ވިލިމާލޭގައި ދިރިއުޅޭ ނުކުޅެދުންތެރިކަން ހުންނަ ކުދިންގެ ބެލެނިވެރިން އަޒީނާ ޢަބްދުﷲ (އަޒީނަތު) ދަންނާނީ އެމީހުންގެ މަދަދުގާރެއްގެ ގޮތުގައެވެ. އެފަދަ ކުދިންގެ ހައްޤުގައި ކުރަން ޖެހުނު ކޮންމެ ކަމަކަށް އަތުކުރިއޮޅާލައިގެން އަޒީނަތު ނުކުމެ ހުންނަނީ އެންމެ ކުރީގައެވެ. އެ ކުދިންގެ ބެލެނިވެރިން އުފުލާ ތަކުލީފުތަކާއި، ކުދިންނަށް ކޮންމެހެން ކޮށްދޭން ޖެހޭ ކަންކަން ކުރުމަށް ހުރި ދަތިތައް އަޒީނަތަށް ވަނީ ތަޖުރިބާކުރެވިފައެވެ. އަޒީނަތުގެ 4 ކުދިން ތިބި އިރު އޭގެ ތެރެއިން ދެ ނުކުޅެދުންތެރިކަން ހުރި ކުދިންނެވެ. އެތަނުން އެއް ކުއްޖަކީ އޯޓިޒަމް ކުއްޖެކެވެ. އޯޓިޒަމް ކުއްޖަކަށް ބޭނުންވާނެ ފަރުވާއާއި، ތެރަޕީތައް ވިލިމާލެއިން އެއްވެސް ވަރަކަށް ލިބޭކަށް ނުހުރެއެވެ. ދަރިފުޅަށް ބޭނުންވާ ފަރުވާ ހޯދުމަށް ދާން ޖެހެނީ އައިޖީއެމްއެޗަށް ނުވަތަ ހުޅުމާލޭގައި ހުންނަ އޯޓިޒަމް އެސޯސިއޭޝަނަށެވެ. އޯޓިޒަމް ފަދަ ސިކުނޑިއާ ގުޅިފައިވާ ނުކުޅެދުންތެރިކަމަކީ އާރލީ ޑައިގްނޯސް ކޮންމެހެން ބޭނުންވާ ޙާލަތެކެވެ.

ނަމަވެސް އެ ފަދަ ބަލިތަކަށް ފަރުވާ ހޯދުމަށް ނަން ނޯޓުކޮށްފައި ތިބޭ މީހުންގެ އަދަދު ގިނަކަމުން ފަރުވާ ނުލިބި ވަރަށް ބޮޑަށް ލަސްވެގެންދިޔުމަކީ އަޒީނަތުގެ ކަންބޮޑުވުންތައް އިތުރުވެގެން ދިޔަ ކަމެކެވެ. މީގެ އިތުރުން ނުކުޅެދުންތެރިކަން ހުރި ކުއްޖަކު ގޮވައިގެން ފެރީގައި ދަތުރުކޮށްފައި ހޮސްޕިޓަލަށް ދިޔުމަށް ހުރި އުނދަގޫތަކާއި ގޮންޖެހުންތައް އަމިއްލައަށް އިހުސާސް ކުރަން ޖެހުމުން، މި ފަދަ އެހެން ބެލެނިވެރިންނާ މެދު ވިސްނާލެވުނެވެ. ގިނަ ބެލެނިވެރިން ތިބީ އަޒީނަތާ ދާދި އެއް ޙާލެއްގައެވެ. ކުދިންނަށް ބޭނުންވާ ފަރުވާއާއި، ތެރަޕީތައް ލިބޭނެ ފަސޭހަ މަގެއް ނެތުމުން ބެލެނިވެރިން ތިބީ މާޔޫސްވެ، ހަދާނެ ގޮތް ހުސްވެފައެވެ.

އަޒީނަތު އަމިއްލައަށް ތަޖުރިބާކުރަމުން ދިޔަ އުނދަގޫ ޙާލަތާ އެކު ވެސް އޭނާ ބޭނުންވީ ވީވަރަކުން އެހެން މީހުންނަށް އެހީތެރިކަން ފޯރުކޮށްދޭށެވެ. އެގޮތުން އެންމެ ފުރަތަމަ ހެދީ "ޕޭރެންޓް ސަޕޯޓް" ވައިބަރ ގުރޫޕެކެވެ. މި ގުރޫޕު މެދުވެރިކޮށް އަޒީނަތު އޭނާގެ އަޑު އިއްވައި، އެހެން ބެލެނިވެރިންގެ އަޑު އެހިއެވެ. އެއަށް ފަހު އޭރު އޭނާއާ އެއްކޮށް އުޅުނު ބެލެނިވެރިންނާ ގުޅިގެން "ހިއްވަރު ގަދަ ވިލި ޕޭރެންޓްސް"ގެ ނަމުގައި އިތުރު ގުރޫޕެއް ހެދިއެވެ. އަދި ވިލިމާލޭގައި "މަންމަ" ގްރޫޕެއް ވެސް އުފެއްދިއެވެ. މި ހުރިހާ ގްރޫޕެއްގެ ވެސް މައިގަނޑު މަޤުޞަދަކީ އެއް ކަމެކެވެ. އެހީތެރިކަން ބޭނުންވާ ފަރާތްތައް ދެނެގަނެ، އެ ފަރާތްތަކަށް އެހީތެރިކަން ފޯރުކޮށްދިނުމެވެ. އެގޮތުން ބޭސްފަރުވާއަށް ރާއްޖޭން ބޭރަށް ދިޔުމަށް މާލީ އެހީ ބޭނުންވާ ފަރާތްތަކަށް އެހީތެރިވުމަށް "ފަންޑް ރައިޒިން" ހަރަކާތްތައް ބޭއްވުމާއި، ބޭނުންކޮށްފައި ހުންނަ ތަކެތި އުކާލުމުގެ ބަދަލުގައި ބޭނުން ޖެހިފައިވާ އާއިލާތަކަށް އެ ތަކެތި ފޯރުކޮށްދިނުމާއި، ދީލަތި ފަރާތްތަކުން ރަމަޟާން މަހު ޞަދަޤާތްކުރާ ކާބޯތަކެތި ބެހުން ފަދަ ކަންކަން ކުރަމުން ގެންދިޔައެވެ.

އަދި ވިލިމާލޭގައި ދިރިއުޅޭ ނުކުޅެދުންތެރިކަން ހުރި ކުދިންގެ ދަފުތަރެއް އެކުލަވާލައި، އެ ކުދިންނަށް އެހީތެރިކަން ފޯރުކޮށްދޭން ފެށިއެވެ. މި ދަފުތަރު އެކުލަވާލެވުނު އިރު ނުކުޅެދުންތެރިކަން ހުރި 40 ކުދިން ވިލިމާލޭގައި ދިރިއުޅެއެވެ. އެހީގެ ގޮތުގައި އެންމެ ފުރަތަމަ ކޮށްދެވުނު ކަމަކީ ކުދިންނަށް ބޭނުންވާ ތެރަޕީތަކަށް ނަން ނޯޓުކުރުމާއި ފޯމު ފުރައިދިނުމެވެ. އެއަށް ފަހު ދެން މަސައްކަތް ކުރީ ވިލިމާލޭ ހޮސްޕިޓަލުން ތެރަޕީތައް ލިބޭނެ ގޮތެއް ހަމަޖެއްސޭތޯއެވެ.

އެގޮތުން އައިޖީއެމް ހޮސްޕިޓަލަށް ސިޓީއެއް ލިޔެގެން، ހަފުތާއަކު އެއް ދުވަހު ވިޔަސް ވިލިމާލޭ ހޮސްޕިޓަލުގައި ތެރަޕީ ލިބޭނެ ގޮތެއް ހަމަޖައްސައިދެއްވުން އެދި ދެންނެވިއެވެ. އެކަމަކު އެކަން ހަމަޖެހޭ ގޮތެއް ނުވިއެވެ. އެކަމަށް އިތުރު މަގެއް ފެނޭތޯ ސަކުރާރުގެ ކަމާ ބެހޭ ބޭފުޅުންގެ އަރިހަށް ވެސް ދިޔައެވެ. މަޖިލިސް މެމްބަރުންނާއި، ސިޔާސީ ގޮތުން ނުފޫޒު ގަދަ ބޭބޭފުޅުންނާއި ބައްދަލުކޮށް، މި ކަމަށް ހުރި ދަތިތައް ހިއްސާކުރިއެވެ.

ދެން ވެސް އަލިމަގެއް ނުފެނުނެވެ. އެކަމަކު ދެން ވެސް އަޒީނަތުގެ ހިތްވަރަކަށް ބަދަލެއް ނައެވެ. އެއްވެސް ހައިސިއްޔަތެއް ނެތި މިފަދަ ކަމެއް ކުރެވޭނެ މަގެއް ނުފެނުމުން، އެންޖީއޯ އެއް އުފެއްދުމުގެ މަޝްވަރާތައް އެންމެ އިސްކޮށް އުޅުނު ބެލެނިވެރިންގެ މެދުގައި ކުރެވުނެވެ. އެގޮތުން "ވީލަވްސް"ގެ ނަމުގައި އެން.ޖީ.އޯ އެއް އުފައްދައި، ރަޖިސްޓްރީ ކުރިއެވެ. އެއަށް ފަހު "ވީލަވްސް"ގެ އޮފީހެއް ވިލިމާލޭގައި ހުޅުވިއެވެ.

"ވީލަވްސް" އުފެދުނު ފަހުން ކުރިމަތިލާން ޖެހުނު ގިނަ ގޮންޖެހުންތަކާ އެކު ވެސް، ޖަމިއްޔާގެ އެގްޒެކްޓިވް މެމްބަރުންގެ ވަރަށް ބުރަ މަސައްކަތުން ނުކުޅެދުންތެރިކަން ހުރި ކުދިންނަށް ގިނަ ކަންތައްތަކެއް ކޮށްދެމުން ގެންދެއެވެ.

އަޒީނަތުގެ އުފަލަކީ މިއެވެ. އަމިއްލަ ދިރިއުޅުމުގައި ހުރި ދަތިތަކާ އެކު ވެސް،  އިޚުލާސްތެރި ހިތަކާ އެކު ހިލޭ ސާބަހަށް އިންސާނިއްޔަތަށްޓަކައި މަސައްކަތް ކުރުމެވެ. އެހެން މީހުންނަށް އަޅާލައި، އޯގާތެރިވުމެވެ. އަނެކުންނަށް ދިމާވާ ދަތިތަކަށް ލުއި ގޮތްތަކެއް ހޯދައިދިނުމެވެ. މިހާރު އަޒީނަތުގެ އަޒުމަކީ ޑިސްއެބިލިޓީ ކައުންސިލްގެ ޕޭރެންޓް ގޮނޑި ކާމިޔާބުކުރުމެވެ. ސަރުކާރުގެ ތެރެއިން ހައިސިއްޔަތެއް އޮވެގެން، ނުކުޅެދުންތެރިކަން ހުރި ކުދިންގެ ބެލެނިވެރިންގެ އަޑު އުފުލެމެވެ. އެ ފަދަ ކުދިންނަށް ބޭނުންވާ ކަންކަން ކޮށްދިނުމަށް ލުއި ގޮތްތަކެއް ހޯދައިދޭން މަސައްކަތް ކުރުމެވެ.