. އަދި އެސޮރުމެންގެ ވެރިމީހާ އަށް އޮޅު އެއްޗެއްސެވެ. އެހެންކަމުން މިއީ އެތަކެތި ގެންގުޅޭ ފަރާތްތަކަށް ވަރަށްބޮޑު އުފާވެރިކަމެއް ލިބިގެންދާނޭ ކަމެކެވެ. މަސް ގެންގުޅޭ ފެންގަނޑު ނުވަތަ ޓޭންކުގެ ސާފުތާހިރުކަން ދަމަހައްޓައިފިނަމަ މަސްމަހާމެހި ގެންގުޅުމަކީ އުފާވެރިކަމަކަަށް ވާނެއެވެ.
މީގެއިތުރުން މަސްމަހާމެހި ގެންގުޅުމަކީ މީހާގެ ކަންނެތްކަން ފިލާ މީހާ ހަރުދަނާވެ، ކަމަށް ކަމޭހިތާ، ގަވައިދުން ކަންކުރުމުގެ ރީތި އާދަވެސް ދަސްވާނޭ ކަމެކެވެ. އަދި މަސްބޭނުމަކީވެސް އެކަމުގެ ސަބަބުން އެހާމެ ބޮޑު ހިތްހަމަޖެހުމެއް ލިބޭކަމެކެވެ. ހާއްސަކޮށް މަސް އުޅޭތަން ފެނި، އެ މަސްތައް ހަރަކާތްތެރިވާތަން ފެނި އެތަނަކުން މަސްބޭނުމަކީ އިންސާނާގެ ހިތާއި ސިކުނޑިއަށް ފިނިކަން ގެނެސްދޭނޭކަމެކެވެ.
ގޭތެރޭގައި މަސްގެންގުޅުމަކީ ދިވެހިންގެ ތެރޭގައިވެސް ވަރަށް އާންމު ކަމެކެވެ. މަސްފެންގަނޑުތަކާއި ޓޭންކުތަކުގައި މަސްގެންގުޅެއެވެ. އާލާކޮށް ގިނަވެސް ކުރެއެވެ. މިއީ ހަމަގައިމުވެސް ހިތްހަކަށް ހިތްހަމަޖެހުން ގެނެސްދޭނޭ ކަމެކެވެ. ކޮންމެ މީހަކީވެސް ކޮންމެވެސް ގޮތަކުން މިފަދަ ޤުދުރަތީ ދިރުމަކާއި ގާތްގުޅުމެއް ބާއްވާ މީހަކަަށް ވުން ވަރަށްވެސް މުހިންމެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން