އިންސާނާގެ ހަށިގަނޑުގައި އިންފެކްޝަނަކީ ވަރަށް އާންމުކޮށް ހަށިގަނޑުގެ އެކި ހިސާބުތަކުގައި އުފެދިދާނޭ އެއްޗެކެވެ. ނަމަވެސް ސިކުނޑި ނުވަތަ ސިކުނޑިއާއި ގުޅިފައިވާ ހިސާބެއްގައި ނުވަތަ ތަނެއްގައި އިންފެކްޝަން އުފެދުމަކީ އޭގެ ސަބަބުން ނުރައްކާތެރި އެތައް ކަމެއް ހިނގާފާނޭ ކަމެކެވެ. އެގޮތުން މި ލިޔުމުގައި މި ބަލާލަނީ މެނިންޖައިޓިސް ނަމަކަށް ކިޔާ އިންފެކްޝަނަކާއި ބެހޭގޮތުންނެވެ.
މެނިންޖައިޓިސް އަކީ ސިކުނޑި އާއި މައިބަދަ ވަށައިގެން ހުންނަ މެނިންޖަސް އޭ ކިޔާ ފަށަލައިގެ އިންފެކްޝަނެވެ. މި ފަށަލައިގެ ތެރޭގައި ދިޔަވަރެއް ހުރެއެވެ. އާންމުގޮތެއްގައި މެނިންޖައިޓިސްގައި އުފެދޭ އިންފެކްޝަން އުފެދެނީ މި ދިޔަވަރުގައެވެ. މި ފަށަލައަކީ ސިކުނޑިއާއި މައިބަދައިގެ ރައްކާތެރިކަމަށް ލައްވާފައިވާ ފަށަލައެކެވެ. މެނިންޖައިޓިސް އަކީ އޭގެސަބަބުން ކުއްލި އުނދަގޫތަކަކާއި ވޭނީ އިހުސާސްތަކެއް އިންސާނާއަށް ކުރިމަތި ކުރުވާނޭ އިންފެކްޝަނެކެވެ.
މި ބަލީގެ އަލާމާތްތަކުގެ ތެރޭގައި ކުއްލިއަކަށް ގަދަ ހުމެއް އައުމާއި ކަނދުރާ "ގަނޑު" ވުމާއި، ގަދައަށް ބޮލުގައި ރިހުން ހިމެނެއެވެ. އަދި ބޯ އެނބުރުމާއި އެކު މޭނުބައިކޮށް ގިނައިން ހޮޑުލެވޭނެއެވެ. ވާނުވާ ނޭނގުމާއި ސަމާލުކަން ގެއްލުން ހިމެނެއެވެ. އަލިގަދަ ތަންތަނަށް ބަލަން އުނދަގޫވުމާއި ކޮޅަށް ނުހުރެވުމާއި ހިނގަން އުނދަގޫވުމާއި މީހާގެ ބެލެންސް ނުހިފެހެއްޓުން ހިމެނެއެވެ. މީގެ އިތުރުން ބައެއް މީހުން ފިޓުޖެހޭގޮތްވެސް ވެއެވެ. ނުނިދުމާ އަރާމު ނުކުރެވުމާއި ކާހިތް ނުވުމަކީވެސް މި ބަލީގެ އަލާމާތްތަކެވެ.
މި ބައްޔަކީ އަވަސް ފަރުވާ ބޭނުންވާ ނުރައްކާތެރި ބައްޔެކެވެ. ފަރުވާ ނުކުރެވި ލަސްކުރެވޭނަމަ ސިކުނޑިއަށް ގެއްލުން ލިބި، މީހާ ޕެރަލައިޒްވެ (ވާގިގޮސް) ސިކުނޑި މަރުވެ، ހިތުގެ ހިނގުމަށް ބުރޫއަރާ އިންސާނާ މަރާ ކުރިމަތިލާން ޖެހުމަކީވެސް ވެދާނޭ ހިތާމަހުރިކަމެކެވެ.
ހަށިގަނޑުގެ ތެރޭގައި ހުންނަ ޖަރާސީމު ތަކަކީ މި ބަލި ޖައްސުވާ އެންމެ އާންމު ބާވަތެވެ. ހަށިގަނޑުގެ ތެރެއަށް އެ ޖަރާސީމެއް ވަދެ، ލޭގެ ތެރޭގައި ދައުރުވަމުން ދާ ވަގުތުތަކުގައި، މެނިންޖަސް އަށް އެ ޖަރާސީމެއް ފޯރުމަކީ މި ބަލި ޖެހޭ ސަބަބެވެ. ލޭގެ ތެރެއިން ނޫން ގޮތަކަށްވެސް ޖަރާސީމު އަށަގަތުމަކީ ވެދާނޭ ކަމެކެވެ. އޭގެ ތެރޭގައި ބޮލަށް ލިބޭ އަނިޔާތަކާއި ސައިނަސް އަދި ކަންފަތުގެ އިންފެކްޝަންތައް ހިމެނެއެވެ. މި ބަލި ޖައްސުވާ ޖަރާސީމު ތަކުގެ ތެރޭގައި ނިއުމޯކޮކަސް، މެނިންޖޯކޮސް، ހީމޯފިލަސް އަދި ލިސްޓެރިއާ ޖަރާސީމު ހިމެނެއެވެ. ބައެއް ހާލަތުގައި ވައިރަހުން ނުވަތަ ފަންގަސްގެ ސަބަބުންވެސް މި ބަލި ޖެހިދާނެއެވެ.
މެނިންޖައިޓިސް ޖެހުމުގެ ފުރުސަތު ބޮޑު މީހުންގެ ތެރޭގައި ކުޑައިރު ފުރިހަމަކުރަން ޖެހޭ ވެކްސިންތައް ފުރިހަމަ ނުކުރާ މީހުން ހިމެނެއެވެ. އަދި އެއްތަނެއްގައި ގިނަބަޔަކު، ގައިގޯޅިކޮށް ދިގުމުއްދަތެއްގައި އުޅެން ޖެހުމަކީވެސް މި ބަލި ޖެހުމަށް މަގުފަހިވާ ކަމެކެވެ. އަދި މާބަނޑު އަންހެނުންނާއި ދިފާއީ ނިޒާމު ބަލިކަށި މީހުން ހިމެނެއެވެ. އަދި ބޮލުގެ ޓިއުމަރުފަދަ ބަލިތަކަށް ފަރުވާކޮށްފައިވާ މީހުންނާއި ބޮލުގެ ބޮޑެތި އަނިޔާތަކަށް ފަރުވާކޮށްފައިވާ މީހުން ހިމެނެއެވެ. މެނިންޖައިޓިސް ޖެހޭ މީހުންގެ ތެރެއިން ދުނަފަތުގެ އިސްތިއުމާލު ކުރާ މީހުންނާއި ބަނގުރަލާއި މަސްތުވާތަކެތި ބޭނުން ކުރާމީހުންނަށް ލިބޭ ގެއްލުންތައް ބޮޑުތަނުން އިތުރުވެއެވެ.
މި ބަލީގެ ސަބަބުން ދިމައިވާ ބޮޑެތި ގެއްލުން ތަކުގެ ތެރޭގައި އަޑުއިވުމުގެ ނިޒާމު ހަލާކުވުން ނުވަތަ އެ ހިއްސުގެ ނާރު ހަލާކުވުން ހިމެނެއެވެ. ހަނދާން ބަލިވުމާއި ދަސްކުރަން އުނދަގޫވުން ހިމެނެއެވެ. ސިކުނޑީގެ އަނިޔާތައް ލިބުމާއި އެކު ޝޮކް ޖެހުންހިމެނެއެވެ. އަދި ގުރުދާގެ މައްސަލަތަކާއި ފުރަމޭގެ މައްސަލަތައް ދިމައިވެދާނެއެވެ. ބައެއް މީހުން ފިޓު ޖެހޭ މީހުންގެ ގޮތުގައި ވާއިރު އަނެއްބައި މީހުން ޕެރަލައިޒްވެއެވެ. އަދި އަނެއްބައި މީހުން މި ދުނިޔެއާއި ވަކިވާންވެސް ޖެހިދެއެވެ. އެހެންކަމުން މިއީ ނުރައްކާތެރި ބިރުބޮޑު އިންފެކްޝަނެކެވެ.
މެނިންޖައިޓިސް އިން ރައްކާތެރިވުމަށް ކުރެވެން ހުރި އެންމެ މުހިންމު ކަމަކީ ވެކްސިން ފުރިހަމަ ކުރުމެވެ. އެއާއި އެކު ބަލާ ރައްކާވެ، ސާފުތާހިރުކަން އިސްކުރުން މުހިންމެވެ. އަދި ދުޅަހެޔޮ ހަށިގަނޑެއް ބިނާކުރުމަކީވެސް މުހިންމެ އަދި އެހާމެ ބޭނުންތެރި ކަމެކެވެ. މި ބަލި ޖެހުމުގެ ފުރުސަތު ބޮޑު މީހުންނާއި މި ބަލީގެ އަލާމާތްތަކަށް ފަރުވާވެ، ލަސްނުކޮށް ސިއްހީ އެހީތެރިކަން ހޯދުން މުހިންމެވެ. އަހަރެމެން އެންމެންނީ މި ބައްޔަށް އަހުލުވެރި ބަޔަކަށް ވަމާތޯއެވެ!